Read xamtanga 2ቈረንተውስት እቂዝ 8 Bible Online

2ቈረንተውስት እቂዝ 8 - xamtanga bible

2ቈረንተውስት እቂዝ 8

¹ይፅንወ! እደረ መቀደውንየ ፅበቊ ምከንጣኒዝ ይወው ፃገድ ኣርቕትርነ በነኵን።

²ጛግል ችጘው ሚከረድ ንቕፀው ኣቕሽም እኳ ጝታዲስተድ ግን ጭቕጘ ኽየው ዊኑ፤ ጭቕጘ ድኽ ኣጝሽም ጝታልግስነድ ግን ጭቕጘ ንቕፀው ዊኑ።

³ጝታኣቅሚዝጘ ጭቝ ኣይጝቀ ጝታኣቅሚዝም ንየ ፊቅድጝ ይውጘጘ ያን ሚዘርጠኵን።

⁴ቅዱሳንድዛት እርዲ የነዊዙ ኣግልግለውቲዝ ጛይም ተሳትፍሸነው እድል ችጝጥጘ ይናት ጭቕጘ ጨውጛ ዊን።

⁵ይን ኻሊነዊዝ ንየ፣ በውገ ጝታቕምት ኣደረስ ይው፤ እንደ ገነም ቈሽ እደረት ፍቃድዝ ጝታቕምት ይናጭስ ነይ።

⁶እንዝ ማጥን ቲተው ክታማኽሊል እንዝ ሚቅ ኪርመው ልግስነዙ ሰቭድ ደዪል ችጝዛንስ ማጥን ጨውኑን።

⁷ክትንም እጝቅ ዊገይዝቅ የነትም እምንትዝ፣ ዊግተነውዝ፣ ኣርቕትዝ፣ ፍፅም ኣቐው ቲግየዝ፣ ይናጭስ ፃይርነው ፍቅርዝም ኽይርን ችጝሽርነጘ፣ እኒን ልግስነዙ ሰቪይዝም ኽይርን ችጝሽርናንስ ማጥን ክታኻደረ ይነኵን።

⁸እኒንት የውድ ክታት ኣዝጨ የርም ኣየው፤ ዊገድ ግን ላጥ እቅድ ቓሊስጘው ቲግየድ ክታቲግየይጅቅ ኣወዳድርዘነውዝ ክታፍቅሪዙ እማንተውነይድ ደደደድስጨ የር የጝ።

⁹ምላሰንድም ይናኣደረ እየሱስ ክርስቶስት ፃገድ ኣርቕርነኵ፤ ጝድኽቲዝ ክትን ኻፍታማን ኣትርነ ማጥን ጘጝ ኻፍታም ኣቕ ፅባ ክታማጥን ድኻ ኣቑ።

¹⁰እን ዊገይዝቍዝ ክታጭስ ቀሰው ኣቐው ይምኽርድ ነቅጨ በነኵን፤ እቝመ ይወነውዝ ጭቝ ኣይጝቀ ይውትርነ ኻስቨነውዝም በውጥ ዊንድርኑ።

¹¹ነንም ይውትርነ ፃይርን ዊንድርነው ቀሰው ፍቃድድ እርውዳንስ ማጥን ኪርምርነው ሰቭድየንት ክታኣቅሚዝጘ ፋፅምጥን።

¹²ይውናንስ ቀሰው ፍቃድ ፃይነውዝየ፣ ይውትድ ለምርን ችጘውድ ፃይነዊዝ ቝጠ ይውናንድ የጝጚ እጅነዊዝ ቝጠ ይውነ ሚዅርናንድም ኣየው።

¹³እኒንት ይነውድ ክትን ችግርሽርን ላጥድ ጣቅምሽጛንስ ኣዪጝቀ ክትን እጝቅም እርወ ኣቕርናንስ ማጥን የጝ።

¹⁴ነንቱ ግርየይዝ ክታትርፍድ ጝታጕድልትድየንት እቻዘኵ፤ ጝታውድም ቈሽ ጝቲረይዝ ክታጕድልትድየንት እቻዝጡ፤ እንዝ ኣይንትዝም ፃይርነውድየንት እርወ ኣድልሽርነኵ።

¹⁵እንም፦ «ኒቒስ ሲስቨውድ ቲርፍዝየውም፤ ፅጕስ ሲስቨውድም ግትዚየውም» ይሽት ፃፍሸጘ የጝ።

¹⁶ያን ክታጭስ ኻስቫንትጘ ቲተውትም ክታጭስ ኻስቭጠ ፃቨው ኣምላክ ሚዝየንሽተው ኣነ።

¹⁷ምላሰንድም ቲተው ክታጐ ተረውድ ኽየው ዲስተዝ ጝውድየተዝ የጝጚ ይናጨውንድ ለምረነውዝ ጭቝም ኣየው።

¹⁸ጝጅቅም ወንጌል ስቭክነውዝ ምእመናኒዝቅ ሚዝየንሽተው ይናዝንድየንት እፃቕንኵኑን።

¹⁹እንዝ ንየም ይውትድ ፊስናንድ ይናጅቅ ፊራንስ ማጥን ምከንጣኒዝ ማርፅሽቱ፤ ይውትድየንት ፊስነውድም ኣደረት ጝቕምት ኪብርዝነ፣ ላጥድም እርዲ ይነ ፃይነው ቀሰው ፍቃዲስ ጐው የጝ።

²⁰እኒን ይን እርውዝነው ልግስነዙ ሰቪስ ላው ኻቨረ ዊገቅ ይናጊስ ችጝሻየጘ ጣጝቅቅሽነኵን።

²¹ምላሰንድም ይናኣለመድ ኣደረት በዊል ጭቝ ኣዪጝቀ፣ እቀ በዊልም ቀሰው ኣቐው ዊገድየንት ፃቨነው የጝ።

²²ቈሽም ንቕፀቍ ኰር ፊትንሽ ትጉ ኣቕ ችጝሸው ይናዝንት ጝታጅቅ እፃቕንኵኑን፤ ጘጝም ክታጭስ ጭቕጘ ኣምንሽተነዊስ ጐው ኣውንቲስሽ ነን ጭቕጘ ቲግያ የጝ።

²³ቲተውት ማጥን ኣርቕትርነ በንርው ዊገ ፅብሽ፣ ጘጝ ክታት ኣግልግልጠ ይጅቅ ሰራሸው ይፃምረ የጝ፤ ይናፅኒዝቍዝ ኣርቕትርነ በንርነው ዊገ ፅብሽ፣ ጛይ ምከንጣኒዝ ወኪላን፣ ክርስቶስት ክቭርም ጛይ።

²⁴እንዝ ማጥን ክታፍቅርድ እማንተው ኣቐነውድ ይንም ክታት ኣወይን ኣምነቅ ኣቐነውድ ምከንጣኒዝ በዊል ጛጭስ ጋልፅጥን።