Read xamtanga 1ቈረንተውስት እቂዝ 9 Bible Online

1ቈረንተውስት እቂዝ 9 - xamtanga bible

1ቈረንተውስት እቂዝ 9

¹ያን ኻርነይ ፈር እጅር ኣይቀርመ? ኻወርየስ ኣይቀርመ? ይናኣደረ እየሱስትስ ቓሊቀርመ? ክትንስ ያን ኣደረት ኻይልዝ ሰራጭ ችጘቍ ይልቕረይዝቍ ፍር ኣይርነቀመ?

²ላጢዝ ኻወርየ ኣይቀር ኣቕሽም እኳ ክታጭስ ግን እርግጥዝ ኻወርየ የጝ፤ ምላሰንድም ያን ኣደረት ኻወርየ ኣቐነውድ ደደደድሰው ማኽተምድ ክትን የጝ።

³ይት ሚርምረቊዝ ያን ይወው ዊሰድ እኒን የጝ፦

⁴ኣየውጚ! ዀነውዝመ ዝየነውዝ መቭት እጅነቅመ?

⁵ላጥ ኻወርየታኒዝጘ፣ ኣደረት ፅንትጘ፣ ከይፈትጘም ኣምንደይ ይናውነት ፃይን ጅልወነው መቭት እጅነቅመ?

⁶ዊንስ ሰራሸነውዝ ልቕርድና ፅብነ ጥውሽነቅድ ይስመ በርናቫስስ ጭቝመ?

⁷ኣየውጚ? በገዘ ጝጊንዝቭዝ ዊተድርነይዝ ኣግልግለውድ ኣው የጝ? ወይን ቲክል ፍርድ ዃውድስ ኣው የጝ? ጊንዝቫን ሊሚዳ ጝቅሚስ ፃቭ ዝያውድስ ኣው የጝ?

⁸እኒንት ዊግጠውድ እቀ ኣስተሳሰቭዝ ጭቝመ ውረ? ኽግድስ እኒንት የኵ ኣየውቀ?

⁹ወሪትት ኽጊዝ፦ «ደሲተው ቢረድየንት ጝምቸድ ሊጕምተ» ይሽት ፃፍሽኩ፤ እደስለ እደረ እኒንት የውድ ቢረዝቍዝ ኻስቨነውዝመ?

¹⁰እኒንት ዊግተውድ እርግጥዝ ይናማጥን ኣየውቀ? ፃፍሸውድ ትክክልዝ ይናማጥን የጝ፤ ኣርሸድ ጒዘውድ፣ ደሰተድም ደሰውድ ምርቲስ ኣፍ ፃየው ኣቐጘ ቲስፈ ፃቨነውዝ የጝ።

¹¹ይን ክታጭስ መንፈሳዊ ዚረ ፊዝነቅ ኣነውዝየ እን ኣልሚዙ በረከት ክታጊስ ኣይርናን ኽየው ዊገ ኣቐነትመ?

¹²ላጥድ እን መቭትድየንት ክታጊስ ችጝጥጘ ቸልጘውዝየ ይን ጛጊስ ዲቈው ችጝነ ጥውሻውመ? ይን ግን እን መቭቲዝ ጣቅምሺነቅም፤ ኽሽስ ክርስቶስት ወንጌሊዝ ፅጋ ኣቓይነጘ እጝቅ ዊገድየንትቅ ታግሽትነኵን።

¹³መቅደስ ጝኒል ኣግልግለቍድ ጝታዅረድየንት መቅደስ ጝኒስ ችጘቍ ኣጘጘ፣ መሰውየይል ኣግልግለቍድም መስዋቲስ ኣድልሸቍ ኣጘጘ ኣርቓይርነቅመ?

