Read xamtanga 1ቈረንተውስት እቂዝ 1 Bible Online

1ቈረንተውስት እቂዝ 1 - xamtanga bible

1ቈረንተውስት እቂዝ 1

¹እደረት ፍቃድዝ እየሱስ ክርስቶስት ኻወርየ ኣጠ ጭጝሸው ባውሎስቲስ፣ ይናዝን ሰስተኒስቲስም፦

²ቈረንተውስ ፅብረይ እደረት ምከንሸንስ፣ ክርስቶስ እየሱስትውዝ ቀድስሽተቊዝ፣ ቅዱሳንም ኣጥጘ ጭጝሸቊዝቅ፣ እኒዝጘም እጝቅ ስፍረይልቅ ጛጭስም ይናጭስም ኣደረ ኣቐው ይናኣደረ እየሱስ ክርስቶስት ሽድየንት ጭጘቊዝቅ እፃሽተው እፃ።

³ይናኣይር እደረቲስ፣ ይናኣደረ እየሱስ ክርስቶስቲስም ፃገዝመ ዲግተዝ ክታጭስ ኣነ።

⁴ክርስቶስ እየሱስት ኣመካይነትዝ ክታጭስ ነይሽተው ፃገይዝቍዝ ዊትርቅ ክታማጥን እደረት ሚዝየንዘኵን።

⁵ኣውማው ዊገይዝቅ፣ የነትም ዊግትንዝቅ፣ ኣርቕትዝቅም ክርስቶስትውዝ ፃጅትርንኵርኑ።

⁶ምላሰንድም ክርስቶስት ማጥን ክታጭስ ድቍነው ሚዝርነይድ ክታግል ፀናቕኩ።

⁷እንዝ ማጥን ይናኣደረ እየሱስ ክርስቶስት ጋልፅሽተነድየንት ጕጕትዝ ኣርውርድርና ኣውማው መንፈሳዊ ይውትድቅ ክታጊስ ጒድላውም።

⁸ይናኣደረ እየሱስ ክርስቶስት ሊጘት ተረነ ግርየይዝ ነቐፈ እጅርነቅ ኣቕርን ችጝሽርናንስ ማጥን ጘጝ ጝቕም ኻትሸነይል ኣሽ ፀናቕርን ችብርትርነ ፃቭጡ።

⁹ክታት ጝዅር ይናኣደረ እየሱስ ክርስቶስት ኽብሪል ጭጘው እደረ ኣምንሸው የጝ።

¹⁰ይፅንወ! ክታማኽሊል ቲተቲትን ችጝሻየጘ፣ ላው እዘን፣ ላው ኻሰቭም ኣቕርናንስ፣ ክታስ ክታይም ቲስመምርናንስ ማጥን ይናኣደረ እየሱስ ክርስቶስት ሽዝ ክታት ጨወኵን።

¹¹ይፅንወ! ክታማኽሊል ጐር ፅበጘ ቀለውየት በተሰቪስ ወጭኩን።

¹²እንም ክታጊስ ላው ላውድ፦ «ያን ባውሎስቱ የጝ» የኵ፤ ላውድ፦ «ያን ኣብሉስቱ የጝ» የኵ፤ ላውድም፦ «ያን ከይፈቱ የጝ» የኵ፤ ላየድ ቈሽ፦ «ያንስ ክርስቶስቱ የጝ» የኵ።

¹³ኣየውጚ! ክርስቶስ ኣድልድልሽመኩ? ዊንስ ባውሎስመ ክታማጥን ሲቅልሽኩ? ዊንስ ባውሎስት ሽዝመ ጣምቅሽርነውድ?

