Read xamtanga ገላትየት እቂዝ 2 Bible Online

ገላትየት እቂዝ 2 - xamtanga bible

ገላትየት እቂዝ 2

¹ፅጭ ሲዘ እምትዝ ግረም ቲተውት ፃቅ ሊጘት እየሩሳልየም ፊጡን፤ ኣይንድ በርናቫስም ጅቅ ዊኑ።

²ይጭስ ጋልፅሽተጘም ፊጡን፤ ኣኽዛቫኒዝ ሲቭከው ወንጌልድየንትም ጛጭስ ኣርቕሱን፤ ኣነጚ ምናልቫች እንዝ ሚቅ ሰራጨውድም ኣነ፣ ነን ሰራጨውድ ጊነ ኣቕ እዳቓየጘ የር፣ ዋንጢዝ ጭቝ ጝታለ ፃቭ ኣርቕሱን።

³ይጅቅ ዊነው ቲተው እኳ ግሪክቱ እጅር ኣቕሽም ጊርዝሽትጠ ጊድሽቲየውም ዊኑ።

⁴እን ዊገድ ጐውድም ላው ላው ኻሽወጥ ዚን ክርስቶስ እየሱስት ኣመካይነትዝ ችጝነው ይናኻርነይድየንት ሲልልጥጘ ዊስጝም በር ፃቭጥጘ ይናማኽሊል ጭልቕጝ ጥውጛንስቅ የጝ።

⁵እንዛይ እቂዝ ሊንታፍተ እኳ ናን ይዊነቅም፤ እንም ወንጌሊዙ እማንትነይድ ክታጅቅ ፀናቕ ፅባንስ ማጥን የጝ።

⁶ዋንጥ ተክጝ እትለቍ እቂዙ ኣው ኣቐነውድ ይት ጭጝቅዛውም፤ እደረ እቀ በው ቓል ኣድልዋውም፤ እንዛይ እቅድ ያን ክንሰው ወንጌሊል ቈሽጘው ኣይር ዊገም እጀው።

⁷ዊገድ ግን ቢጥሮስስ ኣይዅደኒዝ ወንጌል ሲቭከነው ኽድር ይውሽተጘ፣ ይጭስም ኣኽዛቫኒዝ ወንጌል ሲቭከነው ኽድር ነሽተጘ ቓል።

⁸ቢጥሮስት ኣይዅዳነ ኻወርየ ኣቕ ኣግልግጠ ፃቨው ኣምላክ፣ ይትም ኣኽዛቫኒዝ ኻወርየ ኣቕ ኣግልግጨ ፃቭኩ።

⁹ዲቪዪጢዝጘ እጊተቍ ያይቈቭ፣ ቢጥሮስ፣ ይዃንስታይም ይጭስ ነይሽተው ፃገድ ቓልጝ፣ ይስመ በርናቫስስ ጝታለወ ናንድ ነይ፤[1] ይን ኣኽዛቫኒዝጐ ፊርነ፣ ጛይ ቈሽ ኣይዅዳኒዝጐ ፊርጥጘ ቲስመም።

¹⁰ይናት ቐናዝጝ ኽድርዝጘውድ ድኽድዛት ኻስቨነውድ በራይነጘ ጭቝ የጝ፤ ያንም እኒንት ፃቭጨ ቐናዝ ልቕርጣ ዊኑን።

¹¹ቢጥሮስ ኣንፀውክየ ተራንድ ግልፅዝ ቀር ዊናንስቅ በውዝ በው ተቃውምጩን።

¹²ያይቈቭ እፃቐቍ ላው ላው እቅ ኣንፀውክየ ተሪጝቀ በውገ ኣኽዛቫነ ማኽሊስ ኣምነቊጅቅ ኣቕ ላቭጠ ዃ ዊኑ፤ ጛይ ተርጛንድ ግን፦ «ኣኽዛቫነ ዊግኒስ ኣምነቍድቅ ጊርዝሽትጝነ» የቍ ዊግናንድዛት ጐውተነውዝ እግርገ ኣፍግፍግ ኣኽዛቫኒስ ቲቱ።

¹³በርናቫስም እኳ ጝታተክዘነዊዝ ዊትርሽጢስቅ ላጥ ኣይዅዳንድም ጝተክዘነዊዝ ተቫቭርሽ።

¹⁴ያንም ጛይ ፃቭጘው ዊገድ ወንጌሊዙ እማኒዝጘ ኣየው ኣቐጘ ኣስክሳንድ፣ እጝቅት በዊል ቢጥሮስት፦ «ክት ኣይዅዳነው እጅር የጝ፤ ኣነጚ ኣኽዛቫነ ስረቲዝጘ የጝጚ ኣይዅዳነ ስረቲዝጘም ፅባር፤ እደስለ ወረጘ የጝ ኣኽዛቫንድዛት ኣይዅዳነ ስረትድየንት ቲክንጥጘ ግድስረውድ?» የር ተቃውምጩን።

¹⁵እርግጥ ይን ይናእዅርሽንድ ኣይዅዳን የጝጚ ኽጥያትኝጥ ኣኽዛቫንም ኣይነቅ።

¹⁶ዊገድ ግን እጅር ፃድቀውድ እየሱስ ክርስቶስት ኣምነነውዝ የጝጚ ኽግ ፋፅመነውዝ ኣየው ኣቐጘ ኣርቕነኵን፤ እንዝ ማጥን ኽግ ፋፅመነውዝ ኣይጝቀ ክርስቶስት ኣምነነውዝ ፃድቅናንስ ማጥን ይንም ክርስቶስ እየሱስት ኣምንንኵኑን፤ ምላሰንድም ኣውማው እጅርድቅ ኽግ ፋፅመነውዝ ፃድቃውም።

¹⁷ክርስቶስት ኣመካይነትዝ ፃድቅነ በንናንድ፣ ይን ይናቕም ኽጥያትኝጥ ኣነጘ ግልፅ የጝ፤ እደስለ ክርስቶስ ኽጥያት ፈራጠ ፃቨኵ የነትመ? ስሪስቅ ኣየውም።

¹⁸ያን ይቕም ፋዘው ኽጊዙ ስረትድየንት ዊስ ሰራጨር ኣቐውዝየ ይቕም ኽግ ፋዘር ኣቐነውድ ደደደድሰኵን የነት የጝ።

¹⁹እደረስ ፅበው ኣቕ ፅብጨ ማጥን ኽግዝ ኣመካይነትዝ ኽጊዝ ክጥኩን።

²⁰ክርስቶስ ጅቅ ሲቅልጭኩን፤ ነስየ ያን ይቕምስ ፅበቅም፤ ዊገድ ግን ክርስቶስ ይግል ፅብጡ፤ ነንም ያን ኣካልዝ ፅበው ፅበጘድ፣ ይት ቀነው፣ ይማጥንም ጝቕምት ዲቍስ ይወው እደረት ዅርትል ፃቀው እምንቲዝ የጝ።

²¹እደረት ፃገድየንት ቀልዘቅም፤ ፅድቅ ኽግ ፋፅመነውዝ ችጝሸው ኣቐውዝየመ ክርስቶስ እንዲያው ጊነዝ ክሩ የነት የጛ!