Read xamtanga እፊሰውንት እቂዝ 2 Bible Online

እፊሰውንት እቂዝ 2 - xamtanga bible

እፊሰውንት እቂዝ 2

¹ክትን ክታበደሊዝመ ክታኽጥያቲዝ ኣመካይነትዝ ክትርነቅ ዊንድርኑ፤

²ኣይንድ እን ኣልሚዙ ጭቓ ጒደነድ ቲክነነውዝ፣ ኣየሪል ፅበቍ መንፈሳውያን ኻይላኒዝ ቅመተ ኣቐው፣ ነንም እደረስ ኣዚታቊ እቂል ሰራሸው መንፈሲዝ ኣዚትርነቅ ዊንድርኑ።

³ይን እጝቅ እንዝ ሚቅ ይናስየይዙ ምርቕፀይዝመ ይናኣይምረዊዙ ኻሰቪዝ ቲክና ጝታማኽሊል ፅብነቅ ዊኑን፤ ላጢዝጘም ይናተፈጥረዊዝ ቍጣዝቍ ዅል ዊኑን።

⁴ዊገድ ግን ስቝርትዝ ፃጅተው እደረ ይናጭስ ፃየው ጝፍቅርድ ኽየው ኣቓንስቅ

⁵ይናበደሊዝ ምላሰንዝ ክርነቅ ኣንሽም እኳ ጘጝ ግን ክርስቶስ ጅቅ ርዅየ ነዩ፤ ክትንም ቓድርነውድ ፃገዝ የጝ።

⁶እደረ ይናት ክርስቶስ ጅቅ ጒሱ፤ ክርስቶስ እየሱስት ኣመካይነትዝም ሲመይቱ ስፍረል ጝጅቅ ጐይሱ።

⁷እኒንት ፃቨውድም ተረቍ ዚምናኒዝ ክርስቶስ እየሱስት ኣመካይነትዝ ጝደግነቲዝ ጋልፀው ልክ እጀው ጝፃገይዙ ፃጀድየንት ይናጭስ ቓሊስጥ የጝ።

⁸ምላሰንድም ክትን ቓድርነውድ እምነትዝ ኣመካይነት ፃገዝ የጝ፤ እንም እደረት ይውት የጝጚ ክታቕምቲስ ችጝሸውም ኣየው።

⁹ቓደነ ችጝሸውድ ሰቭዝም ኣየው፤ ኣቓንስቅም ኣውማውቅ ማክኽሺነ።

¹⁰ምላሰንድም ይን እደረ በውግስ ኣስለው ቀሰው ሰቭድየንት ሰራሽናንስ ማጥን ክርስቶስ እየሱስት ኣመካይነትዝ ፋጥርሽነቅ እደረት ፍጥርታን የጝ።

¹¹እንዝ ማጥን እንዝ ሚቅ ክታእዅርሽኒስ ኣኽዛቫን ዊንድርነቅ፣ እቀ ናንዝ ሰውነትል ፃቭሽተው ግዝርትዝቍዝ፦ «ይን ጊርስሽትነቅ የጝ» የቍ ኣይዅዳኒዝ፦ «ጊርዝሽቲየቍ» ይሽትርነቅ ክትን፣ ጝት ትዝ ይጥን።

¹²ኣይንድ ክርስቶስቲስ ቲትርን፣ እስራየልት ዊግኒስ እክልድርን፣ ቲስፈዝ ይውሽተው ኪዳኒስ በድ ኣቕርን፣ ቲስፈ እጀው፣ እደረትም እጀው፣ ኣልሚል ዊንድርነጘ ትዝ ይጥን።

¹³ነን ግን ክትን እንዝ ሚቅ እክልድርን ዊንድርነቅድ ክርስቶስ እየሱስትቍ ኣቕርን ጝብሪዝ ኣመካይነትዝ ኣልትርንኵርኑ።

¹⁴ምላሰንድም ይናት ቲዘቲዝ ዊነው ጐሪዙ ግድግደድየንት ጝሰዊነቲዝ ፋዘውድ፣ ኣይዅዳኒዝመ ኣኽዛቫኒዝም ላው ፃቨው ይናዲግተድ፣ ክርስቶስ የጝ።

¹⁵ኽግድየንትም ጝትዛዚጅቅ ጝስረቲጅቅም ፃቭ ጝስየይዝ ሸሩ፤ ጝኣለመድም ጝታቪልቲስ ላው ኣይር ኽዝቭ ፋጥር ዲግተ ፃቨነው የጝ።

¹⁶ሚስቅልል ስቅልሽ ክረነውዝም ፃለትነይድየንት እክልሱ፤ ሊጘድዛትቅም ላው ኣካል ፃቭ እደረ ጅቅ ኣርቅሱ።

¹⁷ተርም እክልድርን ዊንድርነቅ ክታጭስም፣ ኣልትጝ ዊነቍ ጛጭስም ዲግተድየንት ሲቭኩ።

¹⁸ይን እጝቅ ጝቍዝ ላው መንፈፈስዝ ቃውሽን ኣይር ትጐ ኣልትነ ቸልነኵን።

¹⁹እደስለስ ክትን ቅዱሳኒጅቅ ኻግር ጕይጥ፣ እደረት በተሰቭም የጝጚ፣ ነስየይስ ኣብንዝመ ስድትኝጥዝም ኣይርነቅ።

²⁰ኻወርየታኒዝመ ነቪየታኒዝዙ ሚስርቲል ኻንፅሽትርንኵኑ፤ ማዘኒዙ ኣውር ኣቐው ቕርጘድም ክርስቶስ እየሱስ ጝቕም የጝ።

²¹ጝቍዝም ኽንፀድቅ ጋጥምጥምሽ ኣደረት ቅዱስ መቅደስ ጝን ኣቓንስ ሊግዘኵ።

²²ክትንም ጝመንፈሲዝ ኣመካይነትዝ እደረት ጨነ ጝን ኣቕርናንስ ማጥን ክርስቶስ ጅቅ ላብጠ ተሲትርነኵ።