Read xamtanga ገላትየት እቂዝ 3 Bible Online

ገላትየት እቂዝ 3 - xamtanga bible

ገላትየት እቂዝ 3

¹ኣስቱላይርነቅ ገላትየት እቅ ክታትርነ! ክታግል ኣዚም ፃቨውድ ኣው የጝ? እየሱስ ክርስቶስ ሲቅልሸጘ ኣቕ ክታበዊል ግልፅዝ ስልሽ ዊኑ።

²ክታጊስ ላው ዊገ ጭቝ ኣርቕጨ በነኵን፤ መንፈስ ቅዱስት ለምትርነውድ ኽግ ፋፃመነውዝመ ዊንስ ኣቭዝርተይዙ ቃልድ ወሽርን ኣምነነውዝ የጝ?

³ለከ ኣስክሳይርነቅ ኻጘፃን የጝ? መንፈስዝ ኪርምርንመ ስየዙ ልቕረዝ ፍፅማን ኣትርነ ልቕርድርና?

⁴ወንጌሊዝቍዝ ለምርትርነው እንቝጠ ሚከረድቅ ጊነዝ ዊኑ የነትመ? እኒንት ፃቭርነውዝየ እርግጥም ጊነ ኣቕ እዳቕኩ።

⁵እደረ ጝመንፈስድየንት ክታጭስ ነየውድ፣ ክታማኽሊልም ታምራን ፃቨውድ፣ ኽግድየንት ፋፅምርናንስቅመ ዊንስ ወሽርነው ወንጌልድየንት ኣምንድርናንስቅ የጝ?

⁶እስቲ ኣቭርኻምት ትዝ ይጥን፦ «ኣቭርኻም እደረት ኣምኑ፤ ጝእምንትድም ጝጭስ ፅድቅ ኣቕ እጊቱ» ይሽት ፃፍሽኩ።

⁷ነስየ እንዛይ እደረት ኣምነቍድ ኣቭርኻምት ቝር ኣጘጘ ኣስክስጥን።

⁸መፃፍም እደረ እጅርድየንትቅ እምንትዝ ፃድቅዘው ኣቐጘ በውርስ ቓለነውዝ፦ «ዝቨት ዲግል ፅበው እጝቅ ኽዝቭድድቅ ክቍዝ በርክሽጡ» የነውዝ ወንጌልድየንት ኣቭርኻምስ በውርስ ሲቭኩ።

⁹እንዝ ማጥን ኣምነቍ እቅድቅ ኣምነው ኣቭርኻም ጅቅ በርክሽጥቍ።

¹⁰ኽግ ፋፅመነውዝ ተማምንሸቍ እቅድቅ እፀዝ ስሪል ጛይ፤ ምላሰንድም፦ «ኽግዙ መፃፍዝ ፃፍሸውድየንትቅ ፃቫው እጅርድቅ እፂተው ይጝ» ይሽት ፃፍሽትኩ።

¹¹«ፃድቅ እምንትዝ ፅብጡ» ይሽታንስቅ ኣውማውቅ እደረት በዊል ኽግ ፋፅመነውዝ ፃድቃው ኣቐጘ ግልፅ የጝ።

¹²ኽግ እምንትል ሚስርትሸውም ኣየው፤ እንዲያውም፦ «ኽጊዝቍ ትዛዛንድዛት ፋፅመው እጅርድቅ ጛዝ ርዅየዝ ፅብጡ» ይሽትኩ።

¹³«ቃነዝ ሲቅልሸው እጅርድቅ እፂተው የጝ» ይሽት ፃፍሻንስቅ፣ ክርስቶስ ይናቺ እፂተው ኣቕ ኽጊዙ እፀይስ ይናት ኻርነይ ፊሱ።

¹⁴ኣቭርኻምስ ይውሽተው በረከትድ፣ ክርስቶስ እየሱስት ኣመካይነትዝ ኣኽዛቫኒል ችጛንስ ማጥን ይናት ኻርነይ ፊስኩ፤ እንም እደረ ነቅጭር የው መንፈስድየንት እምንትዝ ለምርናንስ ማጥን የጝ።

¹⁵ይፅንወ! እቀ ልምዲዝጘ ዊግጨ፤ እጅርዙ ቃል ኪዳንድ እኳ ሊን ፃድቀት ግረ ኣውማው እጅርድቅ ሸርጠ፣ ዊንም ጝግል ቈሽጠ ቸላው ኣቐጘ፣ እን ዊገይዝም ኣቕሽ ጘጝት የጝ።

