Read xamtanga 1ቈረንተውስት እቂዝ 15 Bible Online

1ቈረንተውስት እቂዝ 15 - xamtanga bible

1ቈረንተውስት እቂዝ 15

¹ይፅንወ! ያን ክታጭስ ሲቭከውድየንት ክትንም ለምትርነውድየንት ቈሽም ጝዝ ፀናቕርን ችብትርነው ወንጌልድየንት ኻስቭዝጨ በነኵን።

²ያን ሲቭከው ቃልድየንት ቐናዝርን ፃይርንሽ እን ወንጌሊዝ ቓድትርንቅ፤ ኣለዝየ ግን ኣምንድርነውድ ጊነቱ የጝ።

³ያን ለምጠውድየንት እጝቂስቅ ንየ ኣቐው ዊገድየንት ክታጭስ ዲቍስኩን፤ እን ዲቍሰው ዊገድም ቅዱሳን መፃፋንድ ይጛንትጘ ክርስቶስ ይናኽጥያቲዝ ማጥን ክረጘ፣

⁴ዲቭሽተጘ፣ ቅዱሳን መፃፋኒዝ ፃፍሽተጘም ሸወትረ ግርየይዝ ክርጘይስ ጐጘ የጝ።

⁵ጝዝግረም ከይፈስ እትሉ፤ ቃፅልም ፅጭ ሊጘ ኻወርየታኒዝ እትሉ።

⁶እንዝ ግረም ኣኰ ላዝ ንየ ኣቐቍ ዚኒዝ ሊንስ እትሉ፤ ጛጊስም ንቕፀቍድ ነኳን ኣሽ ርዅየዝ እኵ፤ ላው ላውድ ግን ክርጝኩ።

⁷እንዝ ግረም ያይቈቭስ እትሉ፤ እግረም እጝቅ ኻወርየታኒዝቅ እትሉ።

⁸እጝቂስቅ ግረም ዳይዝጘ እጊጠር ይጭስ ቈሽ እትሉ።

⁹ያን እደረት ምከንሸንት ሲድሰር ዊናንስቅ ኻወርየታኒስቅ ፅጐር፣ ኻወርየ ይሽጥ ጭጝጨም ጥውጨቅ የጝ።

¹⁰ዊገድ ግን እደረት ፃገይዝ ኣመካይነትዝ ያን ነን ኣቐውድየንት ኣቕኩን፤ ይጭስም ነይሽተው ፃገድ ጊነ ኣቕ እዳቒየውም፤ እንዲያውም እጝቂስቅ ንየ ቲግየዝ ሰራጭኩን፤ ዊገድ ግን እኒንት ፃቨውድ ያን ኣቒጝቀ ይጅቅ ዘላልም ፅበው እደረት ፃገድ የጝ።

¹¹ነስየ ያንም ኣቑን ጛይ ሲቭክነውድ እኒንት የጝ፤ ክትንም ኣምንድርነውድ እኒንት የጝ።

¹²ክርስቶስ ክርጘይስ ጐጘ ሲቭክሸው ኣቐውዝየ ክታጊስ ላው ላውድ ወረጘ የነት የጝ፦ «ክርጘይስ ጐነ እጀውም» ይጘውድ?

¹³ክርጘይስ ጐነ እጀው ኣቐውዝየመ ክርስቶስም ክርጘይስ ጕየውም የነት የጝ!

¹⁴ክርስቶስ ክርጘይስ ጕየውዝየመ ይናስቭክትድ ወየ እጀው የጝ፤ ክታእምነትድም ጊነ የጝ።

¹⁵እንዝ ንየም እደረ፦ «ክርስቶስት ክርጘይስ ጒስኩ» ይን ሚዝርድናንስቅ ኻሽወጥ እደረት ሚዝረጫን ኣቕን ችጝሽንኵኑን፤ ነስየ ክረቍድ ጓቍ ኣጘውዝየ ክርስቶስትም ጒሲየውም የነት የጝ።

¹⁶ክረቍድ ክርጘይስ ጒጘውዝየ ክርስቶስም ጕየውም።

¹⁷ክርስቶስም ጕየውዝየ ክታእምነትድ ጊነቱ የጝ፤ ክትንም ነኳን ኣሽ ክታኽጥያቲጅቅ እኵርኑ የነት የጝ።

¹⁸እንም ኣቐውዝየ ክርስቶስት ኣምንጝ ክረቍድ ድዝጝኵ የነት የጝ።

¹⁹ክርስቶስት ቲስፈ ፃቭነውድ እን ኣልሚዝወ ርዅየሸንስ ጭቝ ኣቐውዝየ እጝቅ እጅሪስቅ ሽ ይን ቘይሽነቅ የጝ።

²⁰ዊገድ ግን ክርስቶስ ክረቊዝ ክርጘይስ ጐነዙ ባር ኣቕ እርግጥዝ ክርጘይስ ጕኩ።

²¹ክርጘ ላው እጅርዝጐቱ ፃቭ ተረጘ፣ ክርጘይስ ጐነም ላው እጅርዝጐቱ ፃቭ ተርኩ።

²²እቅ እጝቅ ኣዳምት ኣመካይነትዝ ክረቍ ኣጘጘ እቅ እጝቅ ክርስቶስት ኣመካይነትዝ ፅበቍ ኣጥቍ።

²³ዊገድ ግን እኒን ክርጘይስ ጐነውድ እጝቅ እጅሪዝቅ ጝቕም ጝቕምቱ ቲረይዝ ኣጡ፤ ክርስቶስ ክርጘይስ ጐነዙ ባር የጝ፤ ጝዝ ግረ ቈሽ ክርስቶስ ተራንድ ጝቍ ኣቐቍድ ጕጥቍ።

