Read xamtanga 1ቈረንተውስት እቂዝ 12 Bible Online

1ቈረንተውስት እቂዝ 12 - xamtanga bible

1ቈረንተውስት እቂዝ 12

¹ይፅንወ! ነን ቈሽ መንፈስ ቅዱስት ይውቲዝቍዝ ኣርቕርትርነ በነኵን።

²ኣኽዛቫን ዊንድርናንድ እነ ኒረ ሸምሽርና ዊግትጝ ቸላቍ ጣወታኒዝጐ ፊስሽትርና ዊንድርነጘ ኣርቕርነኵ።

³እንዝ ማጥን ኣውማውቅ እደረት መንፈስዝ ዊግታ፦ «እየሱስ እፂተው የጝ» የው እጀው ኣቐጘ፣ እኒዝጘም መንፈስ ቅዱስዝ ኣየውዝየ ኣውማውቅ፦ «እየሱስ ኣደረ የጘ» የው እጀው ኣቐጘ ክታጭስ ድቈኵን።

⁴ቲተቲተው ይውት እኩ፤ መንፈስ ግን ላው የጝ።

⁵ቲተቲተው ኣግልግለውት እኩ፤ ኣደረ ግን ላው የጝ።

⁶ቲተቲተው ሰቭዙ ኣይንት እኩ፤ እኒንትቅ እጝቅ እጅርዝቅ ይወው እደረ ግን ላው የጝ።

⁷እደረ እጝቅ እጅርዝቅ መንፈስ ቅዱስት ጋልፀነው ይወውድ ላብጠቱ ኣርወዝ የጝ።

⁸ላዊዝ መንፈሲዝ ኣመካይነትዝ ጥቨቭዙ ቃል ዊግተነው ይውት ይውሽተኵ፤ ላዊዝ ቈሽ እድ መንፈሲዝ ኣመካይነትዝ ኣርቕትዙ ቃል ዊግተነው ይውት ይውሽተኵ።

⁹ላዊዝ እድ መንፈሲዝ ኣመካይነትዝ እምንትዙ ይውት፣ ላዊዝም ላው መንፈሲዝ ኣመካይነትዝ ቓዘነው ይውት ይውሽተኵ።

¹⁰ላዊዝ ቈሽ ታምራን ፃቨነው ይውት ይውሽተኵ። ላዊዝ ትንቪት ዊግተነው፣ ላዊዝ መንፈሳንድ ቲዘነው፣ ላዊዝ ቈሽ ጝሉ ኣይንት ቋቈዝ ዊግተነው፣ ላዊዝም ጝሉ ኣይንት ቋቈዝ ዊግትሸውድየንት ቲርጕመነው ይውት ይውሽተኵ።

¹¹እንቅ እጝቅ እድየን ላው መንፈሲዙ ይውት ኣቓንድ፣ እጝቅ እጅርዝቅ ጘጝ ጝቕም ፊቅደጘ ይወኵ።

¹²ሰውነት ንቕፀቍ ኣካላን ፃየው ኣቕሽም እኳ ላው ሰውነት የጝ፤ ኣካላንድ ንቕፀቍ ኣጝሽም ላው ሰውነቲስ ችጝሸቍ ጛይ፤ ክርስቶስም እኒዝጘ የጝ።

¹³ኣይዅዳን ዊንም ግሪካን ኣንሽ፣ በር ዊንም ጭው ኣንሽ፣ ይን እጝቅቅ ላው ሰውነት ኣነ ማጥን ላው መንፈስዝ ጣምቅሽንኵኑን፤ ይን እጝቅ ዝይናንስ ማጥን ላው መንፈስድ ይናጭስ ነይሽትኩ።

¹⁴ሰውነት ሰራሽተውድ ንቕፀቍ ኣካላኒስጚ ላው ኣካሊስም ኣየው።

¹⁵ልኵ፦ «ያን ናን ኣይቀር ኣቓንስቅ ሰውነትዙ ክፍልም ኣይቀር» ያን፣ እኒንት ያንስቅ ሰውነትዙ ክፍል ኣቐነውድ እዳጡመ?

