Read xamtanga ፍልብስዩስት እቂዝ 3 Bible Online

ፍልብስዩስት እቂዝ 3 - xamtanga bible

ፍልብስዩስት እቂዝ 3

¹ፈርጥን ነስየ ይፅንወ! ኣደረትውዝ ዲስ ይጥን፤ እድየን እንዝ ሚቅ ፃፈው ዊገድየንት ነንም ዊስ ፃፋን ሲለጠቅም፤ ምላሰንድም ክታት ቀተይስ ሊሚድጡ።

²እዛይ ግፅጚስ ጣጝቅቅጭጥን፤ ጭቕት ሰራሸቊስም፣ ስየድየንት ጊርዘቊስም ጣጝቅቅጭጥን።

³ይን እማንዝ ጊርሽትነቅ፣ መንፈስዝም እደረት ኣምልክነቅ፣ ቢዘቱ እትለው ስረትዝ ኣዪጝቀ እየሱስ ክርስቶስትውዝ ጭቝ ማክኽሽነቅ ኣናንስቅ እማንዝ ጊርዝሽትንኵኑን።

⁴በንዘውዝየ ያንም ስየዝ ማክኽዘው ዊገ ፃቀር የጝ፤ ኣውማው እጅር ስየዝ ማክኽሸነው ፃየው ተክሽ እኳ ያን ጝጊስ ዲቈኵን።

⁵ሰውጠትረ ግርየዝ ጊርዝሽጨር፣ እስራየላነ ዚረ፣ ብንያምት ዊግነይስ እዅርጨር፣ እቭራዊያኒስም እቭራዊ የጝ፤ ኽግዝቍዝም ዋቕርድርንሽ ፈሪሳነው ዊኑን።

⁶ወሪት ኽግዝ ቀንየነውዝ ማጥን ኣቕሽም፣ ምከንሸንት ሲድሰር ዊኑን፤ ኽግድየንት ፋፅመነውዝ ችጝሸው ፅድቂዝቍዝም ኣቕሽ፣ ነቐፈ እጀር ዊኑን።

⁷ዊገድ ግን ይት ጣቅምጡ የር ዊነውድየንትቅ ክርስቶስትቍዝ የር ወየ እጀው ፃቭ እግዝኩን።

⁸እኒስም ንየ ጝቍዝ የር እጝቅትቅ በጠው ይኣደረ ክርስቶስ እየሱስት ኣርቐነዊዙ ኽይቲጅቅ ቓላንድ እጝቅትቅ ኪሰረ ፃቭ እግዘኵን፤ ጝቍዝ የር እጝቅትቅ ብኩን፤ ክርስቶስት ችጝጨ ማጥን እጝቅትቅ ጣቅማው ዊገይዝጘ ፃቭ እግዘኵን።

⁹እኒንት ፃቨውድም ኽግ ፋፅመነውዝ ችጝሸው ይቕምቱ ፅድቅድየንት ኣዪጝቀ፣ ክርስቶስት ኣምነነውዝ ችጝሸው እደረት ፅድቅድየንት እምንትዝ ችጛንስ፣ ጝጅቅም ኣቕ ፅባንስ ማጥን የጝ።

¹⁰እኒዝጘም ክርስቶስስመ ጝክርጘይስ ጐነይዙ ኻይልድየንት ኣርቕጨ፣ ጝስቃይስ ኣድልጨ፣ ጝክርጘይዝም ጝት ተክጨ በነኵን።

¹¹ኣው ማውም የር ክርጘይስ ጐነይል ችጝጨ በነኵን።

¹²እኒንትቅ ችጝኩን፣ ዊንም ፍፅም ኣቕኩን የነትም ኣየው፤ ዊገድ ግን ክርስቶስ እየሱስ ይት ጝቕምስ ማርፀው ኣለመድየንት ያንም ጝት ፃቅጨ ጭቕጘ ልቕርጠኵን።

¹³ይፅንወ ያን ገነ ጝግል ችጝኩን የር ይቕምት እግዘቅም፤ ዊገድ ግን ላው ዊገ ፃቨኵን፤ እንም ይእግርገይል ፅበውድየንት ሚጣ ይበዊል ፅበውድየንት ፃቅጨ ቲግየኵን።

¹⁴እደረ ክርስቶስ እየሱስት ኣመካይነትዝ ጝጐ ሲመይ ጭጛንስቅ ሽልማት ችጝጨ ይበዊል ፅበው ግቪዝጐ ውጥየኵን።

¹⁵ነስየ ይን መንፈሳዊ ርዅየዝ በርታነቅ እጝቅ እነየው ኻሰቭ ፃይነ ጥውሸኵ፤ ላው ዊገዝ ጝሉ ኻሰቭ ፃይርን ፅብርንሽ እደረ ጝትም ክታጭስ ጋልፅጡ።

¹⁶ኣቕሽም ነን ችጝነው መንፈሳዊ ደረጀይዝጘ ፃጝነ።

¹⁷ይፅንወ! ይተከድየንት ቲክነነውዝ ላጢጅቅ ተቫቭርሽጥን፤ ይን ክታጭስ ነይነው ተከድየንት ቲክነቍድዛትም ልብ ይርን ቓልጥን።

¹⁸እንዝ ሚቅ ደግምግም ድቈጘ ነንም እንደ ገነ ያውም ሊዛ ድቈኵን፤ እንም ንቕፀቍ እቅ ክርስቶስ ሚስቅሊዝ ፃለታን ኣቕጝ ፃጝጘኵ።

¹⁹እን እቂዝ ጝታኻትሸነድ ድዘር የጝ፤ ጝታኣምላክድ ጝታጊዝውድ የጝ፤ ኣይቭሰው ዊገድ ጝታጭስ ክቭር የጝ፤ ጝታኻለይድ እን ኣልሚዝቍዝ የጝ።

²⁰ይን ግን ይናኻግርድ ሲመይ የጝ፤ ጝጊስም ተረው ቓዘተ ኣቐው ኣደረ እየሱስ ክርስቶስት በነነውዝ ሊሚድነኵን።

²¹ጘጝም እጝቅትቅ ጝቕምስ ቅምስጠ ቸለው ጝኻይሊዝ፣ እኒን ተዋርድሸው ይናሰውነትድየንት ኪብረው ጝሰውነትድየንት ተካንስ ማጥን ላውጥጡ።