Read xamtanga 2ቈረንተውስት እቂዝ 2 Bible Online

2ቈረንተውስት እቂዝ 2 - xamtanga bible

2ቈረንተውስት እቂዝ 2

¹ነስየ ክታት ኻዝንስጨ በኒቀር ኣቓንስቅ ክታጐ ሊጘት ተጣይቀጘ ዊስኑን።

²ያን ክታት ኻዝንሳንም እኳ፣ ያን ኻዝንሰቊ ክታዝለ ይት ዲስ ሽጠ ቸለውድ ኣው የጝ?

³እንዝ በውገ እነሽ ፃፈውድ ክታጐ ተጣንድ ይት ዲስ ሽጥጘ ጥውሸቍ እቅድ ይት ኻዝንሳይጘጘ የር የጝ፤ ምላሰንድም ይዲስተድ ክታዲስተ ኣጠጘ ተማምንጨኵን።

⁴እነሽ ክታጭስ ፃፋንድ ኽየው ኽዝንዝመ እዘንዙ ጭጝቅትዝ፣ ንቕፀቍ እርዝም የጝ፤ እንት ሸውድም ክታት ጭቕጘ ቀነር ኣቐጘ ኣርቕርናንስ ማጥንጚ ክታት ኻዝንስጨም ኣየው።

⁵ኣውማውቅ እጅር ኻዝንስሽ፣ ዊገ ኣጋንንዘነው ኣቒነጚ ኻዝንስውድ ይት ጭቝ ኣቒጝቀ ዊቱዝም ኣቕሽ ክታእጝቅትቅ የጝ።

⁶እነየው እጅርድ ክታጊስ ንቕፀቝድ ዊስንጘው ቅፃርድ ኣቐኵ።

⁷ቈሽም ልክዝ ንየ ዲቍ ኻዝን ቲስፈ ቀቫየጘ ይቅር ይትርነ፣ ዲብስትርነም ጥውሸኵ።

⁸እንዝ ማጥን ነንም ጝት ቀንድርነቅ ኣቕርነጘ ጋልፅትርነ ጨወኵን።

⁹ክታጭስ ፃፈውድም ክታት ጋጥመው ፊተነድ ተቋቍምሽርነጘ እጝቅ ዊገይዝቅም ኣዚትርነቅ ኣቕርነጘ ኣርቕጨ በን የጝ።

¹⁰ክትን ይቅር ይርነው እጅርድየንት ያንም ይቅር የርኩን፤ ይቅር የው ዊገ ፅብሽም ክርስቶስት በዊል ይቅር የውድ ክታማጥን የር የጝ።

¹¹እኒንትም ፃቭነውድ ሲጣን ጥወነ ሚረ ችጛየጘ የጝ፤ ምላሰንድም ጝኻሰቭድ ቀራይነቅም።

¹²ክርስቶስት ወንጌልድ ሲቭክጨ ጢረዋደ ትጐ ፊጣንድ ኣደረ ይጭስ ኣግልግለውትዙ ሚረ ብዝ ዊኑ።

¹³ኣነጚ ይዝን ቲተውት ጝጊስ ችጚቀር ኣቓንስቅ ይመንፈስድ ፈዊየውም፤ እንዝ ማጥንም ሲነቭጭ መቀደውንየ ትጐ ፊጡን።

¹⁴ዊገድ ግን ይናት ክርስቶስትውዝ ዊትርቅ ድል ፃቨነውዝ ጅሉዛ ቃወው፣ ጝኣርቕቲዙ ኻረድየንትም ይናኣማካይነትዝ ስፍረይልቅ ጋልፀው ኣምላክስ ሚዝየነ ኣነ።

¹⁵ምላሰንድም ይን ቓደቊዝመ ድዘቊዝ ማኽሊል እደረስ ክርስቶስት ኻረ የጝ።

¹⁶ድዘቊዝ ክርጘዝጐ ፊሰው ክርጘዙ ኻረ፣ ቓደቊዝ ቈሽ ርዅየዝጐ ፊሰው ርዅየዙ ኻረ የጝ፤ እደስለ እንዝ በቃቐውድ ኣው የጝ?

¹⁷ይንቃል ትርፍ ችጝነ ይን እደረት ቃልድየንት ሸቀጥ ዲቭልቅጛ ሻቅጠቍ ንቕፀቍ እቂዝጘም ኣይነቅ፤ ዊገድ ግን እደረቲስ እፃሸቍ እቂዝጘ ክርስቶስትውዝ ኣቕን እደረት በዊል ቅንነትዝ ዊግተነኵን።