Read xamtanga ገላትየት እቂዝ 6 Bible Online

ገላትየት እቂዝ 6 - xamtanga bible

ገላትየት እቂዝ 6

¹ይፅንወ! ላው እጅር ኽጥያት ሰራሽ ችጝሽሽ፣ መንፈሳዊያን ኣቕርነቅ ክትን ገርኽትዝ ዊስትርነ ጥውሸኵ፤ ዊገድ ግን ክት ቈሽ ፊትንሻይረጘ ጣጝቅቅጭ።

²ላውድ ላየይዙ ፅጐወው መውርድየንት መውርነ፤ እንዝ ኣይንትዝ ክርስቶስት ኽግድ ፋፅምትርንቅ።

³ላው እጅር ውረውረቅ ኣቒጝቀ ጝቕምት ኽየው ፃቭ ኻስቭሽ ጝቕምት ኻጝሰኵ።

⁴ኣውማው እጅር ኽጝቕምት ሰቭድየንት ሚርምር ፊትነ፤ ጝዝግረ ጝቕምት ላጢጅቅ ኣወዳድርዚጝቀ ጝቕምስ ጭቝ ማክኽሰው ዊገ ችጝጡ።

⁵ምላሰንድም ኣውማው እጅርድቅ ጝቕምት መውርድየንት መውርጠ ጥውሸኵ።

⁶እደረት ቃልድየንት ክንደው ኣውማው እጅርድቅ ቀሰው ዊገድየንትቅ ጝክንሰተይጅቅ ኣድልሸነ።

⁷ኻጝልድትርነ፤ እደረ ተዘቫቭትሻይነውም፤ እጅር እጝቅ ፊዘውድየንት ጝት ኣይረኵ።

⁸ጝስየድየተንት ዲስ ሽጠ ፊዘው፣ ጝስየይስ ክርጘድየንት ኣይረኵ፤ መንፈስድየንት ዲስ ሽጠ ፊዘው፣ መንፈሲስ ዘላልሚዙ ርዅየ ኣይረኵ።

⁹ቀሰው ሰቭ ሰራሸነው ሲዝውርነ ጥውሻውም፤ ቲስፈ ቀቪነውዝየ ማፅወይዙ ግርየድ ችጛንድ ኣይርንቅ።

¹⁰እንዝ ማጥን ሚቸው ግርየ ችጝነውዝየ እጅርዝቅ፣ ኽሽም ቈሽ ምመናኒዝ ቀሰው ፃቭነ።

¹¹ኣወየቍ ኽየቍ ፊድላንዝ ይናኒዝ ክታጭስ ፃፈጘት ቓልጥን።

¹²እቀ በዊል ቀሰቍ ተክጝ እትልጥጘ በነቍ እቅ ጊርዝሽትርናንስ ክታት ኣስገድድዝጥጘ ልቕርድጘኵ፤ እኒንት ፃቭጘውድም ክርስቶስት ሚስቅሊዝቍዝ ሚከረ ለምራይጘጘ የጝ።

¹³ጛይ ክታስየይዝ ማክኽሽጥጘ ማጥን ክትን ጊርዝሽትትርነ በንጘኵጚ ጊርዝሽተቍድ ጝታቕም እኳ ኽግድ ፋፅማቊም።

¹⁴ዊገድ ግን ኣልም ይጭስ ሲቅልሸው፣ ያንም ኣልምስ ሲቅልጨው ይናኣደረ እየሱስ ክርስቶስት ሚስቅሊዝለ ላየ ምክኸ ይጊስ እክልድነ።

¹⁵ኣይር ፍጥርት ኣቐነው የጝ ጣቅመውድጚ፤ ጊርዝሽተነውም ኣነ ጊርዝሽታይነው ጣቅማውም።

¹⁶እኒን ትዛዝድየንት ቲክነቊል እጝቅልቅ፣ እማንዝ እደረት እስራየላን ኣቐቊልም ዲግተዝመ ስቝርትዝ ኣነ።

¹⁷ያን እየሱስት ማጥን ጊርፍጨው ማፅረድየንት ይሰወነቲል መውጥኩን፤ ነስየ ይት ኣውማውቅ ቺግርዚነ።

¹⁸ይፅንወ! ይናኣደረ እየሱስ ክርስቶስት ፃገድ ክታመንፈሲጅቅ ኣነ ኣሚን።