Read xamtanga 1ቈረንተውስት እቂዝ 5 Bible Online

1ቈረንተውስት እቂዝ 5 - xamtanga bible

1ቈረንተውስት እቂዝ 5

¹እርግጥዝ ክታማኽሊል ሽርሙጥነዙ ርኵስነ ፅበጘ ጂጚተኵ፤ እነየው ርኵስነድ ኣኽዛቫኒል እኳ እጀው የጝ፤ እንም ጚርት እውነት ድወው እጅር እኩ።

²ክትን ግን ትቪትዝ እብሽርንኵርኑ፤ ኽሽስ ኻዝንትርነ ጥውሽጠ ዊኑ፤ እኒንት ሰራሸው እጅርድየንት ክታማኽሊስ ቲዝርን ፊስትርነ ጥውሻውመ?

³ውርም እኳ ስየዝ ክታጅቅ ኣይቀር ኣቓነ መንፈስዝ ግን ክታጅቅ የጝ፤ ልክ ክታጅቅ ፅበጘ ኣቕ እኒንት ፃቨው እጅሪል ይናኣደረ እየሱስ ክርስቶስት ሽዝ ነን ፊርጥኩን፤

⁴ክትን ኣኽቭሽርናንድ ያንም ይናኣደረ እየሱስት ኻይልዝ፣ ክታጅቅ መንፈስዝ ኣቓንስቅ፣

⁵ጝስየድ ድዝ ጝመንፈስድ ኣደረ ፊርድጠ ተረው ግርየይዝ ቓዳንስ ማጥን እኒን እጅርድየንት ሲጣንዝ ዲቍስርን ይውትርነ ጥውሸኵ።

⁶ክታምክኸድ ቀሰውም ኣየው፤ ዊቱ ምጨ ኽየው ምኰተድየንት ምጭሰው ኣቐጘ ኣርቓይርነቅመ?

⁷ነን ምጨ እጀው ኣቕርነጘ ኣይር ምኰተ ኣትርነ ማጥን ኣርጐው ምጨድየንት ክታጊስ እክልስጥን፤ ምላሰንድም ይናፈዝየይዙ ቢገ ኣቐው ክርስቶስ ይናጭስ ዝውሽትኩ።

⁸እንዝ ማጥን ግፍዝመ ጭቕትዝ እቻቐው ኣርጐው ምጨዝ ኣዪጝቀ ምጨ እጀው ቅንነትዝመ እማንዙ ቅጣዝ፣ በልድየንት ኪብርዝነ።

⁹ሸርሙጣኒጅቅ ተቫቭርሻይርነጘ ይደብዳቢዝ ክታጭስ ፃፍ ዊኑን።

¹⁰እኒንት ያንድም ጥቅለዝ እን ኣልሚዝቍ ሸርሙጣን፣ ዊንም ሰገቭጋቫን፣ ዊንም ናጥቀጥ፣ ዊንም ጣወት ኣምልከቊ፣ እንዛይጅቅቅ ተቫቭርሻይርነጘ የነትም ኣየው፤ እነየው ኣቓንመ ስሪስቅ እን ኣልሚስ ቲትርነ ዊንድርኑ የነት የጝ።

¹¹ዊገድ ግን ነን ክታጭስ ፃፈውድ፦ «ያን ክርስትያን የጝ» ያ ሻርሙጠው፣ ዊንም ሲግቭግቭሸው፣ ዊንም ጣወት ኣምልከው፣ ዊንም ዛሸው፣ ዊንም እራቐው፣ ዊንም ናጥቀው፣ እጅሪጅቅቅ ተቫቭርሻይረነጘ የጝ፤ እነየው እጅሪጅቅ ሚ እኳ ዅትርነ።

¹²ክርስቲያናን ኣየቍ እቂል ፊርጨ ይት ኣው ድውሱ? ክርስቲያናን ኣቐቍ እቂል ክትን ፊርዳይርነቅመ?

¹³ክርስቲያናን ኣየቍ እቂል ግን እደረ ፊርድጡ፤ ጭቓ እጅርድየንት ክታማኽሊስ እክልስጥን።