Read xamtanga እፊሰውንት እቂዝ 3 Bible Online

እፊሰውንት እቂዝ 3 - xamtanga bible

እፊሰውንት እቂዝ 3

¹እንዝ ምላሰንዝ ያን ባውሎስ ክርስቶስ እየሱስት ማጥን እፁጨር ኣቐርድ፣ ክትን ኣኻዛቫኒዝ ማጥን ፃልየኵን።

²ክታኣርወዝ ኣቓንስ ማጥን እደረ ጝፃገይዝ ኣግልግለውትዙ እድል ይጭስ ነየጘ እርግጥ ወሽርንኵርኑ።

³እንዝ ሚቅ እጅጝዝ ፃፈጘ እደረ እኒን ምስጢርድየንት እትለዝ ጋልፅ ይጭስ ቓሊስኩ።

⁴ነስየ እኒንት ኣንቭቭርናንድ ክርስቶስት ምስጢርድየንት ኣወሽ ኣስክሰር ኣቐጘ ተረድሽትትርነ ቸልድርነኵ።

⁵እኒን ምስጢርድም ነን ቅዱሳን ኻወርየታኒዝመ ነቪየታኒዝ መንፈስዝ ጋልፅሽተዊዝ ቝጠ፣ ዲቈቍ ዚምናኒዝ ዊነቍ እቂዝ ጋልፅሽቲየውም ዊኑ።

⁶ምስጢርድም ኣኽዛቫን ወንጌልዝ ኣመካይነትዝ እስራየላኒጅቅ ላብጠ ወራሻን፣ ላው ሰውነትዝ ኣካላን፣ እኒዝጘም እደረ ክርስቶስ እየሱስት ኣመካይነትዝ ይወው ቲስፈይስ ላብጠ ኣድልሸቍ፣ ኣቐነውድ የጝ።

⁷ያንም ጝኻይሊዙ ሰራሽኒዝጘ ነየው እደረት ፃገዙ ይውቲዝ ኣመካይነትዝ፣ እኒን ወንጌልዝ ኣገልጋይ ኣቕኩን።

⁸ውርም እኳ ቅዱሳኒስቅ ፅጐር ኣቓንም ኣቢተነ እጀው ክርስቶስት ፃጀድየንት ኣኽዛቫኒዝ ሲቭክጨ ማጥን እደረ ጝፃገይዝ እኒን ኣግልግለውቲዙ እድልድየንት ይጭስ ነዩ።

⁹እኒዝጘም እጝቅትቅ ፋጥረው እደረ፣ ዲቈቍ ዚምናኒዝ ሲውር ዊነው እኒን ምስጢርድየንት ኣወሽ ፋፅምጠጘ እጝቅዝቅ ጋልፅጨ ማጥን ይጭስ ነዩ።

¹⁰ጝኻሰቭድም ምከንት ኣመካይነትዝ ነንት ዚምኒዝ ጝሉ ጝሉ ኣይንት ፃየው ንቕፀው እደረት ጥቨቭድየንየንት ሲመይቱ ስፍረይል ፅበቍ ኻልቅጢዝመ ስልጣን ጒጢዝ ኣርቕጛንስ የጝ።

¹¹እንም ይናኣደረ ክርስቶስ እየሱስት ኣመካይነትዝ ፋፅመው ዘላልምዙ እቅዲዝ ሚስርትዝ የጝ።

¹²ክርስቶስትቍ ኣናንስቅ፣ ጝትም ኣምነቅ ኣናንስቅ፣ እደረት በዊል ድፍርትዝመ ተማምንሸነውዝ ኣልትነ ቸልነኵን።

¹³እንዝ ማጥን ያን ክታጭስ የር ለምጠው ሚከረይዝ ምላሰንዝ ተሰፈ ቀቫይርነጘ ጨወኵን፤ ያን ለምጠው ሚከረድ ክታጭስ ክቭር የጝ።

¹⁴እንዝ ምላሰንዝ ሲመይልም ኣነ ዝቨይል ፅበው ኣውማው በተሰቭድቅ ጝጭጝሸነ ሽድ ችጘው እደረ ኣይርት በዊል ይግርቪዝ ግርቨቭጨኵን።

¹⁶ክታኣቒቱ እጅርነይዝ ጣጝክርድርናንስ ማጥን ጝክቭሪዙ ፃጀይስ ጝመንፈሲዝ ኣመካይነትዝ ኻይል ነያንስ ማጥን ፃልየኵን።

¹⁷እንም እምንትዝ ክርስቶስ ክታእዘኒል ፅባንስ የጝ፤ ቈሽም ክትን ስር ሲቭርን ፍቅርዝ ፀናቕርን፣

¹⁸ክርስቶስት ፍቅሪዙ ፍራይዝመ ሊግዚዝ፣ ኽይቲዝመ ጥልቀቲዝ፣ ውርቍጠ ኣቐጘ እጝቅ ቅዱሳኒጅቅ ላብጠ ኣስክስነው ኻይል ችጝርናንስ ማጥን የጝ።

¹⁹እኒዝጘም ኣርቕሽተነዊስቅ ኒየ ኣቐው ክርስቶስት ፍቅርድየንት ኣርቕርናንስ ማጥን እደረቱ ፍፅም ኣቐው እቻቕኒዝም እቻቕርናንስ፣ ፃልየኵን።

²⁰ነስየ ይናኣቒል ኣቕ ሰራሸው ጝኻይሊዝ መጠንዝ ይን ዊግትነዊስ ዊንም ኻሰቨነዊስቅ ኒየ ቐናዝ ፃቭጠ ቸለው ኣምላክስ፣

²¹ምከንት ኣመካይነትዝ፣ እኒዝጘም ክርስቶስ እየሱስት ኣመካይነትዝ ዚምናኒዝቅ ዘላልም ኣልም ኣሽ ጝጭስ ክቭር ኣነ፤ ኣሚን።