Read xamtanga 2ቈረንተውስት እቂዝ 4 Bible Online

2ቈረንተውስት እቂዝ 4 - xamtanga bible

2ቈረንተውስት እቂዝ 4

¹እንዝ ማጥን እኒን ኣግልግለውትድ ለምርነውድ እደረት ምኽርቲስ ጐው ኣቓንስቅ ቲስፈ ቀቫይነቅም።

²ዊገድ ግን ስውሪዝመ ኣይቭሰው ዊገይዝ በርንኵኑን። ኻጝሳይነቅም፤ እደረት ቃልድም ኻሽት ጅቅ ዲቭልቃይነቅም፤ ኽሽስ እማንድየንት ግልፅዝ ዊግትና እቀ ኽሊነይዝቅ ለምርሽን ችጝናንስ ማጥን ይናቕምት እደረት በዊል ኣልስነኵን።

³ይናወንጌልድ ዲቭሽተው ኣቕሽም እኳ፣ ዲቭሽተውድ ድዘቊዝ የጝ።

⁴እደረት ተከ ኣቐው ክርስቶስት ክብሪዙ ወንጌሊዝ ብርኻንድየንት ቓላይጘጘ፣ እን ኣልሚዙ ኣምላክድ ኣምናቊ እቂዙ እዘንድየንት ኻርቭዝኩ።

⁵ይን ሲቭክነውድ ክርስቶስ እየሱስ ኣደረ ኣቐነውድጚ ይናቕምትም ኣየው፤ ይን ይናቕምም እየሱስት ማጥን ይን ክታኣገልጋያን ኣቕንኵኑን።

⁶«ጥመይል ብርኻን ኣነ» የው ዊግተው እደረ፣ ክርስቶስት በዊል ኣቭርኸው እደረት ክቭርድየንት ኣርቕነ ማጥን ጝብርኻንድየንት ይናዘኒል ኣቭርኽኩ።

⁷ዊገድ ግን እኒን ጭቕጘ ኽየው ኻይልድ እደረቲስጚ ይናጊስ ኣየው ኣቐጘ ኣርቕሽታንስ፣ እኒን ኪብረው ዊገድየን ሻኽለይዝጘ ኣነቅ ይናግል እኩ።

⁸እጝቂዝቅ ይናግል ሚከረ ችጝሽም ኻሻይነቅም፤ ግራ ጥውንሽም ቲስፈ ቀቫይነቅም።

⁹ሲድሽንሽም ሊቭን እዳቓይነቅም፤ ጣዝጝ ማልጝሽም ክራይነቅም።

¹⁰እየሱስት ርዅየድ ይናሰውነቲዝ ጋልፅሽታንስ ማጥን ጝክርጘድየንት ዊትርቅ ይናሰውነቲዝ መውርን ጅልውነኵን።

¹¹ምላሰንድም እየሱስት ርዅየድ ክረው ኣቐው ይናሰየይዝ ጋልፅሽታንስ ማጥን፣ ይን ፅበቍ ኣነቅድ ዊትርቅ እየሱስት ማጥን ክርጘዝ ዲቍሽትን ይውሽትነኵን።

¹²ነስየ ይን ዊትርቅ ክርጘጅቅ ጋጥምነኵን፤ ክትን ግን ርዅየ ችጝርነኵ።

¹³«ኣምኑን እንዝ ማጥንም ዊግጡን» ይሽት ፃፍሸጘ፣ ይንም እኒን እምንትዙ መንፈሲዝ ኣምነኵን፤ እንዝ ማጥንም ዊግትነኵን።

¹⁴ምላሰንድም ኣደረ እየሱስት ክርጘይስ ጒሰው ኣምላክድ፣ ይናትም ቈሽ እየሱስ ጅቅ ጒስ ክታጅቅ ጝበዊል ኣልስጠጘ ኣርቕነኵን።

¹⁵ንቕፀቍ እቅዝ ችጘው ፃገድ እደረስ ክቭር ኣቓንስ ማጥን፣ ሚዝየነዝ ዲግልም ሚዝየነ ቈሺታንስ ማጥን እኒን እጝቅቅ ኣቐውድ ክትን ጣቅምሽርናንስ የጝ።

¹⁶እንዝ ማጥንም ቲስፈ ቀቨይነቅም፤ ቢዘይዙ ይናሰውነትድ ድዛ ፊርሽም እኳ ይናቒቱ ሰውነትድ እልት እልት ኣይር ኣቐኵ።

¹⁷ምላሰንድም ቀለው እልቱ ኣቐው ይናሚከረድ ጝት ተከው ችጝሻው ዘላልምዙ ክቭር ይናጭስ ችጚስጡ።

¹⁸እንዝ ማጥን ይናእልጣንድ ቲኵርጘውድ ቓልሽተው ዊገይል ኣይጝቀ ቓልሽታዊል የጝ፤ ቓልሽተውድ እልቱ የጝ፤ ቓልሽታውድ ግን ዘላልምዙ የጝ።