Read xamtanga ገላትየት እቂዝ 4 Bible Online

ገላትየት እቂዝ 4 - xamtanga bible

ገላትየት እቂዝ 4

¹ያን የውድ እኒንት የጝ፦ ወራሸድየን ኽፃን ፅባ ውርም እኳ ኻፍትድቅ እጝቅ ጙ ኣቕሽም በረይስ ቲተውም ኣየው።

²ጚር ዊስነው ግርየይል ኣሽ ሊሚደቊዝመ መጕዚታኒዝ ስርል ጨው የጝ።

³ይንም እኒዝጘ መንፈሳዊ ዊገይዝ ገነ እፈር ፅብና እን ኣልሚዙ ስረቲዝ ስሪል ኣቕን በርነይዝ ቅምሽና ዊኑን።

⁴ዊገድ ግን ዊስንሸው ግርየድ ችጛንድ፣ እደረ እውነቲስ እዅርሸውድየንት፣ ኽግዝ ስሪልም ፅበው ጝዅርድየንት እፃቑ።

⁵እንም ኣቐውድ ይን ዅርነይዙ መቭት ችጝናንስ፣ ኽግዝ ስሪል ፅበቍድዛትም ኻርነይ ፊሳንስ ማጥን የጝ።

⁶ዅልም ኣቕርናንስቅ እደረ፦ «ኣየ! ኣየ!» ያ ጭጘው ጝዅርት መንፈስድየንት ይናዘኒል እፃቑ።

⁷ኣቓንስቅም ነስየ ክት ዅር የጝጚ በረም ኣይረር፤ ዅርም ኣረውዝየ ቈሽ እደረ ክት ወራሽ ፃቭኩ።

⁸ክትን እደረት ኣርቒጝቀ በውገ ጝታተፈጥረውይዝ ኣምላካን ኣየቊዝ በር ኣቕርን ቅምሽርና ዊንድርኑ።

⁹ነን ግን እደረት ኣርቕርንኵርኑ፤ ኽሽ ቈሽ እደረ ክታት ኣርቕኩ፤ እደስለ ወረጘ የጝ ዝላቐቍ፣ ጣቅማቍ ኣልሚዝቍ ስረታኒዝጐ ዋጥርድርነውድ? እንደ ገነመ ጛጭስ በር ኣቕርን ቅምሽትርነ በንርና?

¹⁰ቲተቍ ግርቅዝመ ኣርፍጥዝ፣ ወቅታንዝመ ኣምርጥዝ፣ ጥጝቅቀዝ ኪብርዝርነኵ።

¹¹ምናልቫች ያን ክታጭስ ጊነዝ ዝላቐው ተካ ጐውጠኵን።

¹²ይፅንወ! ያን ክታጘ ኣቐጘ ክትንም ይጘ ኣጥን የር ጨወኵን፤ ክትን ይት ወረጘዝም ቢድሊርነቅ።

¹³እንዝ ሚቅ ክታጭስ ወንጌል ሲቭከውድ ፅዊጣንስቅ ኣቐጘ ክትን ኣርቕርነኵ።

¹⁴ይፅውዘድ ክታጭስ ፊተነ ኣቓንም እኳ ይት ነቂርነቅም፤ ዊንም ስኽፍ ዪይርነቅም፤ ዊገድ ግን እደረት መላክ ለምትርናንትጘ እንዲያውም ጝቕም እየሱስ ክርስቶስት ለምትርናንትጘ ፃቭርን ለምትርኑ።

¹⁵ኣየውጚ! እድየን ክታዲስተድቅ ኣውል ፊሩ? ቸልድርናንስ ክታእልድየንት እኳ ኣቓን ፊስርን ነይትርነ ዊንድርነጘ ያን ይቕም ሚዝርጠኵን።

¹⁶እደስለ እማንድየንት ድቋንስቅመ ክታፃለት ኣቑን?

