Read xamtanga እፊሰውንት እቂዝ 6 Bible Online

እፊሰውንት እቂዝ 6 - xamtanga bible

እፊሰውንት እቂዝ 6

¹ዅል ክታትርነ! ኣደረት ኣምንድርነቅ ኣቕርናንስቅ ክታኣቅሊዝ ኣዚጥን፤ ምላሰንድም እኒን ጥውሸው የጝ።

²«ኪር ክኘት ኪብርዝ» የው ትዛዝድ ቲስፈዙ ቃል ፃየው በውረ ትዛዝድ የጝ።

³እን ቲስፈድም፦ «ክጭስ ቀሰው ኣቓንስ፣ ክእድሚድም ዝቨት ዲጊል ኽየው ኣቓንስ» የው የጝ።

⁴ኣቅል ክታትርነ! ክትንም ክታቝርት ኻልክስትርነ፤ ዊገድ ግን ኣደረት ዲስ ሸው ዊገይዝጘ ማኽረነውዝመ ጋስፀነውዝ ሊጊስጥን።

⁵በር ክታትርነ! ክርስቶስስ ኣዚትርናንትጘ ዝቨይዝቍ ክታኣደርጢዝም ኪብርዘነውዝ፣ ጐውተነውዝ፣ እዘንዙ ቅንነትዝም ኣዚትጥን።

⁶ኣዚትርነውድም ታይተዝመ ሚዝየነ በነነውዝ ኣዪጘቀ፣ ክርስቶስት በሪዝጘ እደረት ፍቃድድየንት እዘንዝ ፋፅመነውዝ የጝ።

⁷እጅር ኣዪጝቀ ኣደረት ኣግልግልድርናንትጘ ጛት ክታእዘኒዝ ኣግልግልጥን።

⁸ምላሰንድም በረም ኣነ ኣደረ ኣውማው እጅርድቅ ሰራሸው ጝቀሰው ሰቪዝቍዝ ጝወየድ ኣደረቲስ ለምርጠጘ ኣርቕርነኵ።

⁹ክትን ኣደርጥ ክታትርነ! ክታበሪዝ ጘጝት ቀሰው ፃቭጥን፤ ጝታጭስም ኣደረ ኣቐው ሲመይ ፅበጘ፣ ጘጝም እጅርዝ እጅር ቲዘቲዛው ኣቐጘ ኣርቕርነኵ፤ ኣቓንስቅም ጛት ጐውስውስትርነ።

¹⁰ነስየ ኣደረስመ ጝኽየው ኻይሊዝ ጣጝክርድርነቅ ኣጥን።

¹¹ዳቪለውስት ተንኰሊዙ ሰቭድ ተቋቍምሸነው ቸልድርናንስ ማጥን እደረቱ ጠውር መሰሪድቅ ሲትጥን።

¹²ይናትግልድ እጅር ጅቅ ኣዪጝቀ እን ጥመዙ ኣልሚዝቍ ቅመቲጅቅ፣ ስልጣናንዝመ ኻይላንዝ ጅቅ፣ እኒዝጘም ሲመይ ስፍረል ፅበቍ እርኵሳን መንፈሳኒዝ ሰራዊታኒጅቅ፣ የጝ።

¹³እንዝ ማጥን ጭቓ ግርየ ተራንድ ተቋቍምሸነው ቸልድርናንስ እደረቱ ምሉ ጠውርመሰሪድ ሲትጥን፤ እንዝም እጝቅትቅ ፋፅምርነት ግረ ፀናቕርን ችብረነው ቸልትርንቅ።

¹⁴ነስየ ክታይውድ እማንዙ ዝናርዝ ከምትርን፣ ፅድቅዙ ጥርቩሽድየንት ሲትርን፣

¹⁵ዲግተዙ ወንጌልድየንት ፃቢዝጘ ፃብረነውዝ ኣስልሸርን ችብጥን።

¹⁶እንዛይ እጝቂስቅም ንየ፣ ልየይዝጘ ጀግ ጀግ የቍ ዳቭሎስት ፍላፃንድዛትቅ ድስተርነ ቸልትርኑ እምንትዙ ገሸድ ጒጥን።

¹⁷ቓደነዙ ኣውር ቍርድ ክታውሪል ደፋጥን፤ መንፈስዙ ሰይፍድም ፃይጥን፤ እንም እደረት ቃልድ የጝ።

¹⁸መንፈስ ቅዱስዝ ቃውሽርና ዊትርቅ ፀለውትዝመ ጨውንዝ ኣልስጥን፤ እኒንትም ኻስቨነውዝ ነቃጥን፤ እጝቅ ቅዱሳኒዝቍዝም ቲግየነውዝ ጨውጥን።

¹⁹ወንጌሊዙ ምስጢርድየንት ጋልፅጨ ይምቸድ ብዛንድቅ ድፍርትዝ ዊግተነው ቃል ነያንስ ማጥን ይጭስም ፃልይጥን።

²⁰ውርም እኳ ነን ሰንሰለትዝ እፁጨር ኣቕሽም ያን እኒን ወንጌልዝቍዝ እፃጨር የጝ፤ ኣቓንስቅም ዊግጨ ጥውሸውድየንት ጐውቲጝቀ ዊግጣንስ ማጥን ይጭስ ፃልይጥን።

²¹ያን ኣወየው ኣቕንዝ ፅበጘ፣ ወረጘም ፃቫ ኣቐጘ ኣርቕርናንስ ማጥን ቀንሸው ይናዝን፣ ኣደረስም ኣምንሸው ኣገልጋይ፣ ኣቐው ትጪቈስ እጝቅ ዊገድየንትቅ ክታጭስ ድቍጡ።

²²ይናኣቕንድየንት ክታጭስ ድቋንስመ ክታእዘንድየንት በርታዛንስ ማጥን የር ጝት ክታጐ እፃቕኩን።

²³እደረ ኣይርቲስ፣ ኣደረ እየሱስ ክርስቶስቲስም ዲግተ፣ ፍቅርም እምንትጅቅ ይናፅኒዝ ኣነ።

²⁴ድዛው ፍቅርዝ ይናኣደረ እየሱስ ክርስቶስት ቀነቊዝቅ ፃገ ኣነ።