Read xamtanga 1ቈረንተውስት እቂዝ 10 Bible Online

1ቈረንተውስት እቂዝ 10 - xamtanga bible

1ቈረንተውስት እቂዝ 10

¹ይፅንወ! ይናኣቅልድ እጝቅቅ ድምነዝ ገርድሽጝ ዊንጘጘ፣ እጝቅቅም ባኽሪዝ ማኽለማኽል ከርጘጘ ኣርቕትርነ በነኵን።

²እጝቅቅም ሙሴ ጅቅ ላው ኣጛንስ ማጥን ጘጝ ድምነይዝመ ጘጝ ባኽርይዝ ጣምቅሽ።

³እጝቅቅም ላው ኣይንት መንፈሳዊ ዅረ ዅ።

⁴እጝቅቅም ላው ኣይንት መንፈሳዊ ዝይን ዝይ፤ ጛት ቲክና ዊነው መንፈሳዊ ፃፀይስ ዝይጝኵ፤ ጘጝ ፃፀድም ክርስቶስ ዊኑ።

⁵ኣነጚ እደረ ጛጊስ ንቕፀቊዝ ዲስ ይየውም፤ ኣቓንስቅም ጝታእርሸድ በራኸይል ሊቭ ሊቭ እዳቑ።

⁶ጛይ ጭቓ ማርቕፅጘጘ ይንም ቈሽ ማርቕፃይነጘ እንዛይ ዊቅድ ይናጭስ ጥጝቅቀዙ ተከ ኣቕ።

⁷«ኽዝቭድ ዅጥጘ ዚጥጘ ጐይ፤ ዚቭጥጘም ጕ» ይሽት ፃፍሸጘ፣ ጛጊስ ላው ላውድ ፃቭጘጘ ክትንም ጣወት ኣምልክትርነ።

⁸ጛጊስ ላው ላውድ ሻርሙጥጛንስቅ ላው ግርየዝ ለርን ሻቘ ሽኽ እቅ ኣቢትጘጘ፣ ይንም ሻርሙጥነ ጥውሻውም።

⁹ጛጊስም ላው ላውድ ኣደረት ፊትንትንጘጘ፣ ሲቭረዝም ዀሽትጝ ዀሽትጝ ድዝጘጘ ይንም ኣደረት[2] ፈትንትነ ጥውሻውም።

¹⁰ጛጊስም ላው ላውድ ኣጕርምርጘጘ፣ ቂስፈው መላኪዝም ድዝጘጘ፣ ክትንም ኣጕርምርምትርነ።

¹¹እንቅ እጝቅ ይናጭስ ተከ ኣቓንስ ማጥን ጛግል ችጙ፤ ዚምናኒዙ ኻትሸነይል ፅብነቅ ይናጭስ ጣጝቅቅሰነ ኣቓንስ ማጥንም ፃፍሽኩ።

¹²እንዝ ማጥን፦ «ፀናቕ ችብጥኩን» የው እጅር ፅብሽ ሊቫየጘ ጣጝቅቅሽነ።

¹³እጝቅ እጅሪልቅ ችጘው ፊተነይዝለ ቲተው ፊተነ ክታግል ችጚየውም፤ እደረ ኣምንሸው የጝ፤ ጘጝ ክትን ቸልትርኑዊስ ንየ ፊትንሽትርነ በራውም፤ ዊገድ ግን ፊትንሽርናንድ ፊተነድየንት ታግሽተነው ቸልድርናንስ ማጥን ፈነ ጒደነድየንት ክታጭስ ኣስልጡ።

¹⁴እንዝ ማጥን ይወደጃንወ! ጣወት ኣምልከነዊስ እክልጥን።

¹⁵እኒንት ዊግጠውድ ኣስክስርነቅ ኣቕርናንስቅ የጝ፤ ያን ዊግጠውድየንት ክታቕም ፊርድጥን።

¹⁶በርክነው በረከቲዙ ፅወድ ክርስቶስት ብሪጅቅ ኽቭር ፃየው ኣየውመ? ቈርስነው ሚድስ ክርስቶስት ስየይጅቅ ኽቭር ፃየው ኣየውመ?