¹⁷እዛይ እቅድ ጝታቕምትጐ ፊስጥጘ ቲጊጘኵ፤ ቀሰውዝ ግን ኣየውም፤ ጛይ በንጘውድ ክትን ይናጊስ ቲትርናንስ፣ ጛትም ቲግይርን ደምዝራንስ ማጥን የጝ።

¹⁸ቀሰው ዊገዝ ኣቐውዝየ ቲግየነውድ ቀሰው የጝ፤ ዊገድ ግን እን ኣጠ ጥውሸውድ ዊትርቅ የጝጚ ያን ክታጅቅ ኣቓንድ ጭቝም ኣየው።

¹⁹ይቝርወ! ክርስቶስ ክታዘኒል ቐናቕ ጥውጢስቅ እንደ ገነ ክታቍዝ ቅምት ፃይሽረይትጘ ጨጝቅጭኩን።

²⁰ነን ክታማኽሊል ችጝጭ ቲተው ዊግትንዝ ዊግጣን በንጨ ዊኑን፤ ዊገድ ግን ክታቍዝ ግራ ጥወነውዝ ጨጝቅጭኩን።

²¹እፈ ኽግዝ ስርል ፅብትርነ በንርነቅ እቅ ክታትርነ! እስቲ ድቍጥን፤ ኽግ ወረጘ የጘ ወሺርነቅመ?

²²ኣቭርኻም ሊጘ ዅል ፃየው ዊነጘ፣ ላውድ በረየንቲስ፣ ላየድ ቈሽ ጭወየንቲስ እዅርሸቍ ኣጘጘ ፃፍሽኩ።

²³በረየንቲስ እዅርሸውድ ስየይዙ ልምዲዝጘ ኣቓንድ፣ ጭወየንቲስ እዅርሸውድ ግን ቲስፈይዙ ቃሊዝ ሚስርትዝ የጝ።

²⁴እን ዊገድየን ተከ የጝ፤ እንዛይ ሊጘ እቍንድ ሊጘ ኪዳናንድዛት ቓሊስጘኵ፤ ለወትረ ኪዳንሸን ሲነ ኣበይስ ችጝሽረይሸን ኣራንድ፣ በርነይዝ ዅል እዅረች፤ ጚይም ኣጋር ጚ።

²⁵ነስየ ኣጋር ኣረቭ ኻግሪል ፅብረይ ሲነት ኣበድ ዊክልነውዝ፣ ነን ፅብረይ እየሩሳልየምት ተከች፤ ጚይም ጝርቝርጅቅ በርነይዝ ፅበች።

²⁶ንየ ሲመይ ኣረይ እየሩሳልየም ግን ኻርነይዝ ፅበች፤ ጚይም ይናኘ ጚ።

²⁷«እፈ ክት እዅርድር ኣርቓር ማኽን ክተ! ዲስ ይ፤ ክት ግርቨቭሽር ኣርቓር ክተ! እልል ይ፤ ግልወ ፃይረየንትሽ ጝርለትወየንት ዅልድ ንቕፅጝኵ» ይሽት ፃፍሽኩ።

²⁸ነስየ ይፅንወ! ክትንም ይሳቅትጘ ቲስፈይዙ ቃልዝቝር የጝ።

²⁹ኣይንድ ስየዙ ልምድዝ እዅርሸውድየን መንፈስዙ ኻይልዝ እዅርሸውድየንት ጅግዘጘ ንጭም ጘጝት የጝ።

³⁰ዊገድ ግን መፃፍ ወረጘ ያ? «በረየንት ጝርዅር ጅቅ እለ እክልሽ፤ ምላሰንድም በረየንት ዅርድ፣ ጭወየንት ዅሪጅቅ ዊርሳውም» የኵ።

³¹እንዝ ማጥን ይፅንወ! ይን ጭወየንት ቝር የጝጚ በረየንት ቝርም ኣይነቅ።