Read xamtanga 1ቈረንተውስት እቂዝ 11 Bible Online

1ቈረንተውስት እቂዝ 11 - xamtanga bible

1ቈረንተውስት እቂዝ 11

¹ያን ክርስቶስት ተከድየንት ቲክናንትጘ ክትንም ይተከድየንት ቲክንጥን።

²እጝቅ ዊገይዝቅ ይጭስ ኻስቭርነቅ ኣቕርናንስቅ ይጊስ ለምትርነው ክንድጝድየንትም ቐናዝርን ፃይርናንስቅ ሚዝየንዘኵን።

³ዊገድ ግን እጝቅ ግልወይዝቅ ኣውርድ ክርስቶስ፣ እውነት ኣውርድም ግልወ፣ ክርስቶስት ኣውርድም እደረ ኣቐነውድ ኣርቕትርነ በነኵን።

⁴ጝኣውርድ ቍውር ፃልየው ዊንም ትንቪት ዊግተው ኣውማው ግልወድቅ፣ ጝኣውር ኣቐው ክርስቶስት ኣዋርዘኵ።

⁵ጝርኣውርድ ቍውሪጝቀ ፃልይረይ ዊንም ትንቪት ዊግትረይ እውነቅ፣ ጝርኣውር ኣቐው ጝርጕርየት ኣዋርዘች፤ ጝርኣውርድም ላይትረይ ኣቕር እጊተች።

⁶እውነ ጝርኣውድ ቍውራይ ኣረውዝየ ጝርፅቭቀድ ቀቭሽትርነ፤ ጝርፅቭቀድ ቀቨሽተነው ዊንም ላይተነው ኒውር ተክ ጝርጭስ እትልሽ ግን ጝርኣውርድ ቍውትርነ።

⁷ግልወ እደረት ሚልኪዝመ ክቭሪዝ ቓሊሰው ኣቓንስቅ ጝኣውርድ ቍውርጠ ጥውሻውም፤ እውነ ግን ግልወዙ ክቭርድ ቓሊስረይ ጚ።

⁸እውነ ግልወይስ ችጝሽችጚ ግልወ እውነቲስ ችጝሺየውም።

⁹ቈሽም እውነ ግልወዝ ፋጥርሽችጚ ግልወ እውነስ ፋጥርሺየውም።

¹⁰እንዝ ምላሰንዝ፣ መላካኒዝ ምላሰንዝም፣ እውነ ስልጣንዝ ስርል ኣረጘ ቓሊሰው ምልክት ጝርኣውሪል ፃቭርነ።

¹¹ኣደረ ጅቅ ፃይነው ኽቭሪዝ ግን እውነ ግልወ እጀው፣ ግልወም እውነት እጀው ኣቓውም።

¹²እውነ ግልወይስ ችጝሽረጘ ግልወም እውነቲስ እዅርሸኵ፤ ዊገድ ግን እጝቅት ችጝሸነድ እደረ የጝ።

¹³እስቲ ክታቕም ፊርድጥን፤ እውነ ጝርኣውርድ ቍውሪጝቀ እደረ ትጐ ፃልይተ ጥውሸኵመ?

¹⁴ግልወ ጝፅቭቀድ ሊጊሰነው ኒውር ኣቐጘ፣ እውነ ግን ጝርፅቭቀድ ሊጊሰነው ክቭር ኣቐጘ ተፈጥረውድ እኳ ክንሰኵ ኣየውቀ፤ እውነ ግን ጝርፅቭቀድ ጝርቕምት ሺፊንዳንስ ማጥን ጝርጭስ ይውሽትኩ።

