Read xamtanga 1ቈረንተውስት እቂዝ 14 Bible Online

1ቈረንተውስት እቂዝ 14 - xamtanga bible

1ቈረንተውስት እቂዝ 14

¹ፍቅርዙ ጒደነድየንት ቲክንክንጥን፤ መንፈሳዊ ይውትድ ኽሽም ትንቪት ዊግተነው ይውትድየንት ቐናዝርን ደምዝጥን።

²ጝሉ ኣይንት ቋቈዝ ዊግተው እጅር እደረስጚ እጅርዝ ዊግታውም፤ ምስጢር ኣቐው ዊገ መንፈስዝ ዊግተው ኣቓንስቅ ኣውማውም ተረድሻው።

³ትንቪት ዊግተው ግን እጅር ኻንፀናንስ፣ ማኽረናንስ፣ ዲብሰናንስም እጅርዝ ዊግተኵ።

⁴ጝሉ ኣይንት ቋቈዝ ዊግተው እጅር ጝቕምት ኻንፀኵ፤ ትንቪት ዊግተው እጅር ግን ማኽቨርድየንት ኻንፀኵ።

⁵ክትን እጝቅ ጝሉ ኣይንት ቋቈዝ ዊግትርናን ቀንጨ ዊኑን፤ እንዝ ሽ ግን ትንቪት ዊግትርናን ቀነኵን፤ ማኽቨርድ ኻንፅሽታንስ ጝሉ ኣይንት ቋቈዝ ዊግተው እጅር ጝዊግተውድየንት ቲርጕሚየውዝየ ጝሉ ኣይንት ቋቈዝ ዊግተዊስ ሽ ትንቪት ዊግተውድ ዲቈኵ።

⁶ነስየ ይፅንወ! ክታጐ ተጣንድ ጝሉ ኣይንት ቋቈዝ ዊግጣ ተጣን ያን ወረጘዝ የጝ ክታት ጣቅመውድ? ኽሽስ ክታት ጣቅመውድ እደረት ምስጢርድየንት ጋልፀነውድ፣ ዊንም ኣርቕትድ፣ ዊንም ትንቪት ዊግተነውድ፣ ዊንም ክንድጝድ፣ ፃቅ ተጣንድ የጝ።

⁷ርዅየ እጀቍ ድመ ይወቍ ኣቲንጥድ፣ ክራራንድ፣ ዊንም ላጥ ሙዚቀዝቍ መሰሪጥድ እኳ ጝታድመይዙ ትርጉምድ ቲትየውዝየ ጝታዚመድ ኣወሽን ኣርቕጥና?

⁸ቈሽም መለከት ኣርቕሽታው ድመዝ ዋቓን፣ ኣው ኣጭነል ሲልፍሽጣ?

⁹ክትንም እኒዝጘ የጝ፤ ክታምቸይስ ትርጕም ፃየው ቃል ፊየውዝየ፣ ክትን ዊግትርነውድየንት ኣው ኣስክስጣ? ፊግየዝ ዊግትርነቅ ኣቐነት ኣየውቀ።

¹⁰ኣልሚል ንቕፀቍ ቋቍጥ እኵ፤ ትርጕም እጀው ቋቈም እጀውም።

¹¹ነስየ ያን ላው እጅር ዊግተው ቋቈይዙ ትርጕምድየንት ኣርቒቀውዝየ ዊግተው እጅሪዝ ኣቭን ኣቐኵን፤ ጘጝም ይጭስ ኣቭን ኣቐኵ።

¹²ክትንም እኒዝጘ የጝ፤ መንፈሳዊ ይውትድየንት ቐናዝርን በንርነቅ ኣቕርነውዝየ ምከን ኻንስፅሽትጡ ይውትድ ክታጭስ ንቕፃንስ በንጥን።

¹³እንዝ ማጥን ጝሉ ኣይንት ቋቈዝ ዊግተው እጅር ዊግተውድየንት ቲርጕመነው ቸላንስ ማጥን ፃልይነ።

¹⁴ያን ጝሉ ኣይንት ቋቈዝ ፃልያንድ ይመንፈስድ ፃልየኵ፤ ይኣይምረውድ ግን ፍር እጀውም።

¹⁵እደስለ ፃቭጨ ጥውሸውድ ወረጘ የጝ? ይመንፈሲዝ ፃልይጭር፤ ይኣይምረዊዝም ቈሽ ፃልይጭር፤ ይመንፈሲዝ ዚምርጭር፤ ይኣይምረዊዝም ቈሽ ዚምርጭር።

¹⁶እኒን ኣየውዝየ፣ ክት መንፈስዝ እደረት ሚዝየንዝራንድ ክት ዊግትረው ዊገይዝ ኣቭን ኣቐው እጅር ኣወይ የጝ ክሚዝየነይዝ፦ «ኣሚን» ይጠ ቸለውድ?

