Read xamtanga 1ቈረንተውስት እቂዝ 7 Bible Online

1ቈረንተውስት እቂዝ 7 - xamtanga bible

1ቈረንተውስት እቂዝ 7

¹ይጭስ ፃፍርነው ዊገይዝ፣ እጅር እውነት ድምቅሺጝቀ ፅባን ቀሰው የጝ፤

²ዊገድ ግን ሽርሙጥነይስ ሊሚድሸናንስ ማጥን ኣውማው እጅርድቅ ጝቕምስ እውነት ድውነ፤ ኣውማው እውነም ጝርቕምስ ግልወ ድውርነ።

³ግልወ ጝውነስ ፃቭጠ ጥውሸውድየንትቅ ፃቭነ፤ እኒዝጘም ቈሽ እውነ ጝርጕርየስ ጥውሸውድየንትቅ ፃቭርነ።

⁴እውነ ጝርሰውነትድ ጝሩ ጭቝም ኣየው፤ ጝርጕርየትውም የጝ፤ እኒዝጘም ግልወ ጝሰውነትድ ጝቕምቱ ጭቝም ኣየው፤ ጝውነትውም የጝ።

⁵ፀለውትዝ ቲግይርናንስ ማጥን ክታቪል ቲስመምርን ዊቱ ግርየዝ ኣየውዝየ ክታስ ክታይ ኪልክልሽትርነ፤ ክታቕምት ተቈጣጥርሸነ ብርን ሲጣንዝ ፊትንሻይርነጘ ዊስርን ላብጠ ኣጥን።

⁶እኒንት የውድም ግድ ትዛዝ ነየነት ኣዪጝቀ ማኽረነት የጝ።

⁷እጅር እጝቅ ይጘ እውነት ድዊጝቀ ፅባን ቀንጨ ዊኑን፤ ዊገድ ግን ኣውማው እጅር እደረቲስ ለምረው ይውት ፃይኩ፤ ላውድ ላው ኣይንት ኣቓንድ ላየድ ቈሽ ላየ ኣይንት የጝ።

⁸ግልወ ድዊየቍ እቍኒዝመ ልጀጊርዳኒዝ ግን ድዊጝቀ ይጘ ፅብጛን ጛጭስ ቀሰው የጝ የኵን።

⁹ዊገድ ግን ጝታቕምት ተቈጣጥርሸነ ብጘውዝየ ድውጝነ፤ ምላሰንድም ምርቕፀዝ ቃጥልሸነዊስ ሽ ድወነው ቺዘኵ።

¹⁰ገባሸቊዝ ግን ትዛዝ ይወኵን፤ እኒን ትዛዝድም፦ «እውነ ጝርጕርየቲስ ቲቲርነ» የው የጝ፤ እንም ኣደረቱ ትዛዝ የጝጚ ይውም ኣየው።

¹¹ቲትረውዝየ ግን ድዊጝቀ ፅብርነ፤ ዊንም ጝርጕርየ ጅቅ ኣርቅሽርነ፤ ግልወም ጝውነት ዳቕሪነ።

¹²ላጢዝ ቈሽ ዊግጨ በነው ዊገ እኩ፤ እን ዊገድም ይውጚ ኣደረትውም ኣየው፤ ኣምኒረይ እውነት ፃየው ግልወ ፅብሽ ጝውነ ጝጅቅ ላብጠ ፅብተ ፊቅድረይ ኣረውዝየ ዳቕርጠ ጥውሻውም።

¹³ኣምናው ግልወ ፃይረይ እውነ ፅብርሽ፣ ጘጝም ጝር ጅቅ ኣጠ ፊቅደው ኣቐውዝየ፣ ዳቕርተ ጥውሻውም።

¹⁴ምላሰንድም ኣምናው ግልወ ጝውነት ኣመካይነትዝ ቀድስሽትኩ፤ ኣምናይ እውነም ጝርጕርየት ኣመካይነትዝ ቀድስሽትርኵች፤ እነየው ኣየውዝየመ ክታዅልድ ርኵሳን ኣጥጘ ዊን፤ ነን ግን ቀድስሽተቍ ጛይ።

¹⁵ኣምናው እጅርድ ግን ቲትጠ በነውዝየ ቲትነ፤ ግልወም ኣነ እውነ እነየው ኣቕንዝ እፅቍሸቍም ኣየቍ፤ እደረ ይናት ጭጘውድ ዲግተዝ ፅብናንስ የጝ።

¹⁶እውነ ክተ! ክጕርየት ቓዝረር ኣርሽ ውር ኣርቕረር? ግልወ ክተ! ክውነት ቓዝረር ኣርሽ ውር ኣርቕረር?

¹⁷ኣውማው እጅርድቅ ኣደረ ዊስነጘ ኣውማውድቅም እደረ ጭጘጘ ጝዝ ፅብነ፤ ምከንጣኒዝቅ ዲጝግገውድ እኒንት የጝ።

¹⁸ላው እጅር ጭጝሸውድ ጊርዝሽተት ግረ ኣቕሽ ጊርዝሽትየው እጅሪዝጘ ኣቒነ፤ ጭጝሸውድ ጊርዝሽቲጝቀ ኣቕሽም ጊርዝሽቲነ።

¹⁹ጊርዝሽተነውም ኣነ ጊርዝሽታይነው ወየም እጀው፤ ዋነ ጣቅመው ዊገድ እደረት ትዛዝድየንት ፋፅመነውድ የጝ።

²⁰ኣውማው እጅርድቅ እደረ ጝት ጭጛንድ ዊነው ኣቕንይዝ ፀናቕ ፅብነ።

²¹ጭጝሽራንድ በረመ ዊንዱ? እንዝ ጨጝቅሽተ፤ ኻርነይ ችጝተ ቸልደውዝየ ግን ክኻርነይድ ለምጭ።

²²ምላሰንድም በረ ኣቕ ፅባ ኣደረትውዝ ጭጝሸው እጅር ኣደረትውዝ ኻርነይ ፈው የጝ፤ እኒዝጘም ጭጝሻንድ ኻርነይዝ ዊነው እጅር ክርስቶስቱ ኣገልጋይ የጝ።