²⁴ጝዝግረ ቅምትድ፣ ስልጣንድ፣ ኻይልድ እጝቅትቅ ዲምስሳንድ ምጝግስትድም እደረስ ኣስረክቭዛንድ፣ ኣይንድ ኻትሽነ ኣጡ።

²⁵ክርስቶስ ጝፃለታንድዛትቅ ጝልኲዝ ደደነ ፃቭጢስቅ ኒግስጠ ጥውሸኵ።

²⁶ዲምስስሽተው ኻትሸነይዙ ፃለትድም ክርጘ የጝ።

²⁷ምላሰንድም፦ «እጝቅ ዊገድየንትቅ ጝልኲዝ ደደነ ፃቭኩ» ይሽት ፃፍሽኩ፤ ዊገድ ግን፦ «እጝቅ ዊገድየንት ጝልኲዝ ደደነ ፃቭኩ» ይሽታንድ እጝቅ ዊገድየንትቅ ክርስቶስት ልኲዝ ሳይል ፃቨው እደረት ቈሻውም።

²⁸እጝቅቅ ክርስቶስት ሳይል ኣቐት ግረ ዅር ቈሽ እጝቅትቅ ጝሳይል ፃቨው እደረስ ጝቕምት ቅምስጡ፤ እንም እደረ እጝቅ ዊገይዝቅ ፍፅም ንየቱ ኣቓንስ ማጥን የጝ።

²⁹ክርጘይስ ጐነው እጀው ኣቐውዝየ ክረቍ እቂዝ ማጥን ይጝ ጣምቅሸቍድ ወረጘ ፃቭጛ የጝ? ክረቍድ ጓቍ ኣጘውዝየ እቅ ውር ፃቭጥጘ ጝታማጥን ጣምቅሽጛ?

³⁰ይንስ ኣንሽ ውር ፃቭነ የጝ ዊትርቅ ኻደገል ሊቭን ፅብነውድ?

³¹ይፅንወ! ግሪ ጨቨቅ ክርጘል ችጝዘው ኻደገ ይግል ችጘኵ፤ እኒንት ዊግጠውድም ይናኣደረ ክርስቶስ እየሱስት ኣመካይነትዝ ክታግል ፃቀው ምክኸድ ደደደሸው ኣቓንስቅ የጝ።

³²እፊሰውንስ ኣረዊታኒጅቅ ጋጥመውድ እጅር ኻሰቨዊዝጘ ኣቐውዝየ ይኣርወድ ወረጘ የጝ? ክረቍድ ጓቍ ኣጘውዝየሰ፦ «ኣምር ክርነቅ ኣናንስቅ ነን ዅነ ዚነ» የቊዝጘ ኣኑን የነት ቃየው።

³³ቀርትርነ፤ «ጭቓ ፃምረ ቀሰው ኣምልድየት ጨቀኵ።»

³⁴ክታትክክለኘ እዘኒዝጐ ዋጥርጥን፤ ኽጥያትም ሰራሽትርነ፤ ክታማኽሊል ላው ላው እደረት ኣርቓቍ እቅ እኵ፤ እኒንት የውድም ክታት ኣይቭስጨ የር የጝ።

³⁵ዊገድ ግን ላው እጅር፦ «ክረቍድ ኣወይጝ የጝ ጕጘውድ? ተርጘውድስ ኣወየው ኣካልዝ የጝ?» የው ዋቕርጠ ቸለኵ።

³⁶እፈ ኻጝ እጅር ክተ! ክት ፊዝረው ዚረድ ክሪየውዝየ ርዅየ ችጛውም።

³⁷ክት ፊዝረውድ ዚርወዙ ዊንም ላየ ኣይንት ኣረዙ ዚረ የጝጚ እግረ ቢቍለው ቢቈለድም ኣየው።

³⁸እደረ ግን ፊቅደጘ ኣካል ይወኵ፤ እጝቅት ኣይንት ዚረይዝቅ ጝቕም ጝቕምቱ ኣካል ይወኵ።

³⁹ስየ እጝቅ ላው ኣይንት ኣየውም፤ እጅርዙ ስየድ ላው ኣይንት የጝ፤ እንሰሰዙ ስየድ ላየ ኣይንት የጝ፤ ዚልቂዙ ስየድ ላየ ኣይንት የጝ፤ ኻዘዙ ስየድ ቈሽ ላየ ኣይንት የጝ።

