Read xamtanga ረውምየት እቂዝ 9 Bible Online

ረውምየት እቂዝ 9 - xamtanga bible

ረውምየት እቂዝ 9

¹ክርስቶስቱ ኣቕ እማን ዊግጠኵን፤ ኻሽወቅም፤ ይኽሊነድ መንፈስ ቅዱስት ኣመካይነትዝ ይጭስ ሚዝርደኵ።

²ኽየው ኽዝንዝመ ቀቭሽታው ጭጝቅትዝ ይእዘኒል እኩ።

³ምላሰንድም ይኽዝቭ ኣቐቍ ይውግናኒዝ የር ያን ይቕም እፂጠር ክርስቶስቲስም ቲጥ ሊቨር ኣቕ እዳቓን እኳ ቀንጨ ዊኑን።

⁴ጛይ እስራየላን ጛይ፤ እደረ ጛት ዅል ፃቭኩ፤ ጝክቭርድየንት ጛጭስ ጋልፅኩ፤ ጛጅቅም ቃል ኪዳን ጥውኩ፤ ኽግዝመ መቅደስ ጝንዙ ስረትዝ፣ ቲስፈዙ ቃልዝም ጛጭስ ይውኩ።

⁵ጝታእዅርሽንድ ነገዳኒዝ ኣቅሊስ ተረው የጝ፤ ክርስቶስም ስየዝ ተረውድ ጝታዚረይስ የጝ፤ ጘጝም እጝቂስቅ ኒየ ኣቐው ዘላልም ሚዝየንሽተው ኣምላክ የጝ። ኣሚን!

⁶ዊገድ ግን እደረት ቃልድ ሸርሽኩ የነትም ኣየው፤ ምላሰንድም እስራየላኒስ እዅርሸውድቅ እማንተው እስራየላነውም ኣየው።

⁷ኣቭርኻምት ዚረ ኣጛንስቅ እጝቅቅ እማንተቍ ኣቭርኻምት ቝርም ኣየቍ፤ ኽሽስ፦ «ክዚረድ ይሳቅ ትጐትውዝ ጭጝሽጡ» ይሽት ፃፍሸጘ የጝ።

⁸እንም እደረት ቝር ይሽተቍድ ስየዝ ኣቭርኻምቲስ እዅርሸቅድም ኣየቍ፤ ኣቭርኻምት ቝር ይሽተቍድ ቲስፈዙ ቃልዝቍ ዅልድ ጭቝ ጛይ።

⁹እኒን ቲስፈዙ ቃልድም፦ «ግርየድ ችጛንድ ክጐ ዋጥርጭር፤ ሳረም ግልወ ዅር እዅርቲ» ይሽተውድ የጝ።

¹⁰እኒን ጭቝም ኣየው፤ ርቭቀ ቈሽ ላው ይናኣይር ይሳቅቲስ ማንጥ ጊዙትር ፅብራ፣

¹¹እፈርድ ገነ እዅርሺጝቀ ዊንም ጛይ ቀሰውም ኣነ ጭቓ ዊገ ሰራሺጝቀ ርቭቀስ፦ «ኽየውድ እጥኒዝ ቅምሽጡ» ይሽት ድቍሽቱ፤ እንም ኣቐውድ እደረ ማርፀውድ እጅርዙ ሰቭዝ ኣዪጝቀ ጝቕምቱ ጭጝንዝ ኣቐጘ ጋልፅሽታንስ ማጥን የጝ።

¹³እንም፦ «ያይቈቭት ቀኑን፤ የሳውት ግን ሽክጡን» ይሽት ፃፍሸጘ የጝ።

¹⁴ነስየ ወረጘ ይና? እደረ ኣድልወኵ የነትመ? እረ ኣየውማ!

¹⁵ምላሰንድም ሙሴስ፦ «ሳቝጨ በነውድየንት ሳቝጭር፤ ኣርኽርኽጨ በነዊዝም ኣርኽርኽጭር» የውኩ።

¹⁶እንዝ ማጥን እኒን ኣቐውድ እቀ ፍቃድዝ ዊንም ልቕረዝ ኣዪጝቀ እደረት ስቝርትዝ የጝ።

¹⁷መፃፍ ፈረውንት፦ «ይኻይልድ ክግዝ ቓሊሽታንስ፣ ይሽድም ዝቨይልቅ ጭጝሻንስ ማጥን ክት ጒስኩን» የኵ።

¹⁸ኣቓንስቅም እደረ ሳቝርጠ በነው እጅሪዝ ስቝርት ፃቨኵ፤ ጝእዘንድ ኽልክኘ ፃቭጠ በነው እጅርድየንትም ኽልክኘ ፃቨኵ።

¹⁹ክታጊስ ላው እጅር፦ «እደስለ እነየው ኣቐውዝየ እደረ ነን ኣሽ ይናት ዊቅሰውድ ውር ማጥን የጝ? ጝፍቃድድ ተቋውምሽጠ ቸለው ኣው እጅር እኩ?» የው ይት ዋቕርጠ በንጡ ኣጠት።

