Read xamtanga 1ቈረንተውስት እቂዝ 4 Bible Online

1ቈረንተውስት እቂዝ 4 - xamtanga bible

1ቈረንተውስት እቂዝ 4

¹ነስየ እጅር ይናት ክርስቶስት ኣገልጋያኒዝጘዝመ እደረት ምስጢር ኽድርትኝጢዝጘዝ ፃቭ እግዝጠ ጥውሸኵ።

²ኽድር ጕይጥድም ኣምንሽተቍ ኣቕጝ ችጝሽጥጘ ጥውሸኵ።

³ይቕምት ማጥን ኣቕሽ፣ ክትን ፊርድርንሽ ዊንም ላጥ እቅ ፊርድጝሽ ግድ እጀርም፤ ያን እኳ ይቕምትል ፊርድጨ ቸለቅም።

⁴ይኽሊነድ ንፅዅ የጝ፤ እኒን ግን ይት ቀተ እጀው ፃቫውም፤ ይግል ፊርደውድ ኣደረ የጝ።

⁵እንዝ ማጥን ኣደረ ፊርደው ግርየድ ችጚጝቀ ኣውማውትልቅ ፍርድትርነ፤ ጘጝ ጥመ ኣቒል ሲውርሸውድየንት ብርኻኒዝጐ ነስጡ፤ እቀ እዘኒል ፅበው ኻሰቭድየንትም ጋልፅጡ፤ ኣይንድ ኣውማውድቅ ጝጥውሸው ሚዝየነድየንት እደረቲስ ለምርጡ።

⁶ነስየ ይፅንወ! ክታኣርወዝ የር እን ገቪዝ ያን ይቕምስመ ኣብሉስስ ተከ ፃቭ ኣልስኩን፤ እኒንትም ፃቨውድ፦ «ፃፍሸዊስ ዲቍተ» የውድ ወረጘ የነት ኣቐጘ ይናጊስ ክንድርናስ የጝ፤ እንዝ ማጥን ላው እጅርድየንት ላየይስ ዲቍስርን ቓልትርነ።

⁷ኣየውጚ! ክት ላየይስ ዲቍረር ፃቨውድ ኣው የጝ? ላየይስ ለምሪረው ክቕምቱ ኣቐው ዊገ ወረጘ እኩ? ላየይስ ለምትረው ኣቐውዝየ እደስለ ወረጘ የጝ ለምሪየዊዝጘ ማክኽሽረውድ?

⁸ነንመ ክታጭስ በንዘውድየንትቅ ችጝርንኵርኑ! ነንመ ኻፍታማን ኣቕርንኵርኑ፤ ይናትም እጀው ኒግስርንኵርኑ! እርግጥዝ ኒግስርናንመ ይንም ክታጅቅ ኒግስነ ዊኑን!

⁹እደረ ይን ጝኻወርየታንድዛት ክርጘዝ ፊርድሽጝ ጝታክረነ ስፍረይል ፊረቍ እቂዝ ማኽሊስ ኻትሸነይዝቍድ ፃቨው ተከኵ፤ ኣልሚዝቅ፣ መላካኒዝቅ፣ እቂዝቅ፣ ዋርደነ ኣቕንኵኑን።

¹⁰ይን ክርስቶስት ማጥን ይን ኻጘፃን ኣኑን፤ ክትን ግን ክርስቶስት ኣመካይነትዝ ጥቨቨኝጥ ኣቕርኑ፤ ይን ዝላቐጥ ኣኑን፤ ክትን ግን ኻይልቍ ኣቕርኑ፤ ክትን ኪብርድርነቅ ኣቕርኑ፤ ይን ግን ተዋርድሽነቅ ኣኑን።

¹¹እኝቸን ሰትሸንትል ኣሽ ግድርድነኵን፤ ዝቛንድነኵን፤ ዝባትነኵን፤ ድድብሽነኵን፤ ጝን ብን ከርተት ይነኵን።

¹²በገዘ ይናናኒዝ ሰራሽና ልቕርድነኵን፤ እፅጛንድ ጊቭርነኵን፤ ሲድስጛንድ ታግሽትነኵን።

¹³ይናሽድ ድስጛንድ ቀሰው ዊስነኵን፤ ነኳን ኣሽ ኣልሚዙ ቈሻሽ ዝቨይዙ ጂዝን ኣቕንኵኑን።

¹⁴እኒንት ፃፈውድ ቀንሽርነቅ ይቝሪዝጘ ፃቭ ማኽርጨ የርጚ ክታት ኣይቭስጨ የርም ኣየው።

¹⁵ውርም እኳ ክርስቶስትውዝ ፅቃ ሽኽዝ እጊተቍ ሚጕዝታን ፃይርነቅ ኣቕርንሽም ንቕፀቍ ኣቅል ግን እጅርነቅም፤ ምላሰንድም ያን ክርስቶስ እየሱስት ወንጌሊዝ ኣመካይነትዝ ክታይር ኣቕኩን።

¹⁶እንዝ ማጥን፦ «ይት ተክጥን» የር ጨወኵን።

¹⁷እንዝ ምላሰንዝ የጝ ኣደረትውዝ ቀንሸው፣ ኣምንሸውም ኣቐው ይዅር ጢመቲወስት ክታጐ እፃቐውድ፤ ጘጝም ያን እጝቅ ስፍረይል ፅበቍ ምመናኒዝቅ ክንሰው ክንድጚጅቅ ቲስመመው ክርስቶስ እየሱስትል ፅበው ይርዅየይዙ ፅብጘድየንት ክታጭስ ኻስቭዝጡ።

¹⁸ክታማኽሊስ ላው ላውድ ክታጐ ተጠቅ ተካ ትቪትዝ እብሽጝኵ።

¹⁹ኣነጚ ኣደረት ፍቃድ ኣቕሽ ቃልጥፍ ክታጐ ተጭር፤ ኣይንድም እንዛይ ትቪተኝጥድ ዊግትጘውድ ጭቝ ኣዪጝቀ ውር ኻይል ፃየቍ ኣጘጘም ቓልጨ በነኵን።

²⁰እደረት ምጝግስትድ ዊግተነውዙ ውላ ኣዪጝቀ እደረት ኻይልዙ ውላም የጝ።

²¹ኣየውጚ! በንርነውድ ኣውየንት የጝ? ግብመ ፃቅ ተጨ? ዊንስ ፍቅርዝመ ገርኽትዙ መንፈስዝ ተጨ?