Read xamtanga 2ቈረንተውስት እቂዝ 6 Bible Online

2ቈረንተውስት እቂዝ 6 - xamtanga bible

2ቈረንተውስት እቂዝ 6

¹ለምትርነው እደረት ፃገድ ጊነ ፃቫይርነጘ እደረ ጅቅ ላብጠ ሰራሽነቅ ኣነናንስቅ ክታኻደረ ይነኵን።

²ምላሰንድም ጘጝ፦ «ማርፅሽተው ሰቲዝ ክት ወጩን፤ ቓደነ ግርየይዝም ከቩን» የኵ፤ እንወ! ማርፅሽተው ሰትድ ነን የጝ፤ ቓደነ ግርየድም ነን የጝ።

³ይናኣግልግለውትድ ኒቕፍሻየጘ ኣውማውስቅ ፅጋ ኣነ በናይነቅም።

⁴ኣነጚ እጝቅ ዊገይዝቅ ይናቕምት እደረት ኣገልጋያኒዝጘ ፃቭን ኣልስነኵን፤ ኽየው ኣቕልዝ፣ ሚከረዝ፣ ችግርዝ፣ ጭጝቅትዝ፣

⁵ጊርፍሸነውዝ፣ እፁሸነውዝ፣ ኻውክሸነውዝ፣ ንቕፀው ሰቭ ሰራሸነውዝ፣ ዝምወ በነውዝ፣ ግድርደነውዝ፣

⁶ንፅኽነዝ፣ ኣርቕትዝ፣ ኣቕልዝ፣ ቀስነዝ፣ መንፈስ ቅዱስዝ፣ እማንተው ፍቅርዝ፣

⁷እማንተው ቃልዝ፣ እደረት ኻይልዝ፣ ፃግቭዝመ ለወ ናንዝ ፅድቅዙ ጠውርመስሪ ፃየነውዝ፣

⁸ክቭርዝመ ውርድየትዝ፣ ሚዝየንሽተነውዝመ ዛሽሸነውዝ፣ ፅብንኵኑን። ቈሽም እማንተቍ ኣቕን ፅብና ኻሽወጥ ይሽትንኵኑን።

⁹ኣርቕሽትነቅ ኣቕን ፅብና ኣርቕሽቲነቅ ኣቕንኵኑን፤ ክርጝኵ ይሽስትና እንወ! ርዅየዝ እኵኑን፤ ድድብሽናንም ክሪነቅም።

¹⁰ኽዝንትኝጥ ኣቕን ፅብና ዊትርቅ ዲስ ይነቅ የጝ፤ ድኽ ኣቕን ፅብና ንቕፀቍድዛት ኻፍታማን ፃቭነኵን፤ ወረውረቅ እጅነቅ ኣቕን ፅብና እጝቅቅ ይናው የጝ።

¹¹ቈረንተውስት እቅ ክታትርነ! እጝቅትቅ ግልፅዝ ድቍንኵኑን፤ ይናእዘንድየንትም ክታጭስ ወለል ሽን ብዝንኵኑን።

¹²ክታፍቅርድየንት ይናጭስ ኪልክልድርነቅድ ክትን የጝጚ ይንስ ይናፍቅርድ ክታጭስ ኪልክሊነቅም።

¹³ይቝሪዝጘ ፃቭ እኒንት ኻስቭዘኵን፤ ክትንም ጝዝ ልክ ክታእዘንድ ወለል ሽርን ይናጭስ ብዝጥን።

¹⁴ኣምናቍ እቂጅቅ ኣግቫቭ እጀው ጒደነዝ ፃምርሽትርነ፤ ፅድቅ ኣመፅጅቅ ውርት ዲምቅን ፃየው? ብርኻንስ ጥመይጅቅ ውርት ኽብር ፃየው?

¹⁵ክርስቶስስ ዳቪለውስ[1] ጅቅ ውርት ቲስመም ፃየው? ኣምነውስ ኣምናው ጅቅ ውርት ኽቭር ፃየው?

¹⁶እደረት መቅደስ ጝንድስ ጣወት ጅቅ ውርት ቲስመም ፃየው? ይንቃል ዘላልም ፅበው እደረት መቅደስ ጝን የጝ፤ እደረም፦ «ጝታጅቅ ፅብጭር፤ ጝታማኽሊልም ዋጥርጥርጭር፤ ጝታኣምላክም ኣጭር፤ ጛይም ይኽዝቭ ኣጥቍ» የው ዊግትኩ።

¹⁷ቈሽም፦ «እንዝ ማጥን ጝታማኽሊስ ፍጥን፤ ይጭስም ቲትርነቅ ኣጥን፤ የኵ ኣደረ፤ ርኵስ ኣቐው ዊገድየንትም ዳቕትርነ፤ ያንም ክታት ለምጭር።»

¹⁸«ያን ክታይር ኣጭር፤ ክትንም ግልቍ እቍን ይቝር ኣትርንቅ፤ የኵ እጝቅትቅ ቸለው ኣደረ» የው ዊግትኩ።