Read xamtanga 2ቈረንተውስት እቂዝ 13 Bible Online

2ቈረንተውስት እቂዝ 13 - xamtanga bible

2ቈረንተውስት እቂዝ 13

¹ክታጐ ተጣንድ እኒን ሸወት የጝ፦ «ኣውማው ዊገድቅ ሊጘ ዊንም ሻቘ ሚዝረጫንዝ ፀናቐኵ።»

²ሊጘት ክታግል ተጥ ዊናንድ ኽጥያት ሰራሸቊዝመ ላጢዝ ጣጝቅቅስ ዊኑን፤ ነንም እክሊል ኣቕ እንደ ገነ ጣጝቅቅሰኵን፤ ክታጐም ዋጥር ተጣንድ፣ እንዝ ሚቅ ኽጥያት ሰራሸቊዝም ኣነ ላጢዝ ኣርኽርኸቅም።

³እንም ኣቐውድ ክርስቶስ ይግል ጭ ዊግተው ኣቐጘ ማስረጀ በንርናንስቅ የጝ፤ ጘጝም ክታማኽሊል በርታቐው የጝጚ ዝላቐውም ኣየው።

⁴ሲቅልሸውድ ዝላዝ ኣቕሽም እደረት ኻይልዝ ፅበው ኣቕ ፅበኵ፤ ይን ጝዝ ዝላቐጥ ኣንሽም ክታት ኣግልግልነ ግን እደረት ኻይልዝ ጝጅቅ ፅበቍ ኣቕን ፅብነኵን።

⁵እምንትዝ ፅብርነቅ ኣቕርነጘ ኣርቕርናንስ ማጥን ክታቕምት ሚርምርጥን፤ ክታቕምትም ፊትንጥን፤ እየሱስ ክርስቶስ ክታግል እጀው ኣቐውዝየ፣ ፊተነዝ ሊቭርንዅርኑ የነት የጝ።

⁶ይን ግን ፊተነዝ ሊቪነቅ ኣነጘ ኣርቕትርነጘ ቲስፈ ፃቭነኵን።

⁷ነንም ጭቓ ዊገ ፃቫይርነጘ እደረትጐ ፃልይነኵን፤ ፃልይነውድም ይን በቃነቅ ኣነጘ እቅ ቓልጛንስም ኣየው፤ ዊገድ ግን ይን ውርም እኳ በቃነቅ ኣይነቅ ኣናነ፣ ክትን ቀሰው ኣቐው ዊገድየንት ፃቭርናስ ማጥን የጝ።

⁸ምላሰንድም እማንዝ ማጥንጚ እማንጅቅ ቲስመማው ውረውረቅ ፃቭነ ቸላይነቅም።

⁹ይን ዝላነቅ ኣቕን ክትን ግን በርታቕርነቅ ኣቕርናድ ዲስ ይነኵን፤ ይናፀለውትድም ክትን ፍፅማን ኣቕርናንስ ማጥን የጝ።

¹⁰ክታጊስ እክልጥ ፅባ እንዛይ ዊቅድዛት ፃፈውድ ክታጐ ተጣንድ ይስልጣንድ ኻይልዝ ጣቅምጫይቀጘ የር የጝ፤ ኣደረም እኒን ስልጣንድ ይጭስ ነየውድ ክታት ኻንፃንስጚ ፋዛንስም ኣየው።

¹¹ነስየ ይፅንወ! ዳኽነ ኣጥን፤ ፍፅማንም ኣጥን፤ ይምኽርድ ወጭጥን፤ ላው ኻሰቭ ፃይርነቅ ኣጥን፤ ዲግተዝ ፅብጥን፤ ፍቅርዝመ ዲግተዝ ኣምላክም ክታጅቅ ኣቐኵ።

¹²መንፈሳዊ ፍቅርዝ እምቘእምቝሽተነውዝ ክታስ ክታይ ዲምቅጭጥን።

¹³እጝቅ ቅዱሳንድቅ ክታጭስ ዲግተ ኣልስጘኵ።

¹⁴ይናኣደረ እየሱስ ክርስቶስት ፃገድ፣ እደረት ፍቅርድ፣ መንፈስ ቅዱስት ኽቭርድም ክታእጝቅ ጅቅ ኣነ።