Read xamtanga 1ቈረንተውስት እቂዝ 3 Bible Online

1ቈረንተውስት እቂዝ 3 - xamtanga bible

1ቈረንተውስት እቂዝ 3

¹ይፅንወ! ክርስቶስትውዝ ገነ ኽፃናታን ኣቕርናስቅ ኣልሚዝቍ እቂዝጘ የጝጚ መንፈሳዊያኒዝጘ ፃቭ ድቍጨ ቸሊቀርም።

²ገነ ጣጝክሪርነቅ ኣቕርናንስቅ ፃቭ ኒቭሱንጚ ጣጝክረው ዅረ ዀሲቀርም፤ ነንም ኣቕሽ ገነ ጣጝክሪርነቅም።

³ነንም ገነ ኣልሚዝቍ እቂዝጘ የጝ፤ ክታማኽሊልም ቅንየዝመ ክርክርዝ እኩ፤ እደስለ እን ኣልሚዝቍ እቂዝጘ ኣቕርኑ የነት ኣየውመ? ክታሰቭድስ ኣውማው እጅርዙ ሰቪዝጘ ኣቐነት ኣየውቀ?

⁴ላውድ፦ «ያን ባውሎስቱ የጝ» ያንድ፣ ላየድ ቈሽ፦ «ያን ኣብሉስቱ የጝ» ያንድ፣ እደረት ኣርቓቍ እቂዝጘ ኣቕርኑ የነት ኣየውመ?

⁵ኣየውጚ ኣብሉስ ወረጘ የጝ? ባውሎስስ ኣሽ ወረጘ የጝ? ጛይ ኣደረ ጛጭስ ይወው ኣግልግለውቲዝጘ ሰራሸቍ ኣገልጋያን ጛይ፤ ክትንም እምንትል ተትርነውድ ጛዝ ኣመካይነትዝ የጝ።

⁶ያን ቲክሉን፤ ኣብሉስ ኣቝ ዚሱ፤ ሊጊሰውድ ግን እደረ የጝ።

⁷እንዝ ማጥን ሊጊሰው እደረ የጝጚ ቲክለውድም ኣነ ኣቝ ዚሰውድ ወረጘም ኣየው።

⁸ቲክለውም ኣነ ዚሰው እኵለ ጛይ፤ ኣውማው እጅርድቅ ጝሰቭ ጝሰቪዝጘ ጝቕምቱ ሽልማትድ ለምርጡ።

⁹ይን እደረ ጅቅ ላብጠ ሰራሽነቅ የጝ፤ ክትንም እደረት ቺዝጝ የጝ፤ እደረት ኽንፀም የጝ።

¹⁰እደረቲስ ይጭስ ነይሽተው ፃገይዝ፣ ብልኽ ግምብኘይዝጘ ሚስርት ማሉን፤ ላየድ ቈሽ ያን ማለው ሚስርቲል ገምባቐኵ፤ ዊገድ ግን ኣውማውድቅ እኒን ሚስርቲል ኣወሽ ገምባጠጘ ጣጝቅቅሽነ።

¹¹ምላሰንድም ሊን ሚስርትሸው ሚስርቲዝለ ላየ ሚስርት ሚስርትጠ ቸለው ኣውማውም እጀው፤ እን ሚስርትድም እየሱስ ክርስቶስ የጝ።

¹²ኣውማውቅ እኒን ሚስርቲል ዊርቀዝ ዊንም ቍርሸዝ፣ ኪብረው ቕርጘዝ ዊንም ቃነዝ፣ ፃቀዝ ዊንም ቓፀዝ ገምባቕሽ፣

¹³ኣውማው እጅርዙ ሰቭድ ጋልፅሽተው ፍርድዙ ግርየ ተርጡ፤ ኣይንድም ኣውማው እጅርዙ ሰቭድቅ ኣወየው ኣቐጘ ልየዝ ፊትንሽ ጋልፅሽትጡ።

¹⁴ኣውማውቅ ገምባቐው ጝሰቭድ ፀናቕሽ ጝሽልማትድየት ለምርጡ።

¹⁵ጝሰቭድ ቃጥልሸው ግምብኘድ ግን ጝሽልማትድ እዳጡ፤ ጘጝ ጝቕም ቓድሽም እኳ፣ ቓደውድ ልየይል ጥው ጭጝቅዝ ፈዊዝጘ ኣቕ የጝ።

¹⁶ክትን ክታቕም እደረት መቅደስ ጝን ኣቕርነጘ፣ እደረት መንፈስድም ክታኣቒል ፅበጘ ኣርቓይርነቅመ?

¹⁷ኣውማውቅ እደረት መቅደስ ጝንድየንት ፋዝሽ እደረ ጝት ፋዝጡ፤ ምላሰንድም እደረት መቅደስ ጝንድ ቅዱስ የጝ፤ ጘጝ መቅደስ ጝንድም ክትን የጝ።

¹⁸ኣውማውቅ ጝቕምት ኻጝሲነ፤ ክታጊስ ኣውማውቅ እን ኣልሚስ ጝቕምት፦ «ያን ጥቨቨኘ የጝ» የው ኻስቨው እጅር ፅብሽ፣ ጥቨቨድየንት ችጛንስ ማጥን ጝቕምት ኻጝ ፃቭ እግዝነ።

¹⁹እን ኣልሚዙ ጥቨቭድ እደረት በዊል ኻጝልት የጝ፤ እንም፦ «ጘጝ ጥቨቨኝጥድዛት በገዘ ጝታተንኰሊዝ ፃየኵ» ይሽት ፃፍሽጘ የጝ።

²⁰ላየ ስፍረይል ቈሽ፦ «ኣደረ ጥቨቨኝጢዙ ኻሰቭድ ጊነ ኣቐነውድ ኣርቐኵ» ይሽት ፃፍሽትኩ።

²¹እንዝ ማጥን ኣውማውቅ እጅርዝ ማክኽሺነ፤ ምላሰንድም እጝቅ ዊገድቅ ክታው የጝ።

²²ባውሎስም ኣነ ኣብሉስ ዊንም ከይፈ፣ ኣልምም ኣነ ርዅየ፣ ዊንም ክርጘ፣ ነን ፅበውድም ኣነ እግረ ተረውድ፣ እጝቅቅ ክታው የጝ።

²³ክትንም ክርስቶስትቍ የጝ፤ ክርስቶስም እደረቱ የጝ።