Read xamtanga 2ቈረንተውስት እቂዝ 12 Bible Online

2ቈረንተውስት እቂዝ 12 - xamtanga bible

2ቈረንተውስት እቂዝ 12

¹ማክኽሸነውዝ ችጝሸው ኣርወ እጀው ኣቕሽም ምክኸ በንዘውዝየ፣ ኣደረቲስ ለምጠው እትለይዝመ ጋልፀይዝጐ ፊጠኵን።

²ክርስቶስትውዝ ኣቐው ላው እጅር ኣርቐኵን፤ እኒን እጅርድ ፅጭ ሲዘ ምትዝ በውገ ሸወትረ ሲመይል ኣሽ ናጥቅሹ፤ ናጥቅሸውድ ስየዝ ኣጠ ስየዝ ኣየው ኣጠ ኣርቐቅም፤ እደረ ግን ኣርቐኵ።

³እነየው እጅርድየንት ኣርቐኩን፤ ዊገድ ግን ስየዝ ኣጠ ዊንም ስየዝ ኣየው ኣጠ ያን ኣርቐቅም፤ እደረ ግን ኣርቐኵ።

⁴እን እጅርድ ገነቲዝጐ ናጥቅሹ፤ ጝጊስም እቀ ምቸዝ ጋልፅጥነ ቸልሻው፣ እጅር ዊግትጠም ፊቅድሽየው ዊገ ወሹ።

⁵እነየው እጅሪዝ ማክኽጨኵን፤ ይቕምት ማጥን ግን ያን ዝላቐር ኣቐነውድጚ ማክኽጨ ጥውጨው ላየ ዊገም እጀር።

⁶ማክኽሸነው በናን እኳ ኻጚዝጘ እጊጨ ጥውጨቅም፤ ምላሰንድም ያን ዊግጠውድ እማን የጝ፤ ዊገድ ግን ኣውማውቅ ይግል ቓለዊስ ንየ፣ ይጊስም ወሸዊስ ንየ ፃቭ ይት ጊምታየጘ ማክኽሸነዊስ ቋጥቭጨኵን።

⁷ይጭስ ጋልፅሽተው ኽየው ዊገይስ ጐው ኲራይቀጘ ይስየድየንት ሲቨው ኣሚ ነይሽቱ፤ ጘጝም ይት ኣሰቃይዘው ሲጣንዙ እፃሸረ የጝ።

⁸እኒን ዊገድ ይጊስ እክልዳንስ ኣደረት ሸውን ጨዉን።

⁹ጘጝ ግን፦ «ይፃገድ ክጭስ ኣቐኵ፤ ይኻይልድ ፍፅም ኣቐውድ ክዝላይዝ የጝ» ዩ፤ እንዝ ማጥን ክርስቶስት ኻይልድ ይግል ጋልፅሽታንስ ማጥን ጭቕጘ ዲስ ያ ይዝላይዝ ማክኸጨኵን።

¹⁰ክርስቶስትቍዝ ዝላዝ፣ ዛንዝ፣ ሚከረዝ፣ ሲድሸነውዝ፣ ጭጝቅትዝም ዲስ የውድ፣ እንዝ ማጥን የጝ፤ ምላሰንድም ዝላቓንድ ኣይንድ በርታቐኵን።

¹¹ይማክኽሸነዊዝ ኻጝ ኣቕኩን፤ እንልም ኣቭቃዝርነቅድ ክትን የጝ፤ ይማጥን ሚዝርድትርነ ጥውሽርነቅድ ክትን ዊንድርኑ፤ ምላሰንድም ያን እግዘል ጥወቅ ኣቕሽም፣ ኽየቍ ኻወርየታን ይሽተቊስ ውረውረዝም ፅጐቅ።

¹²እማንተቍ ኻወርየታኒዝቍ ምልክታንድ ክታማኽሊል ፃቭሽትጝኵ፤ ጛይም ኣቕልዝ ፀናቐነው፣ ምልክታን፣ ዲንቅሰቍ ዊቅ፣ ታምራን፣ ጛይ።

¹³ክታግል መውር ኣቓይነዊዝለ ላጥ ምከንጣኒስ ወረጘዝ ፅጕርኑ? እኒን ይበደልድየንት ይቅር ይጥን።

¹⁴እንወ ነን ሸወት ክታጐ ተጨ ኣስልጭኩን፤ ተጣንድ ክታጭስ ውረውረዝቅ መውር ኣቐቅም፤ ምላሰንድም ያን ክታትጚ ክታጊስ ውረውረም በነቅ፤ ቈሽም ኣቅል ዅልዝ ጊንዝቭ ጥቅልጘኵጚ ዅል ኣቅልዝ ጊንዝቭ ጥቅላቍም።

¹⁵ያን ግን ክታማጥን ይፃቀውድየንትቅ፣ ይቕምትም ነቃን ዲስ የኵን፤ እደስለ ያን ክታት ቀነውድ እንቝጠዝ ኣቐውዝየ ክትን ዊቱዝመ ይት ቀንድርነውደ?

¹⁶ኣቐውድ ኣነጚ ክታጭስ መውር ኣቐቅም፤ ዊገድ ግን ያን ክታት ተኰልዝመ መለዝ ፃውረር ፃቭርን ተክዚጝቀ እዳቒርነቅም።

¹⁷ኣየውጚ? ክታጐ እፃቐቍ እቂዝ ምላስ ላዊስ እኳ ኻጝስ ፊሱንመ?

¹⁸ቲተው ክታጐ ተራንስ ማጥን ጨዉን፤ ይናዝንትም ጝጅቅ በርሱን፤ ቲተውስ ክታት ቢዝብዙመ? ይስመ ጝስስ ላው መንፈስዝ ዋጥርጥሪነቅመ? ይናጒደነድስ ላው ዊኒየውመ?

¹⁹ነኳን ኣሽ ክታበዊል ይናቕምት ተከላክልሽና ፅብነቅመ ተከኵ? ክርስቶስትውዝ ኣቕን እደረት በዊል ዊግትነኵን፤ ቀንሽርነቅ ይፅንወ! እኒንትቅ ፃቭነውድ ክታት ኻንፅናንስ የጝ።

²⁰ክታጐ ተጣንድ ያን ክታት በናንትጘ ኣቕርን ችጘቅ ይጭር፤ ዊንም ክትን ያን በንርናንተጘ ኣቕ ችጝጨቅ ይጭር ኣጠት የር ጐውጠኵን፤ ምናልቫች ክታማኽሊል ጐር፣ ቅንየ፣ ቍጠ፣ ጝታቕምት ቀነነው፣ ሽ ድሰነው፣ እርየ፣ ትቪት፣ ኹከትም ፅብጡመ ኣጢ የር ሰጋቐኵን።

²¹ሊጘት ተጣንድም የኣምላክ ክታበዊልመ ኣዋርዝጡኣጢ የር ጐውጠኵን፤ እንም ንቕፀቍ እቅ እንዝ ሚቅ ሰራሽጘው ኽጥያቲስ፣ ፋፅምጘው ርኵሰቲስ፣ ሽርሙጥነይስ፣ ሺኵንደነዊስም ንስኻ ጥዊጝቀ እዳቕጝ ኻዝናይቀጘ የጝ።