¹⁶ነስየ እን ዊገይዝቍዝ ኣውማውቅ ተከራክርሽጠ በንሽ ይንም ኣነ እደረት ምከንጣንድ እኒስ ቲተው ልምድ እጅነቅም።

¹⁷ዊገድ ግን ኣኽቭሽርናንድ ጭቓዝጚ ጣቅመውዝ ኣየው ኣቓንስቅ እኒስ ቲክነው ትዛዝድ ነቃንድ ክታት ሚዝየንዛም ኣየው።

¹⁸እጝቂስቅ በውገ ምመናኒጅቅ ኣኽቭሽርናንድ ክታማኽሊል ቲተቲትን ፀበጘ ወጭኩን፤ እንም ኣጠጘ ዊትውዝ ኣምነኵን።

¹⁹ክታማኽሊስ ትክክል ኣቐው ክንድጝድየንት ቲክነቍድዛይ ኣርቕሽትጛንስ ማጥን እኒን ቲትንድ ክታማኽሊል ፅብጠጘ ግድ የጝ።

²⁰ላው ኣቕርን ኣኽቭሽርናንድ ዅርነውድ ኣደረት ድረይም ኣየው።

²¹ምላሰንድም ላውድ ላየድየንት ሊሚዲጝቀ ጝሚድየንት ዀኵ፤ ላውድ ግድርዳ ላየድ እራቐኵ።

²²ኣየውጚ ውረ ዀነቍ ዝየነቍ ጝንጥመ እጅርነቀ? ዊንስ እደረት ምመናንድ ነቀነውዝመ ውረውረ እጀቍ ድኽድዛት ኣይቭስርና? ነስየ ወረጘ ይጫ? እኒን ዊገይዝቍዝ ክታት ሚዝየንዝጨመ? ስሪስቅ ሚዝየንዘቅም።

²³ያን ኣደረቲስ ለምጠውድየንት ክታጭስ ዲቍስ ነቅኩን፤ ኣደረ እየሱስ ዲቍሽት ይውሽተይ ኻርሸንስ ሚድየንት ጕይ፣

²⁴በርከት ግረ ቈርስ፦ «እኒን ክታቺ ኣቐው ይስየድ የጝ፤ እኒንት ይት ኻልየነዝ ፃቭጥን» ዩ።

²⁵እኒዝጘም ድረይዝ ግረ ፅወድየንት ጕይ፦ «እኒን ፅወድ ይብሪዝ ኣቐው ኣይር ኪዳን የጝ፤ እንዝ ማጥን ፅወይስ ዝይርናንድ እኒንት ይት ኻልየነዝ ፃቭጥን» ዩ።

²⁶እኒን ሚድየንት ዅርናንድ እኒን ፅወድየንትም ዝይርናድቅ ኣደረ ተርጢስቅ ጝክርጘድየንት ዊግትርነኵ።

²⁷ነስየ ኣውማው እጅር ጥውሻው ኣቕ ፅባ እኒን ሚድ ዅሽ፣ ዊንም ኣደረት ፅወድ ዝይሽ፣ ኣደረት ስየይዝመ ብሪዝ ቀልዛንስቅ ጝዝ ዋቕርሽጡ።

²⁸እንዝ ማጥን ኣውማው እጅር እኒን ሚስ ዀነዊስ፣ እኒን ፅወይስም ዝየነዊስ በዊል ጝቕምት ሚርምርነ።

²⁹ኣውማው እጅር ኣደረት ስየድየንት ወረጘ ኣቐጘ ኣርቒጝቀ ዅሽ፣ ፅወድየትም ዝይሽ፣ ጝቕምት ፊርድሰውድየንት ዀኵ፤ ዝየኵ።

³⁰ክታማኽሊስ ላው ላውድ ዝላጘውድ፣ ፅዊትጘውድም፣ ላው ላውድ ቈሽ ክርጘውድ እንዝ ምላሰንዝ የጝ።

³¹ይናቕምት ሚርምርናን ግን ይናግል ፊርድሻውም ዊኑ።

³²ዊገድ ግን ኣደረ ይናት ፊርዳንድ ኣልሚጅቅ ኲንንሻይነጘ፣ ነን ይናት ጋስፀኵ።

³³እንዝ ማጥን ይፅንወ! ዅትርነ ኣኽቭሽርናንድ ክታስ ክታይ ሊመሊምድሽትጥን።

³⁴ኣኽቭሽርናንድ ፍርድዝ ኣቓየጘ ኣውማው ግድርደው እጅር ፅብሽ ጝጝኒስ ዅነ፤ እዳቐው ዊገድየንት ቈሽ ተጣንድ ዲጝግግጭር።