²⁰እፈ እጅር ክተ! እደረስ እነይር ዊስረውድ ክት ኣው ኣቕር የጝ? ሻኽለ ጝት ሰራሸው እጅርድየንት፦ «ውር ቃጥ ይት እነሽር ተስሩ?» ይጠ ቸለኵመ?

²¹ሻኽለ ተሰው እጅር ሰራሸው ዳርወይስ ላው ላውድየንት ኪብረው ውላዝ፣ ላው ላውድየንት ቈሽ ኪብራው ውላዝ ግርየው ሻኽለ ፃቭ ተሰነው መቭት እጀውመ?

²²እደረ ጝቍጠድ ቓሊስጠ፣ ጝኻይልድም ኣርቕስጠ በን ጝቍጠይዝ ጋልፅሽተነ ኣቐቍ፣ ድዘርዝም ኣስልሸቍድዛት ጭቕጘ ታግስሽት ፅብሽሰ?

²³በውግስ ክቭርዝ ኣስለቍ ጝስቝርቲዝ ጋልፅሽተነ ኣቐቊዝ ቈሽ፣ ጝክቭሪዙ ፃጀድ ኣርቕሽታንስ ማጥን እኒንት ፃቭ ፅብሽሰ?

²⁴ጝስቝርቲዝ ጋልፅሸተነ ኣጥጘ ጭጝሸቍድም ኣይዅዳኒስ ጭቝ ኣዪጝቀ ኣኽዛቫኒዝ ዊግን ኣነቅ ይንም የጝ።

²⁵እንም እደረ ዀስየትዝ፦ «ይኽዝቭ ኣየውድየንት፦ ‹ይኽዝቭ› የር ጭጝጭር፤ ቀንሺረይሸንትም፦ ‹ቀንሽረይ› የር ጭጝጭር።

²⁶ቈሽም፦ ‹ይኽዝቭ ኣይርነቅም› ይሽት ጛጭስ ድቍሽተው ጘጝ ስፍረይስ፦ ‹ፅበው ኣምላክት ቝር› ይሽትጝ ጭጝሽጥቍ» የው ዊግተጘ ይጝ።

²⁷ይሳያስም፦ «እስራየላነ ዚረድ ባኽር ደዪይዙ ሽነይዝጘ ንቕፅሽም ጛጊስ ቓደቍድ ዊትቍ ጭቝ ጛይ።

²⁸ምላሰንድም እደረ ደዪጝቀ ቃዝየዝ ጝፍርድድየንት ፋፅምጡ» የው እስራየላኒዝ ማጥን ቓፃ ዊግተኵ።

²⁹እኒዝጘም ይሳያስ፦ «ሰራዊትዝ ኣደረ ይናጭስ ዚረ እዳዚየው ኣቓን ሰደውምትጘ ኣነ ዊኑን፤ ጐመረትም ተክነ ዊኑን» የው በውግስ ዊግትኩ።

³⁰ነስየ ወረጘ ይና? ፅድቅ ችጝጥጘ ልቕርዲየቍ ኣኽዛቫንድ ፅድቅ ችጝ፤ እን ፅድቅድም እምንትዝ ችጝሸውድ የጝ።

³¹ፅድቅዙ ኽግድየንት ቲክነቍ እስራየላንድ ግን ችጚየቍም።

³²እኒን ወረጝዝ የጝ ኣቐውድ? ጛይ እምንትዝ ኣዪጝቀ ሰቭዝ ኣቐጘ ፃቭጝ ኻስቨነውዝ ቲክንጛንስቅ የጝ፤ እንዝ ማጥን ፅጋሰው ቕርጘዝ ፅጋር።

³³እንም፦ «እንወ እቅድ ፅጋሰው ቕርጘ፣ ሊቭጥጘም ፃቨው ፃፀ፣ ፂወንትል እቝርጭር፤ ጝዝ ኣምነውድቅ ግን ኣይቭታውም» ይሽት ፃፍሸጘ የጝ።