¹⁷ክትመ ቐናዝር ሚዝየንዝረኵ ኣጠት፤ ላየድ ግን ኻንፅሽታውም።

¹⁸ክታእጝቅት ሽ ጝሉ ኣይንት ቋቈዝ ዊግጠር ኣቓንስቅ እደረት ሚዝየንዘኵን።

¹⁹ዊገድ ግን ምመናንድዛት ክንሳንስ ማጥን ፅቃ ሽኽ ቃላን ጝሉ ኣይንት ቋቈዝ ዊግተነው ሽ ኣኰ ቃላን ይኣይምረዊዝ ዊግጣን ቺዘኵ።

²⁰ይፅንወ! ክታኣይምረውዊዝ ኽፃናታን ኣትርነ፤ ጭቓ ዊገይዝ ኽፃናታን ኣጥን፤ ክታኣይምረዊዝ ግን ኽይርነቅ ኣጥን።

²¹ኽግዝም፦ « ‹ጝታቋጝቈድ ኣቭን ኣቐው ኽዝቭዝ፣ በድዙ ምቸዝም እን ኽዝቪዝ ድቍጭር፤ ጛይ ግን እንም ኣቕ ይት ወሻቍም› የኵ ኣደረ» ይሽት ፃፍሽኩ።

²²ኣቓንስቅም ጝሉ ኣይንት ቋቈዝ ዊግተነውድ ኣምናቍ እቂዝ ኣቐው ምልክትጚ ኣምነቊዝም ኣየው፤ ትንቪት ግን ኣምነቊዝጚ ኣምናቊዝም ኣየው።

²³ነስየ ምመናንድ እጝቅ ላብጠ ኣኽቭሽጛንድ እጝቅም ጝሉ ኣይንት ቋቈዝ ዊግትጛን፣ ክንዲየቊ ዊንም ኣምናቍ እቅም ጥውጛን፣ ጕቝርጝኵ ያቍመ?

²⁴እጝቅቅ ትንቪት ዊግትጛን ግን ኣምናው ዊንም ክንድየው እጅር ጥውሽ፣ ወሸው ቃሊዝቅ ዊቅሽትጡ፤ እጝቅዝቅም ሚርምርሽጡ።

²⁵ጝእዘኒዝ ሲውርሸው ዊገድም ጋልፅሽትጡ፤ እንዝም፦ «እማን እደረ ጛጅቅ የጝ» የው ጝግምባሪዝ ደፋሽ እደረስ ሲግድጡ።

²⁶ይፅንወ! ነስየ ፃቭነ ጥውሸውድ ወረጘ የጝ? ኣኽቭሽርናንድ ላውድ ዚምረኵ፤ ላየድ ክንሰኵ፤ ላውድ ሲውርሸው ዊገድየንት ጋልፀኵ፤ ላውድ ጝሉ ኣይንት ቋቈዝ ዊግተኵ፤ ላየድ ጝሉ ኣይንት ቋቈዝ ዊግሸውድየንት ቲርጒመኵ፤ እንቅ እጝቅ ምመናድዛት ኻንፀናንስ ኣነ።

²⁷ጝሉ ኣይንት ቋቈዝ ዊግተቍ እቅ ፅብጝሽ ሊጘ ዊንም ንቕፅጝሽ ሻቘ ኣቕጝ ቲረቲረዝ ዊግትጝነ፤ ላየድ ቈሽ ጝት ቲርጕምነ።

²⁸ቲርጕመው እጅር እጀው ኣቕሽ ግን ኣኸቨ ማኽሊስ ዝም ይጝነ፤ ጝታቕምስመ እደረስ ጭቍ ዊግትጝነ።

²⁹ትንቪት ዊግተቍ እቅ ሊጘ ዊንም ሻቘ ኣቕጝ ዊግትጝነ፤ ላጥድ ቈሽ ዊግሸውድየንት ጥጝቅቀዝ ሚርምርጝነ።

³⁰ጐየቍ እቂስ ላው እጅርዝ ላው ዊገ ጋልፅሽትሽ በውገ ዊግታ ዊነው እጅርድየን ዝም ይነ።

³¹ክታይተእጝቅቅ ክንድርናስመ በርታቕርናንስ ማጥን ቲረቲረዝ ትንቪት ዊግትርነ ቸልድርነኵ።

³²ነቪያታነ መንፈሳንድ ነቪያታኒዝ ቅምሽጘኵ።

³³እደረ ዲግተዙ ኣምላክጚ ዅውክትዙ ኣምላክም ኣየው፤ ቅዱሳን ምከንጣኒዝቅ ፃቭሽተውድም እኒዝጘ የጝ።

³⁴እቍን ኣኸቨ ማኽሊስ ዝም ይጝነ፤ ኽግድም ዊግተጘ ኣዚትጥጘጚ ዊግትጥጘ ጛጭስ ፊቅድሺየውም።

³⁵እቍን ኣርቕጥጘ በንጘው ላው ላው ዊገ ፅብሽ ጝታግልቍድዛት ጝታጝኒስ ዋቕርጝነ፤ ምላሰንድም እውነስ ኣኸቨ ማኽሊስ ዊግተነውድ ኣይቭሰው የጝ።

³⁶እደረት ቃልድ ተረውድ ክታጊስመ ውረ? ዊንስ ክታግል ጭቝመ ችጘውደ?

³⁷ኣውማው፦ «ያን ነቪይ የጝ» የው፣ ዊንም፦ «መንፈሳዊ ይውት ፃቀር የጝ» የው እጅር ፅብሽ፣ እኒን ክታጭስ ፃፈውድ ኣደረት ትዛዝ ኣቐጘ ኣርቕነ።

³⁸እኒንት ለምራው እጅር ፅብሽ ግን ጘጝም ለምርሺነ።

³⁹እንዝ ማጥን ይፅንወ! ትንቪት ዊግተነውድ ቐናዝርን በንጥን፤ ጝሉ ኣይንት ቋቈዝ ዊግተነውድም ጊግቭሽትርነ።

⁴⁰ዊገድ ግን እጝቅቅ ኣግቫቭዝመ ስረትዝ ኣነ።