Read xamtanga 2ቈረንተውስት እቂዝ 10 Bible Online

2ቈረንተውስት እቂዝ 10 - xamtanga bible

2ቈረንተውስት እቂዝ 10

¹ያን ባውሎስ ክታበዊል ኣቓንድ፦ «ኣይቭተረ» ክታጊስ እክልጣንድ ግን፦ «ዲፋር» ይሽጠር ክርስቶስት የዋኽነይዝመ ገርኽነይዝ ክታት ጨወኵን።

²ያን ክታጐ ተጣንድ ኣልሚዙ ልምዲዝጘ ፅብነቅ ፃቭጝ እግዘቍ እቂዝ ድፍርትዝ ዊግጨ ዊስንኩን፤ ክትን ግን እነየው ድፍርትዝ ዊግጨ ፃቫይርነጘ ጨወኵን።

³ፅብነውድ እን ኣልሚል ኣቕሽም ተጋልድሽነውድ ግን እን ኣልሚዙ ብልኻትዝም ኣየው።

⁴ምላሰንድም ጋጥመነው ይናጠውርመሰሪድ እን ኣልሚዙም ኣየው፤ ኣነጚ ጕድቭ ዲምስሰናንስ ቸልሰው መለኰትዙ ኻይል ፃየው የጝ።

⁵እደረት ኣርቕቲል ትቪትዝ ጐው ክርክርድ፣ ጊነቱ ኻሰቭድ፣ እጝቅትቅ ፋዝነኵን፤ እጅርዙ ኣይምረውድየንትቅ መራና ክርስቶስስ ኣዚጠ ፃቭነኵን።

⁶ክታኣዚተነውድ ፋፅምሻንድ ኣዚጠቅ የነውድየንትቅ ቐፃነ ኣስልሽንኵኑን።

⁷ክትን ቓልድርነውድ ቢዘቱ ዊገድ ጭቝ የጝ፤ ኣውማውቅ ክርስቶስቱ ኣቐነዊዝ ማክኽሽሽ፣ ጘጝ እጅርድ ይንም ክርስቶስትቍ ኣነጘ ልብ ይጠ ጥውሸኵ።

⁸ኣደረ ይናጭስ ነየው ስልጣኒዝቍዝ ጭቕጘ ማክኽጫንም እኳ እንዝ ኣይቭጠቅም፤ ምላሰንድም ስልጣንድየንት ለምርነውድ ክታት ኻንፀናንስጚ ፋዝናንስም ኣየው።

⁹ክታት ይደብዳቢያኒዝ ጐውስውሰር ተኪነ።

¹⁰ላው ላውድ፦ «ባውሎስት ደብዳቢያንድ ፅጐወቍ ጠጝካራን ጛይ፤ ጘጝ ጝቕም ይናጅቅ ዊናንድ ግን ዝላቐው፣ ጝዊገድም ነቅሸው የጝ» ይጘኵ።

¹¹እኒንት የቍ እቅድዛይ ይን እክልድን ይናእፃይዝቊ ይናደብዳቢያኒዝ ዊግትነውድ፣ ክታጅቅ ፅብና ሰቭዝ ቓሊስነውድም ላው ኣቐጘ ኣስክስጥጘ ጥውሸኵ።

¹²ጝታቕምት ሚዝየንዘቊ እቂጅቅ ይናቕምት ሚድቭነ ዊንም ተከተክዝነ ዲፍራይነቅም፤ ጛይ ጝታቕምት ጝታቕምትዝ ሚዝንጛንድ ጝታቕምትም ጝታቕምጅቅ ተከተክዝጛንድ ኣስክሰነ እጀቍም።

¹³ይን ግን ልክዝ ንየ ማክኽሻይነቅም፤ ማክኽሸነውድ እደረ ይናጭስ ሚድቨው ክታግል ኣሽም ችጘው ይናኣግልግለውቲዙ ደርቸይዝ የጝ።

¹⁴ክርስቶስት ወንጌልድየንት ፃይን ክታጐ ተርናንድ ይናግስ ሚድቭሸው ኣግልግለውቲዙ ደርቸይስ ዲቊነቅም።

¹⁵ይናጭስ ሚድቭሸው ደርቸይስ ዲቍን፣ ላጥድ ዝላጘው ሰቪዙ ልኪስ ንየ ማክኽሸነውዝ ይናጭስ ሚድቭሸው ደርቸይስ ዲቋይነቅም፤ ኽሽስ ክታእምንትድ ሊግዛ ፊረው ጨቨቅ ክታማኽሊል ይናግስ ሚድቭሸው ኣግልግለውትድ ፈራቓ ፊራንስ ማጥን ቲስፈ ፃቭነኵን።

¹⁶እንዝ ማጥን ላየ እጅርዙ ክልሊል በውግስ ሰራሽተው ሰቭዝ ማክኽሺጝቀ ክታዝለ ፅበው ኻግሪል ወንጌል ሲቭክነ ቸልነኵን።

¹⁷ዊገድ ግን፦ «ኣውማው ማክኽሸውድቅ ኣደረትውዝ ማክኽሽነ»

¹⁸ምላሰንድም ኣደረ ጝቕም ሚዝየንዘውድጚ ጝቕምት ጝቕም ሚዝየንዘው እጅር ለምርሻውም።