¹⁴እኒዝጘም ወንጌል ሲቭከቍድ ጝታቀለቭድ እኒን ሰቪስ ለምርጛንስ ኣደረ ኣዝኩ።

¹⁵ያን ግን እንዛይ መቭታኒስ ላውድየንት እኳ ጣቅምጪቀርም፤ ነንም እኒንት ፃፈውድ እነየው ዊገ ይጭስ ፃቭትርንቅ የነው ቲስፈዝም ኣየው፤ ኣውማውቅ ይምክኸድየንት ጊነ ፃቭ እዳዛንትሽ ክጣን ቺዘኵ።

¹⁶ወንጌል ሲቭከነውድ ይት ማክኽሳውም፤ ያን ሲቭከውድ ይግድየተ ኣቓንስቅ የጝ፤ እንዲያውም ወንጌል ሲቭኪቅሽ ይጭስ ወየው።

¹⁷ይፍቃድዝ ሲቭካን ሽልማት ችጝጭር፤ ይፍቃድዝ ኣቕየውዝየ ግን ይግል ማልሽተው ኽድርድ ፉንጚ ላየ ሰራጨው ዊገም እጀው።

¹⁸እደስለ ይሽልማትድ ወረጘ የጝ? ይሽልማትድመ ወንጌል ሲቭከነውዝ ችጘው ይመቭትድየንት ጣቅምጪጝቀ ወንጌልድየንት ኻርነይዝ ሲቭከነው የጝ።

¹⁹ያን ኻርነይ ፈር እጅር የጝ፤ ኣውማውት በረም ኣይቀር፤ ዊገድ ግን ንቕፀቍድዛት ቓዝጨ ማጥን ይቕምት እጝቅ እጅርዝቅ በረ ፃቨኵን።

²⁰ኣይዅዳንድዛት ቓዝጨ ኣይዅዳኒጅቅ ኣይዅዳኒዝጘ ኣቑን፤ ያን ይቕም ኽግዝ ሳ ኣቒጝቀ ኽግዝ ሳ ፅበቍድዛት ቓዝጨ ኽግዝ ሳ ፅበቊዝጘ ኣቑን።

²¹ያን ይቕም እደረት ኽግ ፃቀር፣ ክርስቶስት ኽግዝ ቅምጨር ኣቓንም እኳ፣ ኽግ እጀቍድዛት ቓዝጨ ኽግ እጀው እጅሪዝጘ ኣቑን።

²²ጝታእምንቲዝ ጣጝክሪየቍድዛት ቓዝጨ ጛጅቅ እምንትዝ ጣጝክሪየው እጅሪዝጘ ኣቑን፤ ይቸለጘቅ ላው ላውድዛት ቓዝጨ እጝቅጅቅ እጝቅ ዊገድየንትቅ ኣቑን።

²³እኒንትቅ ፃቨውድ ወንጌሊዙ በረከቲስ ኣድልጫንስ፣ ወንጌሊዝ ማጥን የር የጝ።

²⁴ውጠዙ ውድድርድ ውጥየቍድ ንቕፀቍ ኣጛንድ፣ ሽልማትድየንት ለምረውድ ግን ላውድ ጭቝ ኣቐጘ ኣርቓይርነቅመ? እንዝ ማጥን ክትንም ሽልማት ለምትርናንስ ውጢጥን።

²⁵ውድድርዝ ኣስልሸው ኣውማው እጅር እጝቅ ዊገይዝቅ ጝቕምት ተቈጣጥርሸኵ፤ ጛይ ዲቈው፣ ድዘውም ኣቐው ኣክሊልድየንት ችጝጠ ዝላጘኵ፤ ይን ግን ዘላልምዝ ድዛው ኣክሊልድየንት ችጝነ ዝላነኵን።

²⁶እንዝ ማጥን ያን ግቭ እጀው እጅሪዝጘ ጊነዝ ውጥየቅም፤ ቈሽም ፊግየድየንት ሲጕመው እጅሪዝጘ ዝሚ ቲግልጨቅም።

²⁷ዊገድ ግን ላጢዝ ሲቭከት ግረ ያን ይቕም ውድድሪስ ሊቭ እዳቓይቀጘ ይሰውነትድየንት ጒስማ ይቕምስ ቅምሰኵን።