¹⁷ሚድ ላው ኣቐጘ ይንም ንቕፀቍ ኣቕን ፅብና ላው ኣካል የጝ፤ ምላሰንድም ይን እጝቅቅ ላው ሚድየንት ኣድልሽነኵን።

¹⁸እስኪ እስራየላንድዛት ኻስቭጥን፤ ምስዋትድየንት ዀቍድ መሰውየይጅቅ ኽቭር ፃየቍ ዊኒየቍመ?

¹⁹እደስለ ያን ዊግጠውድ ጣወትዝ ሲውሽተው ስየድ እርቫነ ፃይኩ ያመ? ዊንስ ጣወትድ ጝቕም ርቫነ ፃየው የጝ ያመ?

²⁰ኣየውም፤ ዊገድ ግን ኣኽዛቫንድ ምስዋይት ኣልስጘውድ እደረስ ኣዪጝቀ ጋኒናኒዝ የጝ፤ ያንም ጋኒናኒጅቅ ተቫቭርሽትርነ በነቅም።

²¹ኣደረት ፅወይዝመ ጋኒናኒይዙ ፅወዝ ላብጠ ዚትርነ ቸላይርነቅም፤ ኣደረት መዲስመ ጋኒናኒዙ መዲስ ላብጠ ዅትርነ ቸላይርነቅም።

²²ኣደረትመ እንዝ ቀኒስነ? ጝሽመ ይን ኻይልድነቀ?

²³«እጝቅቅ ፊቅድሽኩ» ዊገድ ግን እጝቅቅ ጣቅማውም፤ «እጝቅቅ ፊቅድሽኩ» ዊገድ ግን እጝቅ ዊገድቅ ኻንፃውም።

²⁴ኣውማው እጅርድቅ ጝፃምረይዙ ኣርወድጚ ጝቕምቱ ኣርወድ ጭቝ በኒነ።

²⁵ኽሊነዙ ምርምርል ጥዊጝቀ ኣርየይስ ቂሸው ስየድየንትቅ ዅጥን።

²⁶ምላሰንድም፦ «ዝቨይዝመ ጝኣቒል ፅበውድቅ እጝቅ ኣደረቱ የጝ።»

²⁷ኣምናው እጅር ኣቭንወ ጭጝሽ ክትንም ፊርትርነ በንርንሽ ኽሊነዙ ምርምርል ጥዊጝቀ ክታጭስ ኣልተውድየንትቅ ዅጥን።

²⁸ዊገድ ግን ላውድ፦ «እኒን ጣወትዝ ሲውሽተው የጝ» ይሽ፣ እኒንት ድቈው እጅሪዝ ምላሰንዝ፣ ኽሊነዝቍዝም ስየድየንት ዅትርነ።

²⁹ኽሊነዝ ማጥን ያንድ እድየን እጅሪዙ ኽሊነይዝ ማጥን የነት የጝጚ ክታኽሊነይዝ ማጥን የነትም ኣየው፤ ውር ቃጥ የጝ ይኻርነይድ ላየ እጅሪዙ ኽሊነዝ ዊቅሽተውድ?

³⁰ዅረድየንት እደረት ሚዘንዝ ዀር ኣቐውዝየ እደረት ሚዝየንዘው ዊገይዝ ውር ቃጥ የጝ ዊቅሽጠውድ?

³¹ነስየ ዅርናንድም ኣነ ዝይርናንድ ዊንም ኣውማው ዊገድቅ ፃቭርናንድ እጝቅ ዊገድየንትቅ እደረ ኪብርጠ ፃቭጥን።

³²ኣይዅዳኒዝም ኣነ ኣኽዛቫኒዝ ዊንም እደረት መክንስም እጝቅዝቅ ፅጋ ኣትርነ።

³³ያን እጝቅ ዊገይዝቅ ኣውማው እጅርድየንት ዲስ ሽጨ ልቕርጠር ኣቐጘ፣ ክትንም ጘጝት ፃቭጥን፤ ንቕፀቍድ ቓድጛንስ የር ይቕምስ ጣቅመውድየንት ኣዪጝቀ ጛጭስ ጣቅመውድየንት በነኵን።