¹⁶ቀርዝም፦ «ያን እል ኣይቀር ኣቓንስቅ ሰውነትዙ ክፍልም ኣይቀር» ያን፣ እኒንት ያንስቅ ሰውነትዙ ክፍል ኣቐነውድ እዳጡመ?

¹⁷ሰውነት እጝቅ እል ኣቓን ወሸነው ኣዊስ ችጝሽጠ ዊኑ? ሰውነት እጝቅ ቀርዝ ኣቓንስ ኻርዘነው ኣዊስ ችጝሽጠ ዊኑ?

¹⁸ዊገድ ግን እደረ ጝቕም ዊደጘ ኣካላንድዛት ጝታይታቕምቱ ስፍረይል ሚድቭኩ።

¹⁹እጝቅቅ ላው ኣካል ኣቓን ሰውነት ኣዊስ ችጝሽጠ ዊኑ?

²⁰ነስየ ኣካላን ንቕፀቍ ጛይ፤ ሰውነት ግን ላው የጝ።

²¹እል ናንት፦ «ይጭስ በንዛርም» ይጠ ቸላውም፤ ኣውርም ልኵት፦ «ይጭስ በንዛርም» ይጠ ቸላውም።

²²እንዲያውም ጠጝካራን ኣየቍ ተክጝ እትለቍ ሰውነትዝቍ ኣካላንድዛይ ጭቕጘ በንዘቍ ጛይ።

²³ነቅሸቍ ተከቊ ኣካላንድዛት ጭቕጘ ኪብርዝነኵን፤ ቈሽም ኣይቭትነቍ ኣካላንድዛት ኽይስን ኣጝክቭክቭነኵን።

²⁴ይን ኣይቭታይነቍ ኣካላኒዝ ግን እንቅ በንዛውም፤ እደረ ግን ሰውነትዝቍ ኣካላንድዛት ላው ፃቭ ጋጥምጥመነውዝ ክቭር ጒድለቊ ተክጝ እትለቍ ኣካላኒዝ ኽየው ክቭር ይውኩ።

²⁵እደረ እኒንት ፃቨውድም ሰውነትዝቍ ኣካላኒዝ ማኽሊል ቲተቲተነው ችጝሺጝቀ ጛስ ጛይ እኵለ ኻስቨኻስቭሽጛንስ ማጥን የጝ።

²⁶ላው ኣካል ተሰቃይሻንድ ኣካላንድ እጝቅቅ ላብጠ ተሰቃሽጘኵ፤ ላው ኣካል ኪብራንድ ላጥ ኣካላንድም ላብጠ ዲስ ይጘኵ።

²⁷ነስየ ክትንም ክርስቶስት ሰውነት የጝ፤ ክታይተእጝቅቅም ጝሰውነቲዙቍ ኣካላን የጝ።

²⁸እደረ ምከንስ ለወትረ፣ ኻወርየታን፣ ሊጘት፣ ነቪያታን፣ ሸወት ክንሰጥ፣ ቃጥልም ታምራን ፃቨቍ፣ ቓዘነው ይውት ፃየቍ፣ ላጥድዛት እርዲየነው ይውት ፃየቍ፣ ጭሰጭሰነው ይውት ፃየቍ፣ ጝሉ ኣይንት ቋቈዝ ዊግተነው ይውት ፃየቍ እቅ ሚድቭኩ።

²⁹እጝቅመ ኻወርየታነ? እጝቅስመ ነቪያታነ? እጝቅስመ ክንሰጠ? እጝቅስመ ታምራን ፃቨቈ?

³⁰እጝቅስመ ቓዘነውዙ ይውት ፃየቈ? እጝቅስመ ጝሉ ኣይንት ቋቈዝ ዊግተቈ? እጝቅስመ ጝሉ ኣይንት ቋቈዝ ዊግሸውድየንት ቲርጕመቈ?

³¹ዊገድ ግን እጝቂስቅ ዲቈው ይውትድየንት ቐናዝርን በንጥን፤ ቈሽም እጝቂስቅ ዲቈው ጒደነድየንት ቓሊስጭር።