²³እደረ ክታት ወየዝ ጅቭኩ፤ እንዝ ማጥን እቀ በር ኣትርነ።

²⁴ይፅንወ! ኣውማው እጅርድቅ ጭጝሻንድ ዊነው ኣቕኒዝ እደረ ጅቅ ፀናቕ ፀብነ።

²⁵ድጝግላኒዝ ኣደረቲስ ለምጠው ትዛዝም እጀር፤ ኣነጚ ኣደረት ስቝርትዝ ኣምንጨር እጅር ኣቓንስቅ ይምኽርድ ነቀኵን።

²⁶ነን ፅብነው ዚምንድ ጭቓ ኣቓንስቅ ገባሺጝቀ ዝም ይርን ፅብርናን ቀሰው ተከኵ።

²⁷ኣነጚ እውነት ድውር ፅብርሽ ዳቕረነው በንተ፤ ዲዊረር ኣርሽ ግን ድወነው በንተ።

²⁸እውነት ድውራን ኽጥያትም ሰራሺረር፤ ድጝግልሸንም ግልወ ድውራን ኽጥያትም ሰራሺረይ፤ ዊገድ ግን ገባሸቍ እቅ እን ኣልሚዙ ፅብጘይዝ ኽየው ችግርዝ ፃይሽጘኵ፤ ያንም በነውድ እኒን ችግሪስ ቓድርናንስ የጝ።

²⁹ይፅንወ! ዚምንድ እጅጝ የጝ የር ክታጭስ ድቈኵን፤ ኣቓንስቅም ነንስ ኪርምጝ እቍን ፃየቍድ እጀቊዝጘ ኣቕጝ ፅብጝነ።

³⁰ሊዘቍድ ሊዛቚዝጘ፣ ዲስ የቍድም ዲስ ያቊዝጘ ኣጝነ፤ ጐዝ ጅቨቍድም ጅቭጘቍ ጐዝድ ጝታቍ ኣየቍ ኣጘጘ እግዝጝነ።

³¹እን ኣልሚዙ ዊገይዝ ጣቅምሸውድቅ ምሉዝ ጣቅምሻዊዝጘ ኣነ፤ ምላሰንድም እን ኣልሚዙ ኣቕንድ ዲቈው የጝ።

³²ያንስ ጭጝቅት እጀው ፅብትርነ በነኵን፤ ድዊየው እጅር ኣደረት ዲስ ሽጠ ኣደረት ማጥን ኻስቨኵ።

³³ድወው እጅር ግን ጝውነት ዲስ ሽጠ እን ኣልሚዙ ዊገድየንት ኻስቨኵ።

³⁴እንዝም ጝኻሰቭድ ሊጘትል ቢትንሽኩ፤ እኒዝጘም ድዊረይ እውነ ዊንም ድጝግል ኣደረትቍዝ ኻስቨች፤ ጝርኣለመድም ስየዝመ መንፈስዝቅ ቀድስሽትር ኣደረቱ ኣቐነው የጝ፤ ድውረይ እውነ ግን ጝርጕርየት ዲስ ሽተ እን ኣልሚዙ ዊገድየንት ኻስቨች።

³⁵እኒንት የውድም ክታጭስ ጣቅመው ዊገድየንት ኻስቨነውዝ የጝጚ ክታት ጭጝቅዝጨ የርም ኣየው፤ ይኣለመድ ክታኻሰቭድ ቢትንሺጝቀ ኣደረትቍዝ ፀናቕርን ኒቭረጘ ፅብርናስ የጝ።

³⁶ላው እጅር ወግሽተይ ድጝግልሸንት ድወቅም የው ዊስነት ግረ እኒንት ፃቨነውድ ጝወገነየንስ ቀሰው ኣየው ተክ ጝጭስ እትልሽ፣ እንዝ ግረ ቈሽ ጝርት ድወነው ፍቅርድ ኻይልዳ ፊርሽ፣ ገባሸነውድም ትክክል ኣቐጘ ኣምንሽ፣ ጝበነጘ ጝርት ድዋን ኽጥያትም ኣየው፤ ገባሽጝነ።

³⁷ዊገድ ግን እን ዊገይዝ ጝእዘንድ ኣረጋግዝ ተናውጥሺጝቀ ጝቕምት ቅመነውዝ ድጝግልሸንት ድወቅም የው ዊስነው እጅርድ ቀሰው ፃቭኩ።

³⁸እንዝ ማጥን ድጝግልሸንት ድወውድ ቀሰው ፀቨኵ፤ ድዋውድም ዲቈው ፃቨኵ።

³⁹ላይ እውነ ጝርጕርየ ርዅየዝ ፅባ ጝጅቅ እፅቍሽረይ ጚ፤ ጝርጕርየ ክረውዝየ ግን ጝርበንረው ግልወድየንት ድወነው ኻርነይ ፃይረይ ጚ፤ እጅርድ ግን ኣደረት ኣምነው ኣጠ ጥውሸኵ።

⁴⁰ይጘ ኣቐውዝየ ግን ግልወ ድዊጝቀ ፅብራን ዲቈው ዲስ የች፤ ያንም ቈሽ እደረት መንፈስድ ይግል እኩ ተከኵ።