Read xamtanga 2ቈረንተውስት እቂዝ 3 Bible Online

2ቈረንተውስት እቂዝ 3 - xamtanga bible

2ቈረንተውስት እቂዝ 3

¹እንደ ገነ ይናቕምትመ ሚዝየንዝነ ኪርምነኵን? ዊንስ ላጢዝጘ ክታጭስ ዊንም ክታጊስ ፃፍሸው ሚዝየነዙ ደብዳቢመ ይናጭስ በንዝጡ ኣጢ?

²ክትንቃል እጝቅ እጅርዝቅ ኣርቕሽርነቅ ኣንቭቭሽርነቅም ኣቕርነቅ ይናዘኒል ፃፍሽትርነቅ ይናደብዳቢያን የጝ።

³ክትን ቀለምዝ ኣይጝቀ ዘላልም ፅበው እደረት መንፈስዝ፣ ቕርጘዙ ፅላትል ኣይጝቀ እቀ እዘንዙ ፅላትል ፃፍሽትርነቅ ይናኣግልግለውቲዝም ተትርነቅ ክርስቶስት ግልፅ ደብዳቢያን የጝ።

⁴ክርስቶስት ኣመካይነትዝ እደረትል ፃይነው እምንትድ እነየው የጝ።

⁵ይናብቃትድ እደረቲስ የጝጚ ይናቕምት ብቃትዝ የጝ ይነው ላው ዊገም እጅነቅ።

⁶ኣይር ኪዳኒዝቍ ኣገልጋያን ኣናንስ ማጥን ብቃት ነየውድ ጘጝ የጝ፤ እንም ፊድልዝ ፃፍሸው ኽጊዝ ኣዪጝቀ፣ መንፈስ ቅዱስዝ የጝ፤ ፊድልዝ ፃፍሸው ኽግድ ክርጘ ነሰኵ፤ መንፈስ ቅዱስ ግን ርዅየ ይወኵ።

⁷ነስየ እስራየላንድ በውገቱዊዙ ክቭሪስ ጐው ሙሴት በውድ ትክ ይጝ ቓለነው ቸለነ ብጥጚስቅ እድየን ዊቱ ግርየዝ ግረ ዲቈው፣ ቕርጘልም ቃርፅሽተው ክርጘዙ ኣግልግለውትድ ክቭርዝ ተረው ኣቐውዝየ፣

⁸እደስለ መንፈስዙ ኣግልግለውትድ ኣወይ ዲቈው ክቭር ፃየው ኣቓው?

⁹እቅድዛት ኲንነው ኣግልግለውትድ ኪብረው ኣቐውዝየ፣ ፃድቅዘው ኣግልግለውትድሰ ኣወይ ጭቕጘ ኪብረው ኣቓው?

¹⁰እንዝ ሚቅ ኪብረው ዊነውድ ዲቈው ክቭር ፃየዊጂቅ ተወዳድርሻንድ ክቭር እጀው ኣቕኩ።

¹¹እዳቐውድ እድቝጠ ክብር ፃየው ኣቐውዝየ፣ ፀናቕ ፅበውድሰ ኣወይ ዲቈው ክቭር ፃየው ኣቓው?

¹²ነስየ እኒንት ተከው ቲስፈ ፃይነቅ ኣናንስቅ ድፍረትዝ ዊግትነኵን።

¹³ይን ድዛ ፊረው ጝበዊዙ ብርቕርቕተድ ስትጢስቅ፣ እስራየላንድ ቓላይጘጘ ጝበውድየንት ኣልቨዝ ሽፍና ዊነው ሙሴ ትጘም ኣይነቅ።

¹⁴ዊገድ ግን ኣርጐው ኪዳንድ ኣንቭቭሸው ጨቨቅ እድየን ሺፍነነድ ነኳን ኣሽ ጒሺየው ኣቓንስቅ ጝታእዘንድ ዲንዝዘጘ ፅበኵ፤ ነኳን ኣሽም ገነ ሺፍነነድ ጒሺየውም፤ ምላሰንድም ጘጝ ጒሸውድ ክርስቶስትውዝ የጝ።

¹⁵ነኳን ኣሽ ሙሴት መፃፋንድ ኣንቭቭሽጘው ጨቨቅ ሺፍነነድ ጝታዘንድየንት ሺፍነኵ።

¹⁶ዊገድ ግን ላው እጅር ኣደረ ትጐ ዋጥር ያንድ ሺፍነነድ ጝጋፂስ ጒሸኵ።

¹⁷ኣደረ መንፈስ የጝ፤ ኣደረት መንፈስድም ፅበዊል ጝግል ኻርነይ እኩ።

¹⁸ይንም እጝቅ ሺፍነነዝ ሺፍንሻው ጋፅዝ ኣደረት ክቭርድየንት መስታዊትዝጘ ብልጭልጭ ሽና፣ መንፈስ ኣቐው ኣደረት ሚልክድ ተክናስ ማጥን ክቭርዝ ዲጊል ክቭር ቈሽና ላውጥሽነኵን።