Read xamtanga 2ቈረንተውስት እቂዝ 11 Bible Online

2ቈረንተውስት እቂዝ 11 - xamtanga bible

2ቈረንተውስት እቂዝ 11

¹ዊቱ ይኻጝልትድ ታግሽትትርነጘ ቲስፈ ፃቨኵን፤ እርግጥም ታግስሽትጥን።

²እደረት ቅንየዝ ክታጭስ ቀንየኵን፤ ምላሰንድም ላይ ንፅዅ ድንጝግል ላው ግልወል ወግሽትራንትጘ ያንም ክታት ላው ግልወል ወግስኩን፤ ጘጝም ክርስቶስ የጝ።

³ዊገድ ግን ሲቭረ ኺዋንት ተኰልዝ ቀሰጘ፣ ምናልቫች ክታእዘንድም ጨቅሽ ክርስቶስስ ፃይርነው ቅንየይዝመ ንፅኽነይስ ላውጥሻይርነጘ የር ጐውጠኵን።

⁴ምላሰንድም ላው እጅር ክታጐ ተር ይን ሲቭክነው እየሱሲስ ላየ እየሱስ ሲቭካን፣ ዊንም ለምትርነው መንፈሲስ ቲተው መንፈስ ችጝርናን፣ ዊንም ለምትርነው ወንጌሊስ ቲተው ወንጌል ችጝርናን፣ እጝቅትቅ ዝም ይርን ለምርትርንቅ የነት የጝ።

⁵ያን ግን፦ «ኽየቍ ኻወርየታን» ይሽተቊስ ውረውረዝም ፅጐቅ።

⁶ዊግተነውዙ ቸልጘ እጀር ኣቕሽም እኳ ኣርቕት ግን ፃቀር የጝ፤ እኒንትም እጝቅ ጒደነይዝቅ ጥውሻንትጘ ክታጭስ ጋልፅንኵኑን።

⁷ክትን ንየስ ይርናንስ ማጥን ይቕምት ዝጥቅ ሸር እደረት ወንጌልድየንት ወየ እጀው ክታጭስ ሲቭካንስቅ እኒን ኽጥያት ኣቕ እጊትመ ኣጢ?

⁸ክታት ኣግልግልጨ የር ላጥ ምከንጣናኒስ እርዳተ ለምጣንስቅ ጛት ዚርፍኩን።

⁹ክታጅቅም ፅባ መቀደውንየስ ተረቍ ይናፅንድ ይጭስ በንዘውድየንትቅ ነይጛንስቅ ኣውማውስም መውር ኣቒቀር፤ ኣውማው ዊገይዝቅ ክታጭስ መውር ኣቓይቀጘ ጣጝቅቅጭኩን፤ ነስየስም ጣጝቅቅጭር።

¹⁰ክርስቶስት እማንድየን ይግል ኣቐውዝየ ኣካይየ ኣውራጀይል ይምክኸድየንት ኪልክለው ኣውማውም እጀው።

¹¹እኒንት የውድ ወረጘዝ የጝ? ክታት ቀነቅ ኣቕመ? ቀነር ኣቐጘመ እደረ ኣርቐኵ።

¹²ይናጅቅ እርወ ኣጥጘ ጝታሰቪዝ ማክኽሽጛ ግርየ ሊሚደቍ እቅድዛት ምላሰን ብጥጘ ፃቨናንስ፣ ነን ፃቨውድየንት ነስየስም ፃቨኵን።

¹³እነየቍ እቅድ ክርስቶስት ኻወርየታን ተክጥጘ ጝታቕምት ላውጥውጠቍ፣ ኻሽወጥ ኻወርየታን፣ ኻጝሰጥ ሰራሸጥም ጛይ።

¹⁴እንም ዲንቅሰው ዊገም ኣየው፤ ምላሰንድም ሲጣን ጝቕም ብርኻንዙ መላክ ተክጠ ጝቕምት ላውጥውጠኵ።

¹⁵ነስየ ጝኣገልጋያንድ ፅድቅዝቍ ኣገልጋያን ተክጥጘ ጝታቕምት ላውጥውጥጛን ጊርምሰውም ኣየው፤ ጝታኻትሸነድ ጝታሰቪዝጘ ኣጡ።

¹⁶እንደ ገነም እኒንት የኵን፤ ኣውማው እጅርቅ ይት ኻጝ ፃቭ እግዚነ፤ ክትንም ይት ጘጝት እግዝርንሽ ያንም ዊቱ ማክኽጫንስ ኻጚዝጘ ፃቭርን ለምጥን።

