Read xamtanga እፊሰውንት እቂዝ 4 Bible Online

እፊሰውንት እቂዝ 4 - xamtanga bible

እፊሰውንት እቂዝ 4

¹ነስየ ኣደረትቍዝ እፁጨር ያን፣ ክታጭጝሽርነው ጭጝኒዝ ጥውሸው ፅብጘ ፅብትርነ ማጥን ክታት ጨወኵን።

²ፍፅም ትኽትንቍ፣ ገርኻንም ኣጥን፤ ፍቅርዝ ክታስ ክታይ ቸለቸልሽርና ኣቕል ጕይጥ ኣጥን።

³ዲግተዙ እፅወነዝ እፅወፅውሸነውዝ መንፈስዙ ላውትድየንት ሊሚድርናንስ ቲጊጥን።

⁴ጭጝሽርናንድ ላው ቲስፈዝጐ ጭጝሽርነጘ፣ ላው ኣካልዝመ ላው መንፈስዝ እኩ።

⁵ላው ኣደረ፣ ላው እምንት፣ ላው ጥምቅት እኩ።

⁶እጝቅት ንየ ኣቐው፣ እጝቅልቅም ሰራሸው፣ እጝቅልቅም ፅበው፣ እጝቅዝቅም ኣይር ኣቐው ላው ኣምላክ እኩ።

⁷ዊገድ ግን ክርስቶስ ዊስነጘ ይናይታእጝቅዝቅ ይውት ነይሽትኩ።

⁸እንዝ ማጥን፦ «ንየ ፋንድ መራሸቍ እቅድ ፃይ ፊሩ፤ እቅዝም ይውት ይዉ» የኵ።

⁹እደስለ፦ «ንየ ፉ» የነውድ «ዝቨዙ ሳቱ ክፍሊል ጊሙ» የነት ኣቕየውዝየ ወረጘ የነት የጝ?

¹⁰ሳ ዝቨይዝጐ ጊመውድም፣ ጝቕም ምሉ ፍጥረተ ኣልምድየንትቅ እቻጠ ሲመይት ንየ ፈውድ የጝ።

¹¹ጘጝም ላው ላውድዛት ኻወርየታን፣ ላው ላውድዛት ነቭያታን፣ ላው ላውድዛት ወንጌል ሲቭከቍ፣ ላው ላውድዛት ምመናንድ ሊሚደቍ ምቕ፣ ላው ላውድዛት ክንሰጥ፣ ፃቭ ምከንስ ይዉ።

¹²እንም ክርስቶስት ኣካልድ ገምባሻንስ፣ ቅዱሳንድዛትም ኣግልግለውትዙ ሰቭል ኣስላንስ ማጥን የጝ።

¹³እንም ኣቐውድ ይን እጝቅቅ እደረት ዅርት ኣምነነውዝመ ኣርቐነውዝ ችጝሸው ላውንቲል ችጘነውዝ፣ ክርስቶስትል ፅበው ፍፅምነቲዙ ደረጀይልም ችጘነውዝ፣ ምሉ እጅር ኣኒስቅ የጝ።

¹⁴ነስየ እቅዙ ረቂቅ ተጝኰልዝመ ኻጝሰነውዝ ኣስልሸው ጝሉ ጝሉ ክንድጝዙ ፊግየዝመ ማይቨልዝ ትክቭሽና እንጐስመ እድጐስ ተጝገዋልልሽና ኽፃናን ኣነ ጡሻውም።

¹⁵ኽሽስ እማንድየንት ፍቅርዝ ዊግትናⶔ፣ ኣውር ኣቐው ጝጐ እጝቅ ዊገይዝቅ ሊግዝነኵን፤ ጘጝም ክርስቶስ የጝ።

¹⁶ጝቍዝም ሰውነትዙ ኣካልድቅ ጝጭስ ይውሽተው መገጣጠሚየዝ ፃየፃይሽታ ኣውማው ኣካልዙ ክፍልድቅ ጝቕም ጝቕምቱ ሰቭድ ኣክንዋ ፍቅርዝ ሊግዘኵ፤ ጝቕምትም ኻንፀኵ።

¹⁷እንዝ ማጥን ኣደረትቍዝ ክታኻደረ ያ ጝታኻሰቭድ ጊነቱ ኣቐቍ ኣኽዛቫኒዝጘ ፅባይርነጘ የር ድቈኵን።

¹⁸ጛይ ጝታኣይምረውድ ዲንዝዝ ኣስክዘነ ብጛንስቅ ጝታእዘንድ ጥምትኩ፤ እደረት ርዅየይስም እክልድጝኵ።

¹⁹ጝታኽሊነድ ዲንዝዛንስቅ እቭታው ጝታምርቐፀይዝ ጛት ሸጘ ርኵሰነይዝቅ ፅብጥጘ ቅጥ እጀው ብልግነዝ ጝታቕምት ዲቍስጝ ይው።

²⁰ክትን ግን ክርስቶስት ኣርቕርነውድ እነየው ጒደነዝም ኣየው።

²¹እርግጥ ጝቍዝ ዊግሸውድየንት ወሽርንዅርኑ፤ እየሱስትል ፅበው እማኒዝ ሚስርትዝም ጝጊስ ክንድርንኵርኑ።

²²እንዝ ሚቅ ፅብርና ዊንድርነው ፅብጘድየንት ኻስቭርና፣ ኻጝሰው ምርቕፀዝ ጨቅሸው ኣርጐው ክታጅርነድየንት ጭውዝርን ማልጥን።

²³ክታኣይምረውድም መንፈስዝ ታድሽትነ።

²⁴እማንተው ፅድቅዝመ ቅድስነዝ እደረት ሚልክዝ ፋጥርሸው ኣይር እጅርነይድየንት ሲጥን።

²⁵እንዝ ማጥን ኻሽትድየንት እክልስርን ይን እጝቅ ላው ኣካልዝቍ ክፍላን ኣናንስቅ ክታስ ክታይ እማንድየንት ዊግትጥን።

²⁶ቈጣጭጥን! ዊገድ ግን ክታቍጠይዝ ኽጥያት ሰራሽትርነ፤ ቈጣሽርነጘም ኰረ ጥዊነ።

²⁷ዳቪለውስስም ጥወነ ሚረ ይውትርነ።

²⁸እንዝ ሚቅ ስⶓው ዊነው እጅር፣ ነስየ ሲⶔነ፤ ኽሽስ ቺግርሸቊ እቂዝ ይወነው ችጛንስ ማጥን በገዘ ጝናንጣኒዝ ጣቅመው ሰቭ ሰራሽነ።

²⁹ክታምቸይስ እጅር ኻዝንሰው ውረውረ ጭቓ ዊገቅ ፊነ፤ ዊገድ ግን ወሸቊድዛት በርከው፣ እቂዝም ጝታበንዘዊዝጘ ማኽረናንስ ጣቅመው፣ ዊገ ዊግትጥን።

³⁰ኻርነይ ፍትርኑ ግርየዝ ደደደድሰው ኣቓንስ ማጥን ኻትምሽርነው ቅዱስ እደረት መንፈስድየንት ኻዝንስትርነ።

³¹ማርንድቅ፣ ቊጠዝመ ንድየትዝድቅ፣ ጭቅጭቅዝመ ዛንዝ፣ ኣውማው ኣይንት ጭቕቲጅቅ ክታጊስ እክልስጥን።

³²ክታስ ክታይ ደጋን ርዅርዃንም ኣጥን፤ እደረ ክታት ክርስቶስት ኣመካይነትዝ ይቅር የጘ ክትንም ክታስ ክታይ ይቅር ይሽትጥን።