Read xamtanga እፊሰውንት እቂዝ 5 Bible Online

እፊሰውንት እቂዝ 5 - xamtanga bible

እፊሰውንት እቂዝ 5

¹ነስየ ቀንሸቍ ዅሊዝጘ ክትንም እደረት ተክርነቅ ኣጥን።

²ክርስቶስ ይናት ቀነጘ፣ ጝቕምትም ይናቺ ቀሰው ኻረ ፃየው ሚቨዝመ ምስዋትዝ ፃቭ እደረስ ይወጘ፣ ክትንም ፍቅርዝ ፅብጥን።

³ኣውማው ሽርሙጥነዙ፣ ዊንም ርኵስነዙ፣ ዊንም ስቭርየዙ ዊገ፣ ክታማኽሊል እኳን ፃቭሽትጠ ስሪስቅ ወይሽቲነ፤ እነየው ዊገድ እደረት ቅዱስ ኽዝቭዝ ጥውሻውም።

⁴ኣይቭሰው፣ ጊነቱም ኣቐው ዊገ፣ ወዘ ፈዘዘም ክታጭስ ጥውሻው ኣቓንስቅ ክታማኽሊል ፅቢነ፤ ኽሽስ ሚዝየንዝርነቅ ኣጥን።

⁵ቈሽም እኒንት ኣርቕጥን፤ ኣውማው ሸርሙጠ፣ ዊንም ርኵስ፣ ዊንም ሲቭርቭረው የነትም ጣወት ኣምልከው እጅር፣ ክርስቶስስመ እደረት ምጝግስቲል ርስት እጀውም።

⁶ኣውማውቅ ጊነቱ ዊገዝ ክታት ኻጝሲነ፤ ምላሰንድም እደረት ቍጠድ ኣዚታቍ ዅሊል ተረውድ እንዛዝ ምላሰንዝ የጝ።

⁷እንዝ ማጥን እነየቍ እቂጅቅ ተቫቭርሽትርነ።

⁸በውገ ጥመይል ዊንድርኑ፤ ነን ግን ኣደረትቍ ኣቕርናንስቅ ብርኻን ኣቕርንኵርኑ፤ እንዝ ማጥን ብርኻንዝ ቝሪዝጘ ፅብጥን።

⁹ብርኻኒዙ ፍረድ ችጝሸውድ ደግነትዝ፣ ፅድቅዝመ እማንዝቅ የጝ።

¹⁰እንዝ ማጥን ኣደረት ዲስ ሸውድ ወረጘ ኣቐጘ ኣርቕርናንስ ደምዝጥን።

¹¹ፍር እጀው ጥመይዙ ሰቭድየንት ጋልፅጥንጚ ውረውረዝቅ ጝት ሰራሸቊጅቅ ላው ኣትርነ።

¹²ጛይ ስውርዝ ፃቭጘው ዊገድየን፣ ዊግተናንስ እኳ ኣይቭሰው የጝ።

¹³እጝቅ ዊገድቅ ብርኻኒዝ ጋልፅሽታንድ እማንተው ሚልክድ ቓሊሽትጡ።

¹⁴ምላሰንድም እጝቅ ዊገድየንትቅ ቓሊሽትጠ ፃቨውድ ብርኻን የጝ፤ እንዝ ማጥን፦ «ዝምወትረር እጅር ክተ! ነቃቕ፤ ክርጘይስም ጕ፤ ክርስቶስም ክጭስ ኣቭርኽጡ» ይሽትኩ።

¹⁵ነስየ ኣወይርን ፅብትርነጘ ቐናዝርን ጣጝቅቅጭጥን፤ ጥቨቭኝጢዝጘጚ ጥቨቭ እጀቍ እቂዝጘ ኣቕርን ፅብትርነ።

¹⁶እን ዚምንድ ጭቓ ኣቓንስቅ ኣውማው ኣጋልድቅ ጣቅምጭጥን።

¹⁷እንዝ ማጥን ኣደረት ፍቃድድ ወረጘ ኣቐጘ ኣስክስጥንጚ ኻጘፃን ኣትርነ።

¹⁸ድዘርዝጐ ፊሰው ኣቓንስቅ ወይንዙ ሚዘዝ እራትርነ፤ ኽሽስ መንፈስ ቅዱስዝ እቻጥን።

¹⁹መዝሙርዝመ ውዳሲዝ፣ መንፈሳዊ ዚመዝም ክታስ ክታይ ዊግሽጥን፤ ክታእዘኒዝም ኣደረስ ተቀኝሽትጥን ኣዚምጥንም።

²⁰እጝቅ ዊገይዝቍዝቅ እደረ ኣይርት ዊትርቅ ይናኣደረ እየሱስ ክርስቶስት ሽዝ ሚዝየንዝጥን።

²¹ክርስቶስት ክቭርዝ ይርን ክታስ ክታይ ላውድ ላየይዝ ቅምሽነ።

²²እቍን ክታትርነ! ኣደረስ ቅምሽርናንትጘ ክታግልቊዝ ቅምጭጥን።

²³ክርስቶስ ምከንት ኣውር ኣቐጘ ግልወም ጝእውነት ኣውር የጝ፤ ቈሽም ክርስቶስ ጝሰውነት ኣረይ ምከንሸንስ ጝርቓዘተ የጝ።

²⁴ነስየ ምከን ክርስቶስስ ቅምሽራንትጘ እቍንም እጝቅ ዊገይዝቅ ጝታግልቊዝ ቅምሽጥጘ ጥውሸኵ።

²⁵ግልቍ ክታትርነ! ክርስቶስ ምከንት ቀነጘ፤ ጝቕምትም ጝርቺ ዲቍስ ይወጘ፣ ክትንም ክታእቍንድዛት ቀንጥን።

²⁶ክርስቶስ እኒንት ፃቨውድ ምከንሸንት ጝቃሊዝ ኣመካይነትዝ ኣቝዝ እቓስ ዊር ሸነውዝ ቀድሽትራንስ ማጥን የጝ።

²⁷እኒዝጘም እምቘ፣ ዊንም ጋፅ ጫምትርሸነው፣ ዊንም ላው ጉድለት ችጝሺጝቀ፣ ቅድስት፣ ኒውርም እጅረይ ኪብርድረይ ምከንት ፃቭ ጝቕምስ ኣልሳንስ የጝ።

²⁸ግልቍም እኒዝጘ ጝታቍንድዛት በገዘ ጝታቕምት ሰውነቲዝጘ ፃቭጝ ቀንጥጘ ጥውሸኵ፤ ጝውነት ቀነው፣ ጝቕምት ቀነኵ።

²⁹በገዘ ጝቕምቱ ሰውነትድ ሽክተው እጅርም እጀው፤ ጝት ሚግቨኵ፤ ኣጝክቭክጘኵም፤ ክርስቶስም ምከንስ ፃቨውድ ልክ እኒዝጘ የጝ።

³⁰ምላሰንድም ይን ክርስቶስት ሰውንቲዝቍ ኣካላን የጝ።

³¹«እንዝ ማጥን እጅር ጚር ጝኘት በረኵ፤ ጝውነጅቅም ጣምርሸኵ፤ ጝታቪልም ላው ስየ ኣጘኵ»

³²እኒን ጥልቅ ምስጢር የጝ፤ ያንም እኒንት ክርስቶስስመ ምከንትቍዝ ዊግጠኵን።

³³ኣቓንስቅም ክታጊስ ኣውማውድቅ ጝውነት ጝቕምትጘ ፃቭ ቀነ፤ እውነም ጝርጕርየት ኪብርዝርነ።