Read xamtanga 2ቈረንተውስት እቂዝ 5 Bible Online

2ቈረንተውስት እቂዝ 5 - xamtanga bible

2ቈረንተውስት እቂዝ 5

¹ይናፅበነ ኣቐው ዝቨይዙ ድጝኳንድ ፋይርሽም እቀ ናንዝ ተሲቲየው፣ ዊገድ ግን እደረቲስ ኣቐው ዘላልምዙ ጝን ሲመይል ፃይነቅ ኣነጘ ኣርቕነኵን።

²ጝግል ኣሽ ግን ሲመይቱ ይናፅበነድ ሲርነ በንና ጨጝቅሽነኵን።

³እማንዝ ጝት ሲርናንድ መጥማጥ ኣቕን ችጝሻይነቅም።

⁴እኒን ድጝኳኒል ፅብናንድ ፅጐውሽን ጭጝቅሽነኵን፤ ምላሰንድም ክረው ኣቐውድ ርዅየዝ ስርሻንስ ማጥን ሲመይቱ ይናፅበነድየንት ሲርነጚ ጊፍሽነ በናይነቅም።

⁵ይናት እኒን ኣለመይዝ ኣስለውድ እደረ የጝ፤ ተርጠ ፅበዊዝ ወዝ ኣቓንስ ማጥን ጝመንፈስድየንት ፃየነ ፃቭ ይናጭስ ነየውድም ጘጝ የጝ።

⁶እንዝ ማጥን ዊትርቅ ኣምንሽተነውዝ ፅብነኵን፤ ስየዝ ፅብናንድ ኣደረቲስ እክልድን ፅብነቅ ኣነጘ ኣርቕነዅን።

⁷ምላሰንድም ፅብነውድ እምንትዝጚ ቓለነውዝም ኣየው።

⁸ስየይስ ቲትን ኣደረ ጅቅ ፅብነ ማርፅነቅ ኣነጘ ደድሰር ኣቕ ዊግጠኵን።

⁹እንዝ ማጥን ስየዝ ፅብንሽም ዊንም ስየይስ ቲትንሽም ይናኣለመድ ጝት ዲስ ሸነው የጝ።

¹⁰ምላሰንድም ኣውማው እጅርድቅ ጝስየይዝ ሰራሸው ቀሰው ዊንም ጭቓ ሰቪዝጘ ጝወየድየንት ለምራንስ ማጥን ይን እጝቅቅ ክርስቶስት ፍርድዙ ወምበሪዝ በዊል ኣልትንቅ።

¹¹ነስየ ኣደረት ጐውተነውድ ወረጘ የነት ኣቐጘ ኣርቕነቅ ኣናንስቅ እቅ ይን ዊግትነውድየንት ለምርጥጘ ፃቭነ ልቕርድነኵን፤ ይን ኣውታይ ኣነጘ እደረት በዊል ጋልፅሽተው የጝ፤ ቈሽም ክታኽሊነይዝም ግልፅ የጝ የር ቲስፈ ፃቨኵን።

¹²እኒንት የውድ ይናቕምት ክታበዊል እንደ ገነ ሚዝየንዝናንስ የር ኣዪጝቀ ይናቍዝ ማክኽሽርናስ ማጥን እድል ነቃንስ የጝ፤ እንም ቢዘቱ እትለዊዝጚ እዘን ኣቒል ፅበው ዊገይዝ ማክኽሻቊዝ ዊሰ ይወነው ቸልድርናንስ ማጥን የጝ።

¹³ጕቝጥ ኣንሽ እደረስ ይን የጝ፤ ኣይምረው ፃይነቅ ኣንሽ ቈሽ ክታጭስ የጝ።

¹⁴ምላሰንድም ላውድ እጝቅት ቺ ክረጘ እጝቅቅም ጝጅቅ ክርጘጘ ተረድሽትናንስቅ፣ ክርስቶስት ፍቅርድ ይናት ግድ የኵ።

¹⁵ርዅየዝ ፀበቍድም ጝታማጥን ክረዊዝ ክርጘይስም ጐዊዝጚ ነስየ ጝታቕምስ ፅባይጘጘ ጘጝ እጝቅት ቺ ክሩ።

¹⁶እንዝ ማጥን ነንስ ኪርምን ኣውማውትቅ ሲየዝ ሚዝናይነቅም፤ እንዝ ሚቅ ክርስቶስት እንዝ ኣይንትዝ ኣርቕነቅ ኣንሽም እኳ ነስየ ግን እንዝ ኣይነትዝ ኣርቓይነቅም።

¹⁷እንዝ ማጥን ኣውማውቅ ክርስቶስትውዝ ኣቕሽ ኣይር ፍጥርት የጝ፤ ኣርጐው ዊገድ ዲቍኩ፤ እንወ! እጝቅቅ ኣይር ኣቕኩ።

¹⁸እጝቅቅ ኣቐውድ እደረቲስ የጝ፤ ጘጝም ክርስቶስት ኣማካይነትዝ ጝቕምጅቅ ይናት ኣርቅሱ፤ ኣርቅሰነውዙ ኣግልግለውትም ነዩ።

¹⁹ምላሰንድም እደረ ክርስቶስት ኣማካይነትዝ ኣልምድየንት ጝቕምጅቅ ኣርቅሳ ዊኑ፤ እቂዙ በደልድየንትም እግዛውም ዊኑ፤ ይናጭስም ቈሽ ኣርቅሰነው ቃል ነዩ።

²⁰እንዝ ማጥንም ይን ክርስቶስት እፃሸጥ የጝ፤ እደረም ይናኣመካይነትዝ ጝጭጝንድየንት ኣልሰኵ፤ ይንም እደረ ጅቅ ኣርቅጭጥን ይን ክርስቶስት ማጥን ክታት ጨውነኵን።

²¹ይን ክርስቶስትውዝ ኣቕን እደረት ፅድቅ ኣናንስ ማጥን፣ እደረ ኽጥያት እጀው ክርስቶስት ይናማጥን ኽጥያት ፃቩ።