¹⁷እኒዝጘም ይእዘን ምሉዝ ዊግጠውድ ኻጚዝጘጚ ኣደረት ፍቃዲዝጘም ኣየው።

¹⁸ንቕፀቍድ ኣልሚዙ ዊገይዝ ማክኽሸቍ ኣጛንስቅ ያንም ማክኽጨኵን።

¹⁹ክትን ብልኻን ኣቕርናንስቅ ኻጘፃንድዛት ዲስተዝ ታግሽትጥን።

²⁰ኣውማውቅ ጕ ክታት በረ ፃቫን፣ ቢዝብዛን፣ ጝኣርወዝ የው ክታግል ኣልታን፣ ክታግል ጂንንሻን፣ ዊንም ክታጋፅድ ጥፊዝ ጣዛን፣ ታግስሽትርነኵ።

²¹ኣይቭሰው ኣቓንም እኳ እንዛይ ዊቅድዛት ፃቨናንስ ጠጝካራን ኣይነቅ ኣነጘ ክታጭስ ጋልፀኵን። ዊገድ ግን ኣውማውቅ ማክኽሽጠ ዲፍርሽ ያንም ጝጘ ዲፍር ማክኽጨኵን፤ እኒንት የውድ ነንም ኻጚዝጘ ኣቕ የጝ።

²²ጛይ እቭራውያንመ? ያንም የጝ፤ ጛይ እስራየላንመ? ያንም የጝ፤ ጛይ ኣብርኻምት ዚረመ? ያንም የጝ።

²³ጛይ ክርስቶስት ኣገልጋያንመ? ጕቕረው እጅሪዝጘ ዊግጠኵን፤ ያን ጛጊስ ዲቈኵን፤ ክርስቶስት ማጥን የር ጭቕጘ ዝላቕኩን፤ ንቕፀቍ ኰር እፁጭኩን፤ ንቕፀቍ ኰር ጊርፍጭኩን፤ ንቕፀቍ ኰር ክጨ ጕ ዊኑን።

²⁴ሰውርጝን ፃይጨ፣ ሰውርጝን ፃይጨ ኣቓ ጂረፈዝ ኣኰን ጊርፍጭኩን።

²⁵ሸውን ግብዝ ድድብጭኩን፤ ሊን ቕርጘዝ ድድብጭኩን፤ ሸውን ሚርክቭዙ ኻደገ ይግል ችጙ፤ ላው ኻርዝመ ላው ጊርቀዝ ባኽርል ጭኩን።

²⁶ንቕፀቍ ኰር ፃጘነውዝ ከርተት የርኩን፤ ቈሽም ዊርቨዙ ኵረዝ ኻደገ፣ ሽፍትዙ ኻደገ ችጝኩን፤ እኒዝጘም በገዘ ይዊግኒስ ኻደገ፣ ኣኽዛቫኒስ ኻደገ፣ ኻትመይስ ኻደገ፣ ገጠሪስ ኻደገ፣ ባኽሪስ ኻደገ፣ ኻሽወጥ ዚኒስ፣ ኻደገ ችጝኩን።

²⁷ብጭቐን ልቕርጥኩን፤ ብጭቐንም ዝላቕኩን፤ ብጭቐንም ኻር ምሉ ዝምወ ብኩን፤ ግድርጥኩን፤ ዝቛንጥኩንም፤ ንቕፀቍ ኰርም ኣረ ጣሚጝቀ ፅብኩን፤ ኪብጣ ኣልቨ እጀው ኳርትምጭኩን።

²⁸ላየ ዊገድቅ እግዚጝቀ ይት ጨጝቅዘውድ ምከንጣኒዝ ማጥን ግሪ ጨቨቅ ኻሰቨነውድ ዊኑ።

²⁹ላው እጅር ዝላቓንድ ያንም ጝጅቅ ላብጠ ዝላቒቀውድ ኣውን የጝ? ላው እጅር ኽጥያትዝ ፅጋራንድ ያንም ኒድጪቀውድ ኣውን የጝ?

³⁰ማክኽሸነው በንዘውዝየ ይዝላድ ቓሊሰቍ ዊቂዝ ማክኽጨኵን።

³¹ዘላልም ሚዝየንሽተው ይናኣደረ እየሱስት ኣምላክ ኣይርም ኣቕው እደረ ኻሽዋይቀጘ ኣርቀኵ።

³²ደማስቈ ዊናንድ ኣርስጠሲወስ ይሽተው ንጕሲዝ ሳቱ ኣቐው ኽዝቭ ቅመውድ፣ ይት ፃይጠ በን ደማስቈትቍ እቅድዛት ኻትመ ሊሚድሳ ዊኑ።

³³ዊገድ ግን ግምቢዙ ምሽዅቲዝ ቅርጫትዝ ፃቭጝ ጊምዝጝ ጝናኒስ ኣምልጥዝ።