¹⁶ቲስፈይዙ ቃልድም ድቍሽተውድ ኣቭርኻምስመ ጝዚረይዝ ዊኑ፤ መፃፍ፣ ንቕፀቊ እቅዝ ዊግሻንትጘ ፃቭ፦ «ንቕፀቍ ክዚረይዝ» ያውም፤ ዊገድ ግን ላው እጅርዝ ዊግሻንትጘ ፃቭ፦ «ክዚረይዝ» የኵ፤ ጘጝም ክርስቶስ የጝ።

¹⁷ያን የውድ እኒንት የጝ፦ ሲዘ ላዝ ሰውርጝን እምትዝ ግረ ይውሽተው ኽግድየን፣ በውርስ እደረ ፀናዘው ኪዳንድንየት ፋዘነውዝ ቲስፈይዙ ቃልድየንት ሸራውም።

¹⁸ርስት ዊርሽተውድ ኽግዝ ኣቓንመ፣ ቲስፈዙ ቃልዝ ኣቐነውድ እዳጠ ዊኑ፤ ዊገድ ግን እደረ ጝፃገይዝ ቲስፈይዙ ቃሊዝ ኣመካይነትዝ ኣቭርኻምስ ርስትድየንት ይውኩ።

¹⁹እደስለ ኽግ ይውሽተውድ ወረጘዝ ማጥን የጝ? ኽግ ይውሽተውድ ቲስፈዙ ቃልዝ ይውሽተው ዚረድ ተርጢስቅ ኽጥያት ወረጘ ኣቐጘ ቓሊስጠ ማጥን የጝ፤ ኽግድ ይውሽተውድ መላካኒዝ ኣመካይነትዝ ላው ማኽልኘዙ ናንዝ የጝ።

²⁰ኣነጚ ማኽልኘድ ላው ዊግነድየንት ጭቝ ዊክለውም ኣየው፤ እደረ ግን ላው የጝ።

²¹እደስለ ኽግ እደረት ቲስፈዙ ቃልድየንት ተቃውምሸኵ የነትመ? ስሪስቅ ኣየውም! ርዅየ ችጚሰው ኽግድ ይውሽት ዊናንመ፣ እርግጥም ፅድቅ ችጝሸውድ ኽግዝ ኣመካይነትዝ ኣጠ ዊኑ።

²²ዊገድ ግን እየሱስ ክርስቶስት ኣምነነውዝ ችጝሸው ቲስፈይዙ ቃልድየን ኣምነቊዝቅ ይውሽታንስ ማጥን፣ መፃፍ እጝቅትቅ ኽጥያትዝ እፁሸጥ ፃቭ ኣውጅኩ።

²³እምንትድ ተሪጝቀ በውገ ኽግዝ ኣመካይነትዝ እፁሸጥ ዊኑን፤ እኒን እምንትድ ጋልፅሽትጢስቅም ኽግዝ እፅቍሽነቅ ዊኑን።

²⁴ኣቓንስቅም እምንትዝ ፃድቅናንስ ማጥን ኽግ ይናት ክርስቶስትጐ ነሰው ይናመጕዚት ኣቕ ዊኑ።

²⁵ነን ግን እምንት ተራንስቅ ኽግዙ መጕዝትነይዝ ስሪል ኣቐነውድ እዳቕኩ።

²⁶ክትን እጝቅቅ ክርስቶስ እየሱስት ኣምነነውዝ እደረት ቝር ኣቕርንኵርኑ።

²⁷ምላሰንድም ክርስቶስ ጅቅ ላው ኣትርነ ጣምቅሽርነቅድቅ ክርስቶስት ሲትርንኵርኑ።

²⁸ኣይዅዳነውዝመ ግሪካነውዝ ማኽሊል፣ በረዝመ ጭወዝ ማኽሊል፣ ግልወዝመ እውነዝ ማኽሊል፣ ቲዘቲዘው ወረጘም እጀው፤ ክትን እጝቅቅ ክርስቶስ እየሱስት ኣመካይነትዝ ላው ኣቕርንኵርኑ።

²⁹ክርስቶስትቍ ኣቕርነውዝየ ኣቭርኻምት ዚረም የጝ፤ ቲስፈይዙ ቃሊዝጘም ወራሻን የጝ።