Read xamtanga 1ቈረንተውስት እቂዝ 16 Bible Online

1ቈረንተውስት እቂዝ 16 - xamtanga bible

1ቈረንተውስት እቂዝ 16

¹ቅዱሳኒዝ ኣቐው ጊንዝቭ ፊሰነዊዙ ዊገይዝቍዝ፣ ገላትየትቍ ምከንጣኒዝ ይወው ትዛዚዝጘ ክትንም ጘጝት ፃቭጥን።

²ጊንዝቭ ፊሰነውድ ያን ተጣንድ ኣቓየጘ ክታጊስ ኣውማውድቅ ጝኣቅሚዝጘ ሸወጪዙ በወትረ ግርየይዝ ፊሳ እቝርነ።

³ያን ተጣንድ ክትን ማርፅርነቍ እቂዝ ስቭዘነ ደብዳቢ ይው ክታይውትድየንት እየሩሳልየም ችጝዝጛንስ ማጥን እፃጭር።

⁴ያን ጛጅቅ ፊረነው በንዘው ተክ ይጭስ እትልሽም ይጅቅ ላብጠ ፊርጥቍ።

⁵ያን መቀደውንየቱ ፃቭ ዲቈነው እዳቐቅ ኣቓንስቅ፤ መቀደውንየ ችጘት ግረ ክታጐ ተጭር።

⁶ኣውማው ፊጠው ስፍረይዝጐቅ ይጒደነዝ በንዘውድየንት ከቭርናንስ ማጥን ክታግል ፈዊጝቀ እዳቐቅም፤ ምናልቫችም ጫረድየንት ክታጅቅ ዲቍስጭር ኣጠት።

⁷ነን እግርምጝገደዝ ዲቋንድ ዋቕርጨ በነቅም፤ ኣደረ ፊቅድሽ ንቕፀቍ ኰር ክታጅቅ ሳብጨ ቲስፈ ፃቨኵን።

⁸ዊገድ ግን በኣለኻምሳይል[3] ኣጢስ እፊሰውን ሳብጥጭር።

⁹ምላሰንድም ኽየው ሰቭዙ ሚረ ይጭስ ቢትኩ፤ ንቕፀቍ ተቃውምሸቍም እኵ።

¹⁰ጢመቲወስ ክታጐ ተርሽ ሰጋቒጝቀ ክታጅቅ ላብጠ ጐይጠ ፃቭጥን፤ ጘጝም ይጘ ኣደረት ሰቭድየንት ሰራሸው የጝ።

¹¹ኣውማውቅ ጝት ነቂነ፤ ዲግተዝ ይጐ ዋጥራንስ ከቭጥን፤ ያንም ጝዋጥርንድየንት ይናፅኒጅቅ ኣርውጣ የጝ።

¹²ይናዝን ኣብሉስት ይናፅኒጅ ኣቕ ክታጐ ተራንስ ቐናዝ ጨው ዊኑን፤ ጘጝ ግን ነን ተርጠ በኒየውም፤ ጝጭስ ሚቸው ግርየይዝ ግን ተርጡ።

¹³ነቃጥን፤ እምንትዝ ፀናጥን፤ በርታጥን፤ ጣጝክርጥንም።

¹⁴እጝቅ ፃቭርነውድየንትቅ ፍቅርዝ ፃቭጥን።

¹⁵ይፅንወ! እስጢፋነውስት በተሰቭድ ኣካየስ በውጥ ክርስትያናን ኣጘጘ ቅዱሳንድዛት ኣግልግልጥጘ ጝታቕምት ይውጘጘ ኣርቕርነኵ።

¹⁶ጛት ተከቊዝ ጛጅቅም ኣግልግለውትዝ ዝላቐቊዝቅ ኣዚትርናንስ ማጥን ኪው ሸር ጨወኵን።

¹⁷እስጢፋነውስ፣ ፈርዱናጠስ፣ ኣካይቈስታይ ይጐ ተርጛንስቅ ዲስ የርኩን፤ ምላሰንድም ክትን እንል ይጅቅ እጅርነቅ ኣቕርናስቅ ይጭስ ጒድለውድየንት ጛይ እቻዝጝኵ።

¹⁸ይመንፈሲዝመ ክታመንፈሲዝም ፈውስጝኵ፤ እንዝ ማጥን እነየቍ እቅድ ኣርቕሽትጥጘ ጥውሸኵ።

¹⁹እስየ ፅበቍ ምከንጣንድ ክታጭስ ዲግተ ኣልስጘኵ፤ ኣቂለስመ ብርስቅለስ ጝታጝኒል ፅብረይ ምከንሸንም ኪብረው ዲግተ ኣደረት ሽⶔዝ ኣልሰች።

²⁰እንል ፅበቍ ይናፅንድ እጝቅቅ ክታጭስ ዲግተ ኣልስጘኵ፤ ቀድስሽተው እምቝሽተነውዝ ክታስ ክታይ ዲምቅጭጥን።

²¹እኒን ዲግተድየንት በገዘ ይናኒዝ ፃፈርድ ያን ባውሎስ የጝ።

²²ኣደረት ቀናው ፅብሽ እፂተው ኣነ፤ ኣደረወ! ለው።

²³ኣደረ እየሱስት ፃገድ ክታጅቅ ኣነ።

²⁴ይፍቅርድ ክርስቶስ እየሱስት ኣመካይነትዝ ክታእጝቅ ጅቅ ኣነ፤ ኣሚን።