Read xamtanga ገላትየት እቂዝ 1 Bible Online

ገላትየት እቂዝ 1 - xamtanga bible

ገላትየት እቂዝ 1

¹እቅዝ ዊንም እጅርዝ ኣመካይነትዝ ኣይጝቀ እየሱስ ክርስቶስትውዝ፣ ጝት ክርጘይስ ጒሰው እደረ ኣይርትውዝም ኻወርየ ኣቕ እፃጨር ያን ባውሎስቲስ፣

²ይጅቅ ፅበቍ እጝቅ ዚኒስም፦ ገላትየ ፅበቍ ምመናኒ እፃሽተው እፃ።

³ይናኣይር እደረቲስ፣ ይናኣደረ እየሱስ ክርስቶስቲስም ፃገዝመ ዲግተዝ ክታጭስ ኣነ።

⁴እኒን ጭቓ ዚምኒስ ይናት ቓዝጠ ይናኣምላክ ይናኣይርት ፍቃድዝ ክርስቶስ ይናኽጥያቲዝቍዝ ጝቕምት ዲቍስ ነዩ።

⁵ዘላለምስ ኪርም ዘላልም ኣሽ እደረስ ክቭር ኣነ! ኣሚን።

⁶ክታት ክርስቶስት ፃገይዝ ኣመካይነትዝ ጭጘው እደረት በትርን ላየ ቲተው ወንጌልዝጐ በውዝ ዋጥረነውድ ይት ጭቕጘ ጊርምሰኩ።

⁷እኒንትም የውድ ክታት ግራ ድውሰቍ፣ ክርስቶስት ወንጌልድየንት ጣምዝጥጘ በነቍ፣ ላው ላው እቅ ፅብጛንስቅ የጝጚ ወንጌልድመ ላው ጭቝ የጝ።

⁸ዊገድ ግን ይን ዊንም ሲመይቱ መላክም እኳ ኣቕሽ፣ ይን ክታጭስ ሲቭክነው ወንጌሊስ ቲተው ላየ ወንጌል ሲቭክሽ ዘላልም እፂተው ኣነ።

⁹እንዝ ሚቅ ይነጘ ነንም ደግም የኵን፤ ኣውማው ክትን ለምትርነዊስ ቲተው ላየ ወንጌል ሲቭክሽ ዘላልም እፂተው ኣነ።

¹⁰ያን ነን በነውድ እቅዝ ሚዝየንጨመ? ዊንስ እደረስ ሚዝየንጨ የጝ? ዊንስ እቅ ዲስ ሽጨ ልቕርጠርመ ተከኵን? እቅ ዲስ ሽጨ ልቕርጠር ኣቓንመ ክርስቶስት ኣገልጋይ ኣጨም ዊኒቀር።

¹¹ይፅንወ! ያን ክታጭስ ሲቭከው ወንጌልድየን እጅሪስ ችጝሸው ኣየው ኣቐነውድ ኣርቕትርነ በነኵን።

¹²እኒን ወንጌልድየንት እየሱስ ክርስቶስ ይጭስ ጋልፁጚ ኣውማውቲስም ለምጢቀር፤ ኣውማው እጅርም ይት ክንሲየውም።

¹³በውገ ኣይዅዳነ ኻይማነውቲዝ ኣወይ ፅበጘ፣ እደረት ምከንሸንት ኣወሽ ጭቕጘ ሲድሳ ዊነጘ፣ ድስጨም ኣወይ ልቕርጠጘ፣ ወሽርንኵርኑ።

¹⁴ይዚምኒዝ ዊነቍ ንቕፀቍ ይዊግኒስቅ ኣይዅዳኒዙ ኻይማነውትድ ሊሚደነውዝ ይት ችጘው ኣውማውም ዊኒየው፤ ይኣቅለ ወጊዝቊዝም ኣሽ ጭቕጘ ቀንየር ዊኑን።

¹⁵ዊገድ ግን ይኘት ማፅኒል ፅባ ይት ቲዘው፣ ጝፃገይዝም ጭጘው እደረ፣

¹⁶ኣኽዛቫኒዝ ማኽሊል ጝማጥን ስቪካንስ ማጥን ጝዅርት ይጭስ ጋልፅጠ በናንድ፣ ያን ኣውማው ጅቅም ማኽርጪቀር።

¹⁷ዊንም ይበውገ ኻወርየታን ዊነቍድዛት ዲምቅጨ እየሩሳልየም ፊጢቀርም፤ ዊገድ ግን በዊል ኣረቭ ኻግሪዝጐ ፊጡን፤ ጝዝግረ ቈሽ ደማስቈ ትጐ ዋጥሩን።

¹⁸ሻቘ እምትዝ ግረም ቢጥሮስት ዲምቅጨ እየሩሳልየም ፉን፤ ጝጅቅም ፅጭ ኣኰ ግርቅ ጐዩን።

¹⁹ዊገድ ግን ኣደረት ዝን ያይቈቭትለ ላጥ ኻወርየታኒስ ኣውማውትም ቓሊቀር።

²⁰እኒን ክታጭስ ፃፈው ዊገድየን ኻሽት ኣየው ኣቐጘ እደረት በዊል ደደደድሰኵን።

²¹ጝዝ ግረም ሰውርየ፣ ኪልቅየም የነቍ ኻግራኒዝጐ ፊጡን።

²²ይዅዳ ኻግሪል ፅበቍ ክርስቶስት ምመናንድ ይጋፅድ ቓልጝ ኣርቓቍም ዊን።

²³ዊገድ ግን፦ «በውገ ይናት ሲድሳ ዊነው እጅርድየን፣ እንዝ ሚቅም ድስጠ ደምዛⶔ ዊነው ኻይማነውትድየንት ነን ሲቭከኵ» የው ጂጘ ጭቝ ወሽጝ ዊን።

²⁴ይቍዝም እደረት ሚዝየንዝጛ ዊን።