¹⁴«ባውሎስት ሽዝ ጣምቅሽርኑ» የው ኣውማውቅ ዊግታየጘ ቀርስበስስመ ጋይወስስታት ኣየት ክታጊስ ኣውማውትቅ ጣምቂቀር ኣቓንስቅ እደረት ሚዝየንዘኵን።

¹⁶እርግጥ እስጢፋነውስት በተሰቭድዛት ጣምቅኩን፤ እንዛዝለ ላየ እጅር ጣምቀጘ ኣስክሰለም።

¹⁷ክርስቶስ ይት እፃቐውድ ወንጌል ሲቭካንስ የጝጚ ጣምቃንስም ኣየው፤ ክርስቶስት ሚስቅልድ ጊነ ኣቕ እዳቓየጘ፣ ወንጌሊዙ ቃልድየንት ሲቭከውድ እቀ ጥቨቭዙ ዊግትንዝም ኣየው።

¹⁸ሚስቅሊዙ ቃልድ ድዘቍ እቂዝ ኻጝልት የጝ፤ ይን ቓድነቂዝ ግን እደረት ኻይል የጝ።

¹⁹ምላሰንድም፦ «ጥቨቭኝጢዙ ጥቨቭድየንት ድስጭር፤ ሊቃውንታኒዙ ኣርቕትድየንትም ጊነ ፃቭጭር» ይሽት ፃፍሽትኩ።

²⁰እደስለ ጥቨቨኘ ኣውል እኩ? ሊቅስ ኣውል እኩ? ተመራምርሸውስ ኣውል እኩ? እደረ እን ኣልሚዙ ጥቨቭድየንት ኻጝልት ፃቭየውቀ?

²¹እደረት ጠቨቭዝ ምላሰንዝ ኣልም ጝርጥቨቪዝ እደረት ኣርቒረይ ኣራንስቅ፣ ኻጝልት ተክ እትለው ይን ሲቭክነው ወንጌሊዝ ኣምነቍድዛት ቓዝጠ እደረት ቀሰው ፍቃድ ኣቕኩ።

²²መቸም ኣይዅዳንድ ታምርዙ ምልክት ቓልጥጘ በንጘኵ፤ ግሪካንድ ቈሽ ጥቨቭ በንጘኵ።

²³ይን ግን ሲቅልሸው ክርስቶስት ሲቭክነኵን፤ እንም ኣይዅዳኒዝ ፅጋ፣ ግሪካኒዝ ቈሽ ኻጝልት የጝ።

²⁴እደረ ጭጘቊዝ ግን ኣይዅዳኒዝም ኣነ ግሪካኒዝ ክርስቶስ እደረት ኻይልዝመ ጥቨቭዝ የጝ።

²⁵ምላሰንድም እቀ ጥቨቪስ ሽ እደረት ኻጝልትድ ጥቨቭዝ ዲቈኵ፤ እቀ ብርታቲስ ሽ እደረት ዝላድ ኻይልደኵ።

²⁶ይፅንወ! ጭጝሽርናንት ኰር ኣወይርነቅ ዊንድርነጘ እስቲ ኣስክስጥን፤ እጅር ኻስቫንትጘ ክታማኽሊስ ንቕፅርነቅድ ጥቨቨኝጥ፣ ዊንም ኻይልቍ፣ ዊንም ኽይርነቅ፣ ዊኒርነቅም።

²⁷ዊገድ ግን እደረ ጥቨቨኝጥድዛት ኣይቭስጠ ኣልሚዝ ኻጝልት ተክ እትለው ዊገድየንት ማርፁ፤ ኻይልቍድዛት ኣይቭስጠ ኣልሚዝ ዝላቐው ተክ እትለው ዊገድየንት ማርፁ።

²⁸እደረ እን ኣልሚስ ኪብረው ዊገድየንት ሸርጠ፣ እን ኣልሚስ ተዋርድሸው፣ ነቅሸው፣ ጊነም ተክ እትለው ዊገድየንት ማርፁ።

²⁹እኒንትም ፃቨውድ ኣውማው እጅርቅ ጝበዊል ማክኽሻየጘ የጝ።

³⁰ክርስቶስ እየሱስትቍ ኣቐነውዝ በቃቕርነውድ እደረትቍዝ የጝ፤ እደረ ክርስቶስ እየሱስት ይናጥቨቭ፣ ይናፅድቅ፣ ይናቅድስነ፣ ይናቺም ፃቭኩ።

³¹ነስየ፦ «ኣውማው ማክኽሸውድቅ ኣደረትውዝ ማክኽሽነ» ይሽት ፃፍሸጘ የጝ።