Read xamtanga 1ቈረንተውስት እቂዝ 8 Bible Online

1ቈረንተውስት እቂዝ 8 - xamtanga bible

1ቈረንተውስት እቂዝ 8

¹ጣወትዝ ሲውሽተው ስየይዝቍም እርግጥ ይን እጝቅቅ ኣርቕት ፃይነቅ የጝ፤ ኣነጚ ኣርቕት ትቪት ነሰኵ፤ ፍቅር ግን ኻንፀኵ።

²ኣርቐኵን የው እጅር ገነ ኣርቕጠ ጥውሸዊዝ ቝጠ ኣርቒየውም።

³እደረት ቀነው እጅር ግን እደረትዝ ኣርቕሽተው የጝ።

⁴ነስየ ጣወትዝ ሲውሽተው ስየ ዀነውዝቍዝ ድቍጨ በነኵን፤ ጣወት እጝቅ እን ኣልሚል ርዅየ እጀው ኣቐጘ ላው እደረትለም ላየ ኣምላክ እጀው ኣቐጘ ኣርቕነኵን።

⁵መቸም ንቕፀቍ ኣምላካንዝመ ኣደርጥዝ እኵ፤ ዊገድ ግን ሲመይዝም ኣነ ዝቨይዝቅ ኣምላካን ይሽትጝ ጭጝሸቍ ፅብጝሽም፣

⁶ይናጭስ ግን እጝቅ ዊገድየንትቅ ፋጥረው፣ ይንም ጝቍ ኣነቅ ኣይር ኣቐው ላው ኣምላክ እኩ፤ እኒዝጘም እጝቅ ዊገድቅ ጝኣመካይነትዝ ፋጥርሸው፣ ይንም ጝኣመካይነትዝ ፅብነቅ ላው ኣደረ እየሱስ ክርስቶስ እኩ።

⁷ዊገድ ግን እኒንት ኣርቐቍድ እጝቅቅም ኣየቍ፤ ላው ላው እቅ ነኳን ኣሽ ጣወት ኣምልከነው ክንድጛንስቅ እነየው ስየድየንት ዅጛንድ እርግጥ ጣወትዝ ሲውሽተው ፃቭጝ ኻስቭጘኵ፤ ጝታኽሊነድም ገነ ጣጝክሪየው ኣቓንስቅ ኣርክሽተኵ።

⁸ዊገድ ግን ዅረ ይናት እደረትል ኣልሳውም፤ ዂንሽም ጒድለው ዊገ እጀውም፤ ዅንሽም ቲርፍዝነው ዊገ ዊናውም።

⁹ኣቕሽም እኒን ክታኻርነይድ እምንትዝ ጣጝክሪየቍድዛት ፅጋሳየጘ ጣጝቅቅጭጥን።

¹⁰ክት፦ «ያን ኣርቐር የጝ» ይር ጣወትዙ ጝኒል ጐይር ዅራንድ እድየን እምንትዝ ጣጝክሪየው እጅርድየን ክት ቓላን፣ ጘጝስ ጣወትዝ ሲውሽተውድየንት ዅጠ ዲፍራውመ?

¹¹እንዝ ማጥን ክርስቶስ ጝማጥን ክረው፣ እምንትዝ ጣጝክሪየው እጅርድየን ክኣርቕቲዝ ምላሰንዝ ድዙ የነት የጝ።

¹²እንዝ ኣይንትዝ ክታፅንድዛት ቢድለነውዝ፣ እምንትዝ ጣጝክሪየው ጝታኽሊነድየንትም ልኻንዘነውዝ፣ ክርስቶስት ቢድልድርነኵ።

¹³ኣቓንስቅም ያን ዀው ዅረድ ይዝንት ፅጋሰው ኣቐውዝየ፣ ይዝንት ፅጋሳይቀጘ የር ስሪስቅ ስየ ዀቅም።