Read xamtanga 1ቈረንተውስት እቂዝ 2 Bible Online

1ቈረንተውስት እቂዝ 2 - xamtanga bible

1ቈረንተውስት እቂዝ 2

¹ይፅንወ! ያን ክታጐ ተጣንድ፣ እደረት ምስጢርድየንት[1] ረቂቅ ኣቐው ዊገዙ ቸልጘዝ፣ ዊንም ኽየው ጥቨቭዝ ጋልፅጨ ተቲቀርም።

²ምላሰንድም ክታማኽሊል ፅባ እየሱስ ክርስቶስት ኣየት ያውም ጘጝ ሚስቅልል ሲቅልሽ ክረነውድየንት ጭቝ ኣየት ላየ ኣርቓይቀጘ ዊስን ዊኑን።

³ክታጐ ተጠውድም ዝላዝመ ጐውትዝ፣ እኒዝጘም ጭቕጘ ኣምብድብድሸነውዝ ዊኑ።

⁴ይክንስኒዝመ ይስቭክቲዝ እማን ኣቐነውድ እደረ ጝመንፈሲዙ ኻይልዝ ደደደድሱጚ እቀ ጥቨቭዝመ ዊገ ኣምርዘነውዝም ዊኒየው።

⁵እንም ክታእምንትድ እቀ ጥቨቭል ኣዪጝቀ እደረት ኻይልል ሚስርትሸው ኣቓንስ የጝ።

⁶ጝታእምንቲዝ ጣጝክረቍ እቂዝ ግን ጥቨቭዙ ቃልዝ ዊግትነኵን፤ ኣነጚ ዊግትነውድ እኝቸን ኣልምሸንቱ ጥቨቭድ፣ ዊንም እኝቸን ኣልምሸንትቍ ድዝቍ ቅመቲዙ ጥቨቭድም ኣየው።

⁷ዊገድ ግን ይን ዊግትነውድ ሲውርሽ ዊነው እደረት ምስጢር ኣቐው ጥቨቭድየንት የጝ፤ እን ጥቨቭድም እደረ ዚምናኒዝ በውገ ይናክቭርዝ ማጥን ኣስለውድ የጝ።

⁸እን ኣልሚዝቍ ቅመቲስ ላውቅ እኳ እን ጥቨቭድየንት ኣርቒየውም፤ ኣርቕጝ ዊንጛንመ ክቭርዙ ኣደረድየንት ሲቅልጥጘም ዊንየቍ።

⁹ኣነጚ መፃፍዝ፦ «እል ቓልየውድየንት፣ ቀርዝ ወሺየውድየንት፣ እቀ እዘንም ኻስቪየውድየንት እደረ ጝት ቀነቊዝ ኣስልኩ» ይሽት ፃፍሽኩ።

¹⁰እደረ ግን እኒንት ጝመንፈሲዝ ኣመካይነትዝ ይናጭስ ጋልፅኩ፤ መንፈስም እደረት ጥልቅ ዊገድየንት እኳ ዳቒጝቀ እጝቅትቅ ሚርምረኵ።

¹¹ጝኣቒል ፅበው ጝቕምቱ መንፈሲዝለ እቀ ማኽሊስ ላየ እጅርዙ ኻሰቭድየንት ኣርቐው ኣው እኩ? እኒዝጘም እደረት መንፈሲዝለ፣ እደረት ኻሰቭድየንት ኣርቐው ኣውማውም እጀው።

¹²ይን እደረቲስ ኣቐው መንፈስድየንት ለምርኑንጚ ኣልሚዙ መንፈስድየንትም ለምሪነቅ፤ እንም እደረ ይናጭስ ኻርነይዝ ነየውድየንት ኣርቕናንስ ማጥን የጝ።

¹³ነስየ ይን መንፈሳዊ ዊገድየንት መንፈሳውያን እቅዝ ዊግትነውድ እጅሪስ ችጝሸው ጥቨቭዝ ኣዪጝቀ እደረት መንፈሲስ ችጝሸው ጥቨቭዝ የጝ።

¹⁴መንፈሳዊ ኣየው እጅር እደረት መንፈሲስ ኣቐው ዊገድየንት ለምረጠ ቸላውም፤ ምላሰንድም እነየው ዊገድ ጝጭስ ኻጝልት የጝ፤ እን ዊገድ ሚርምርሸውድ መንፈስዝ ኣቓንስቅ ተረድሽጠ ቸላውም።

¹⁵መንፈሳዊ እጅር ግን እጝቅ ዊገድየንትቅ ሚርምረኵ፤ ጘጝ ጝቕም ግን ኣውማውዝቅ ሚርምርሻውም።

¹⁶እንም፦ «ኣደረት እዘንድ ኣርቕጠ ቸለውድ ኣው የጝ? ጝት ማኽርጠ ቸለውድስ ኣው የጝ?» ይሽት ፃፍሸጘ የጝ፤ ይን ግን ክርስቶስት እዘን ፃይንኵኑን።