Read xamtanga 2ቈረንተውስት እቂዝ 9 Bible Online

2ቈረንተውስት እቂዝ 9 - xamtanga bible

2ቈረንተውስት እቂዝ 9

¹ቅዱሳኒዝ ፃቭሽተው ኣግልግለውትዝ ማጥን ክታጭስ ፃፍጨ በንዛውም።

²ምላሰንድም ላጥድዛት እርዲ ይትርነ ኣስልሽርነጘ ኣርቐኵን፤ እቝመ ኪርምርን ክትን ኣካይየ ፅብርነቅድ፣ ላጥድዛት እርዲ ይትርነ ኣስልሽርነቅ ኣቕርነጘ መቀደውንየት እቂዝ ይምቸድ እቻዝ ዊግጥኩን፤ ክታቲግየድ ንቕፀቍድዛት ይውጥጘ ጒሰጕስኩ።

³ነስየ እን ዊገይዝ ክታግል ፃቀው ምክኸድ ጊነ ኣቕ እዳቓየጘ፣ በውርስ ክታማጥን ዊግጠጘ ኣስልሽርን ችጝሽርናንስ ማጥን እንዛይ ይፅንድዛት እፃቕኩን።

⁴ምናልቫች መቀደውንየት እቅ ይጅቅ ተርጝ ክትን ኣስልሺጝቀ ችጛን፣ ክትን ጭቝ ኣዪጝቀ ኣይቭትርነቅድ ይንም ክታግል ፃይነው እድቝጠ ምክኸይዝቊዝ ኣይቭትነኵን።

⁵እንዝ ማጥን ይናፅንድ በውርስጝ ክታጐ ተርጛንስመ እንዝ ሚቅ ይውትርነ ቃል ጥውርነው ይውትድየንት ኣስልድርን ሊምድርናንስ ማጥን፣ ጛት ክታጐ እፃቐነው በንዘው ኣቕ ችጝንኵኑን፤ እንዝ ኣይንትዝ ልግስነዝ ይውትርነ ኻስቭርነው ዊገድ ግድዝ ኣዪጝቀ ውድየተዝ ሚስርትሸው ኣቐኵ።

⁶«ዊትቍ ፊዘውድ ዊትቍ ኣይረኵ፤ ኒቒስ ፊዘውድ ኒቒስ ኣይረኵ» የውድየንት ትዝ ይጥን።

⁷ኣውማው እጅር ቅር ያው ዊንም ግድዝ ኣዪጝቀ ጝዘኒዝ ኻስቨዊዝ ቝጠ ይውነ፤ ምላሰንድም እደረ ዲስተዝ ይወው እጅርድየንት ቀነኵ።

⁸ዊትርቅ እጝቅ ዊገዝ ክታጭስ በንዘውድየንትቅ ችጝርን ቀሰው ሰቪዝቅ ቲርፍርናስ ማጥን እደረ ጝእኵረድ ኒቒስጠ ቸለኵ።

⁹እንም፦ «ቢትኑ፤ ድኺዝም ይዉ፤ ጝፅድቅድም ዘላልም ፅበኵ» ይሽት ፃፍሽጘ የጝ።

¹⁰ፊዘተዝ ዚረ፣ ዀናንስም ዅረ ይወው ኣምላክ ፊዝርነውድየንት ኒቒስ ነይጡ፤ ክታፅድቅዙ ፍረድየንትም ኒቒስጡ።

¹¹ዊትርቅ ልግስነዝ ይወነው ቸልድርናንስ ማጥን እጝቅ ዊገዝቅ ኻፍታምዘኵ፤ ክታልግስነድም ይናማካይነትዝ ችጘቍ እቅድ እደረት ሚዝየንዝጛንስ ማጥን ምላሰን ኣቐኵ።

¹²እኒን ይውርነው ኣግልግለውትድ ቅዱሳኒስ ጒድለው ችግርድ እቻዘው ጭቝ ኣዪጝቀ፣ እቅም እደረስ ሚዝየነ ኣልስጥጘ ፃቨው የጝ።

¹³እኒን ክታልግስነይዙ ኣግልግለውትድ ክትን ክርስቶስት ወንጌልድየንት ለምትርን ኣምንሽትርነቅ ኣቕርናንስቅ ጛጭስም ኣነ ላጢዝቅ ፃቭርነው ክታልግስነድ ኣውማውስቅ ደደደድሰው ኣቓንስቅ እጝቅቅ እደረት ሚዝየንጥቍ።

¹⁴ጛይም እደረ ክታጭስ ነየው ኽየው ፃገይስ ጐው፣ ኽየው በንዝ በንጛ ክታማጥንም ፃልይጘኵ።

¹⁵ቃላንዝ ጋልፅሽትጠ ቸልሻው ጝይውትይዝቍዝ እደረ ሚዝየንሽትነ።