Read xamtanga 2ቈረንተውስት እቂዝ 7 Bible Online

2ቈረንተውስት እቂዝ 7 - xamtanga bible

2ቈረንተውስት እቂዝ 7

¹ነስየ ወደጃንወ! እኒን ቲስፈይዙ ቃልድ ፃይነቅ ኣናንስቅ ስየዝመ መንፈስዝ ኣርክሰው እጝቅ ዊገይስቅ ይናቕምት ዊር ሽነ፤ እደረትም ጐውተነውዝ ይናቅድስነድ ፍፅም ፃቭነ።

²ክታእዘንድየንት ይናጭስ ፈራዝጥን፤ ይን ኣውማውትቅ ቢድሊነቅም፤ ኣውማውትቅም ጨቅሸው ጒደነል ቃዊነቅም፤ ኣውማውትቅም ኻጝሲነቅም።

³እኒንት የውድ ክታት ኲንንጨ የርም ኣየው፤ ምላሰንድም እንዝ ሚቅ ድቈጘ ይናእዘኒል ስፍረ ፃይርንኵርኑ፤ እንዝ ማጥን ፅብንሽም ክርንሽም ላብጠ የጝ።

⁴ክታግል ፃቀው እምንትድ ኽየው የጝ፤ ክታግል ፃቀው ምክኸድም ኽየው የጝ፤ እኒዝጘም ጭቕጘ ዲብሽጥኩን፤ ይናሚከረይዝቅ ይዲስተድ ደርቸ እጀውም።

⁵መቀደውንየ ትጐ ተርነጘ እጝቅ ዊገይዝቅ ሚከረ ለምርኑንጚ ይናሰውነትድ ፈውጘ ችጚየውም፤ ቢዘይስ ጐር፣ ኣቒስ ቈሽ ጐውት ፃይን ዊኑን።

⁶ኣነጚ ኻዝነቍድዛት ዲብሰው ኣምላክ ቲተውት ተረነዝ ዲብሱ።

⁷ዲብሽትነውድም ጝተረነዊዝ ጭቝ ኣዪጝቀ፣ ክትን ጝት ዲብስርነጘ ወሽናንስቅም የጝ፤ ጘጝ ክታበኒዝቍዝ፣ ክታኽዝኒዝቍዝ፣ ይጭስም ፃይርነው ቅንየይዝቍዝ ይናጭስ ድቍኩ፤ እንዝ ማጥን ኣውንቲስቅ ዲቈው ዲስተዝ ዲስ የርኩን።

⁸ይደብዳቢዝ ክታት ኻዝንሰር ኣቕሽም እንዝ ኣኑጨቅም፤ ኣኑጭሽም እኳ ይደብዳቢድ ኻዝንሰውድ ዊቱ ግርየዝ ኣቐጘ ተረድጭኩን።

⁹ነን ግን ዲስ የርኩን፤ ይዲስተድም ክታት ኻዝንሳንስቅ ኣዪጝቀ ክታኽዝንድ ንስኻ ጥውትርነ ፃቫንስቅ የጝ፤ ምላሰንድም ክታኽዝንድ እደረት ፍቃዲዝጘ ኣቓንስቅ ይን ክታት ወረጘዝም ቢድሊነቅ።

¹⁰እደረት ፍቃዲዝጘ ኣቐው ኽዝን ቓድት ችጝሰው ንስኻል ችጝዘኵ፤ ኣኑም እጀውም፤ ኣልምዙ ኽዝን ግን ክርጘል ችጝዘኵ።

¹¹እኒን እደረት ፍቃዲዝጘ ኣቐው ኽዝንድ ኣወየው ቲግየ፣ ኣወየው ዊሰ ይወነው ቸልጘ፣ ኣወየው ቍጠ፣ ኣወየው ጐውት፣ ኣወየው በን፣ ኣወየው ቀሰው ቅንየ፣ ኣወየው ግሳፂ፣ ክታጭስ ችጝሰጘ ኣስክስጥን፤ እን ገቨይዝም ንፁኻን ኣቕርነጘ እጝቅ ዊገይዝቅ ሚዝርስርንኵርኑ።

¹²ነስየ ያን ክታጭስ ፃፈውድ ቢድለው፣ ዊንም ቢድልሸው እጅርዝቊዝም ኣየው፤ ዊገድ ግን ይናጭስ ኣወይርነቅ ኣምንሽትርነቅ ኣቕርነጘ እደረት በዊል ክታቕምት ቓልድርናንስ ማጥን የጝ።

¹³ይንም ዲብሽትነውድ እንዝ ምላሰንዝ የጝ፤ ዲብሽተነዊስም ንየ ቲተውት ዲስተይዝም ጭቕጘ ዲስ ይንኵኑን፤ ምላሰንድም ክታእጝቅቅ ጝመንፈስድየንት ፈውስርንኵርኑ።

¹⁴ያን ክታግል ፃቀው ምክኸድየንት ጝጭስ ድቍ ዊኑን፤ ክትንም ይት ኣይቭሲርነቅም፤ ዊገድ ግን ያን ክታጭስ ድቋ ዊነውድቅ እማን ኣቐጘ፣ እኒዝጘም ክታማጥን ቲተውስ ምክኸዝ ድቍነውድቅ እማን ኣቐጘ ደደደድሽትኩ።

¹⁵ጘጝም ጐውትዝመ ቀጥቀጥ የነውዝ ኣወሽርን ጝት ለምትርነጘ ክታእጝቅቅም ኣዚትርነጘ ትዝ ያንድ፣ ክታጭስ ፃየው ፍቅርድ ጭቕጘ ኽያ ፊሩ።

¹⁶ያንም ኣውማው ዊገይዝቅ ክታግዝ ተማምንጭጨ ቸላንስቅ ዲስ የርኩን።