⁴⁰እኒዝጘም ሲመይትቍ ኣካላን እኵ፤ ዝቨዝቍ ኣካላንም እኵ፤ ዊገድ ግን ሲመይትቍ ኣካላኒዙ ክቭርድ ላው ኣይንት የጝ፤ ዝቨዝቍ ኣካላኒዙ ክቭርድም ላየ የጝ።

⁴¹ኰረት ክቭርድ ላው ኣይንት የጝ፤ ኣርቨት ክቭርድ ላየ የጝ፤ ፅግልውጢዙ ክቭርድ ቈሽ ላየ የጝ፤ ላው ፅግልወይዙ ክቭርድ ላየ ፅግልወይዙ ክቭሪስ ቲተኵ።

⁴²ክረቊዙ ጐነድም እኒዝጘ ኣጡ፤ ቢስብሰው ኣካል ፊተኵ፤ ቢስብሳው ኣካል ኣቕ ጐኵ።

⁴³ውርድየትዝ ፊተኵ፤ ክቭርዝ ጐኵ፤ ዝላዝ ፊተኵ፤ ኻይልዝ ጐኵ።

⁴⁴ፍጥረቱ ኣካልዝ ፊተኵ፤ መንፈሳዊ ኣካል ኣቕ ጐኵ፤ ፍጥረቱ ኣካል ፅበውዝየ መንፈሳዊ ኣካል ቈሽ እኩ።

⁴⁵እንዝ ማጥን፦ «በውረ እጅር ኣዳም ርዅየ ፃየው ኣቑ» ይሽት ፃፍሽኩ፤ እግርገቱ ኣዳምድ ግን ርዅየ ይወው መንፈስ ኣቑ።

⁴⁶ዊገድ ግን በዊል ተረውድ መንፈሳዊድ ኣቒጝቀ ፍጥረቱድ የጝ፤ እንዝ ግረ መንፈሳዊድ ተሩ።

⁴⁷በውረ እጅርድ ዝቨይስ ፋጥርሻንስቅ ዝቨይዙ የጝ፤ እግርገቱውድ ግን ሲመይስ ተረው የጝ።

⁴⁸ዝቨይስ ኣቐቍድ ዝቨይዝዊዝጘ ጛይ፤ ሲመይስ ኣቐቍድም ሲመይዝዊዝጘ ጛይ።

⁴⁹ዝቨይዙ እጅሪዝ ሚልክድ ተክነጘ፣ ሲመይቱ እጅሪዝ ሚልክድም ተክንቅ።

⁵⁰ይፅንወ! ስየዝመ ብርዝ እደረት ምጝግስትድየንት ዊርሳቍ ኣጘጘ፣ ብስብሰውድም ቢስብሳውድየንት ዊርሳው ኣቐጘ ክታጭስ ድቈኵን።

⁵¹እንወ! ላው ሚስጢር ክታጭስ ድቍጨ፦ ይን እጝቅ ክራይነቅም፤ ዊገድ ግን ይን እጝቅ ላውጥሽንቅ።

⁵²እንም ኣቐውድ ኻትሸነይዙ መለከትድ ዋቓንድ ድጝግትዝ በውዝ የጝ፤ መለከት ዋቓንድ ክረቍድ ቢስብሳቍ ኣቕጝ ጕጥቍ፤ ይንም ላውጥሽንቅ።

⁵³እኒን ቢስብሰውድየን ቢስብሳውድየንት፣ እኒን ክረውድየንም ክራውድየንት ሲርጠ ጥውሸኵ።

⁵⁴ቢስብሰውድየን ቢስብሳውድየንት፣ ክረውድየንም ክራውድየንት ሲረው ግርየይዝ፦ «ክርጘ ኻሽ ድልዝ ስርሹ» ይሽት ፃፍሽተው ቃልድ ፋፅምሽጡ።

⁵⁵እኒዝጘም፦ «ክርጘ ክተ! ክኻቕንድ ኣውል ኩ? ክርጘ ክተ! ክሲቨነውድስ ኣውል ኩ?» ይሽትኩ።

⁵⁶ክርጘይዙ ሲቨነድ ኽጥያት የጝ፤ ኽጥያቲዙ ኻይልድ ቈሽ ኽግ የጝ።

⁵⁷ዊገድ ግን ይናኣደረ እየሱስ ክርስቶስት ኣመካይነትዝ ኻቕን ነየው እደረስ ሚዝየነ ኣነ።

⁵⁸እንዝ ማጥን ቀንሽርነቅ ይፅንወ! ፀናቕርን ችብጥን፤ ኣውማው ዊገዝቅ ናውጥውጥሽትርነ፤ ኣደረት ሰቭዝ ዊትርቅ ቲጊርነውድ ጊነዝ ኣየው ኣቐጘ ኣርቕርን ቀቪጝቀ ዊትርቅ ኣደረት ሰቭድየንት ሰራሸነውዝ ቲጊጥን።