Read xamtanga 1ቈረንተውስት እቂዝ 6 Bible Online

1ቈረንተውስት እቂዝ 6 - xamtanga bible

1ቈረንተውስት እቂዝ 6

¹ክታማኽሊስ ላውድ ጝፃምረይጅቅ ፃየው ጨቅን ዊናን ቅዱሳኒዝ በዊል ኣልሰነው በር ውር ቃጥ የጝ ዲፍር ኣምናቍ እቂዝ ተፋርድሽጠ ፊረውድ?

²ቅዱሳን ኣልሚል ፊርደቍ ኣጘጘ ኣርቓይርነቅመ? ኣልሚል ፊርድርነቅ ኣነውዝየ እደስለ ቀለው ዊገይል ፊርደነውዝ በቃቓይርነቅመ?

³እኳን ኣልሚዙ ገቨዳ መላካኒል እኳ ፊርድነቅ ኣነጘ ኣርቓይርነቅመ?

⁴ኣይነስየ እነየቍ ገቪዝቍዝ ተፋርድሽትርነ በንርናንድ ምእመናኒዝ ነቅሸቍ እቅድዛት ደጝጥ ፃቭርን ጐይስጥናይ!

⁵እኒንት የውድም ክታት ኣይቭስጨ የር የጝ፤ ስሪስቅ ክታማኽሊስ ክርስትያናንድዛት ኣርቅሰነው ቸለው ኣስክሰው እጅር እጀውመ?

⁶እደስለ ክርስትያንድ ጝዝንድየንት ኪስጠ ፍርድ ጝንል ፊርጠ ጥውሸውመ? ያውም ቃል ኣምናቊ እቂዝ በዊል የጝ።

⁷ነስየ ክታማኽሊል ኪሰኪስሽተነው ፅበውዝየ ውርጘ ተዋርድሽርነጘ ቓሊሰኵ፤ ቢድልሽርናንመ ቺዛወ? ኻጝሽትርናንስመ ቺዛወ?

⁸ክትን ግን ክታቕም ቢድልድርነኵ፤ ኻጝስርነኵም፤ ያውም ቃል ክታፅንድዛት የጝ።

⁹ጭቕ እቅ እደረት ምጝግስትድ ዊርሳቍ ኣጘጘ ኣርቓይርነቅመ? እን ዊገይዝ ኻጝሽትትርነ፤ ሰሰኝጥ፣ ጣወት ኣምልከቍ፣ ሸርሙጣን፣ ግቭረ ሰደውማን፣

¹⁰ዊንም ቓፅጝ፣ ሰገቭጋቫን፣ እራቐጥ፣ ዛሸጥ፣ ቀመኝጥም እደረት ምጝስትድየንት ዊርሳቍም።

¹¹ክታጊስ ላው ላውድ እነይርነቅ ዊንድርኑ፤ ነን ግን ኣደረ እየሱስ ክርስቶስት ሽⶔዝመ ይናኣምላክት መንፈስዝ ዊር ይርንኵርኑ፤ ቀድስሽትርንኵርኑ፤ ፃድቅርንምኵርኑ።

¹²«እጝቅ ዊገድቅ ይጭስ ፊቅድሽኩ፤» ኣነጚ እጝቅቅ ጣቅማውም፦ «እጝቅቅ ይጭስ ፊቅድሽኩ፤» ኣነጚ ውረውረቅ ይግል ሳልጥናውም።

¹³ቈሽም፦ «ዅረ ጊዝውዝ በንዘው የጝ፤ ጊዝውም ዅረ በነው የጝ» እደረ ግን ጝታቪልትቅ ድስጡ፤ ሰውነት ኣደረስ የጝጚ ሽርሙጥነዝም ኣየው፤ ኣደረም ሰውነትዝ የጝ።

¹⁴እደረ ኣደረት፣ ክርጘይስ ጒሰጘ ይናትም ቈሽ ጝኻይሊዝ ክርጘስ ጒስጡ።

¹⁵ክታሰውነትድ ክርስቶስት ሰውነቲዙ ኣካል ኣቐጘ ኣርቓይርነቅመ? እደስለ ክርስቶስት ሰውነትዙ ኣካል ክፍልድየንትመ ፊስ ሸርሙጣነ ሰውነቲጅቅ ላው ፃቭጫ? እረ ጥውሻውማ!

¹⁶ዊንስ ሸርሙጠ ጅቅ ኽርየው እጅር ጝርጅቅ ላው ስየ ኣቐጘ ኣርቓይርነቅመ? ምላሰንድም፦ «ጝታቪልም ላው ስየ ኣጘኵ» ይሽትኩ።

¹⁷ዊገድ ግን ኣደረ ጅቅ ተቫቭርሸው እጅር ጝጅቅ ላው መንፈስ ኣቐኵ።

¹⁸ሽርሙጥነይስ እክልጥን፤ እጅር ላየ ኽጥያትድየንትቅ ሰራሸውድ ጝሰውነቲዝም ኣየው፤ ሻርሙጠው እጅር ግን በገዘ ጝሰውነቲል ኽጥያት ሰራሸኵ።

¹⁹ኣየውጚ ክታሰውነትድ ክታኣቒል ፅበው መንፈስ ቅዱስት መቅደስ ጝን ኣቐጘ ኣርቓይርነቅመ? እን መንፈስድም እደረቲስ ለምትርነውድ የጝ፤ ክትንም ክታቕምስ ኣይርነቅም።

²⁰ወየዝ ጅቭሽርንኵርኑ፤ እንዝ ማጥን ክታሰወነቲዝ እደረት ኪብርዝጥን።