Read xamtanga ፍልብስዩስት እቂዝ 4 Bible Online

ፍልብስዩስት እቂዝ 4 - xamtanga bible

ፍልብስዩስት እቂዝ 4

¹እንዝ ማጥን ይቀነቍ በንዝርነቅ ይፅንወ! ይዲስተም፣ ይኣክሊልም ኣቕርነቅ ይወደጃንወ! እኒዝጘ ኣደረስ ፀናቕርን ችብጥን።

²ይውድያንስመ ሰንጢኪንስ ኣደረትውዝ ጛስ ጛይ ቲስመምጝ ፅብጛንስ ጨወኵን።

³ክትም ይጅቅ ላብጠ ሰራሽረር ኣምንሽትረር ይፃምረወ! ወንጌል ችጝዘነውዝ ይስመ ቀለሚንጦስስ ጅቅ፣ እኒዝጘም ጝታሽድ ርዅየዙ መፃፍዝ ፃፍሸቍ ላጥ ይፃምጢጅቅ ላብጠ ተጋድልሸቍ እንዛይ እቍንድዛት ቲስመምጥጘ ማጥን ከቭስራንስ ጨወኵን።

⁴ዊትርቅ ኣደረትውዝ ዲስ ይጥን፤ ነንም ደግም የኵን፤ ኣደረትውዝ ዲስ ይጥን።

⁵ክታገርኽትድ እጝቅዝቅ ኣርቕሽትነ፤ ኣደረት ተረነ ግርየድ ጣቅርኩ።

⁶እጝቅ ዊገይዝቅ ፀለውትዝመ ሚዝየነዝ ክታጨውንድየንት እደረስ ኣልስጥንጚ ውረውረዝቅ ጨጝቅሽትርነ።

⁷እቀ ኣስክሰነይስቅ ንየ ኣቐው እደረት ዲግተድም ክታእዘኒዝመ ክታኣይምረውዊዝ ክርስቶስ እየሱስት ኣመካይነትዝ ሊሚድጡ።

⁸ኻትሸነይዝም ይፅንወ! እማን ኣቐው ዊገድየንትቅ፣ ኪብረው ዊገድየንትቅ፣ ጭቅ የው ዊገድየንትቅ፣ ንፅዅ ኣቐው ዊገድየንትቅ፣ ቀንሸው ዊገድየንትቅ፣ ቀሰው ዊገድየንትቅ፣ ደግነት ኣቐው ዊገድየንትቅ፣ ሚዝየንሽተው ዊገድየንትቅ፣ ኻስቭጥን።

⁹ይጊስ ክንድርነውድየንት፣ ለምትርነውድየንትም፣ ወሽርነውድየንትም፣ ቓልድርነውድየንትም፣ እጝቅትቅ ፃቭጥን። ዲግተዙ ኣምላክ ክታጅቅ ኣነ።

¹⁰እክሰው ግርየ ዲቈት ግረ እንደ ገነ ይጭስ ኻስቨነው ኪርምርናንስቅ ኣደረት ሽዝ ጭቕጘ ዲስ የኵን፤ እርግጥ ፃቨነው ኣጋል ችጚርነቅምጚ ኻስቨነውድስ ኻስቭርነኵ።

¹¹እኒንት የውድ ቺግርጫንስቅም ኣየው፤ ምላሰንድም ኣውማው ኣቕኒዝቅ፦ «ይፃቀውድ ኣቐኵ» የነውድ ክንጥኩን።

¹²በነውድም ኣነ ችጘነውድ ኣርቐኵን፤ ኣውማው ገቨይዝቅ እቭተነውዝመ ግድርደነውዝ፣ ችጘነውዝመ በነውዝ ክንጥኩን።

¹³ኻይል ነየው ክርስቶስት ኣመካይነትዝ እጝቅትቅ ቸለኵን።

¹⁴ኣነጚ ይችግሪዝ ኰር ይጅቅ ኣቕርናንስቅ ቀሰው ፃቭርንኵርኑ።

¹⁵ፍልብስዩስ ፅብርነቅ ክታችወ! ክትን ኣርቕርናንትጘ ኣፍለ ወንጌልድየንት ለምትርናንት ኰር መቀደውንየስ ጓንድ ክታዝለ ይወነውዝመ ለምረነውዝዙ ስልየትዝ ኣውማው ምከንም ተቫቭርሺረይ።

¹⁶ተሰለቅየ ዊናንድ እኳ ይችግሪዝ ደግምግምርን እርዳተ በርስርንኵርኑ።

¹⁷እኒንት የውድም ክታይውትድየንት ችጝጨ ማርቕፅ ኣዪጝቀ ክታልግስነይዙ ፍረድ ንቕፃ ፊራንስ በን የጝ።

¹⁸ይጭስ በንዘውድየንትቅ፣ በንዘዊዝ ነየም ለምጥኩን፤ ጝኻረድ ቀሰው፣ እደረ ዲስ የው ለምረው ምስዋይቲዝጘ ኣቐው ይጭስ በርስርነው ክታይውትድየንት ኣፍረዲጡቲስ ለምጥኩን።

¹⁹ይኣምላክም እቻቐው ጝፃጀይስ ክታጭስ በንዘውድየንትቅ ክርስቶስ እየሱስት ኣመካይነትዝ ክታጭስ እቻዝ ነይጡ።

²⁰ይናኣይር ኣቐው ይናኣምላክስ ዘላልም ኣልም ኣሽ ክቭር ኣነ። ኣሚን!

²¹ቅዱሳኒዝቅ ክርስቶስ እየሱስት ሽዝ ዲግተ ኣልስጥን፤ ይጅቅ ፅበቍ ዚንድ ክታጭስ ዲግተ ኣልስጘኵ።

²²ቅዱሳንድቅ ኽሽም ቂሳርት በተሰቪዝቍ ምመናንድ ዲግተ ነይጘኵ።

²³ኣደረ እየሱስ ክርስቶስት ፃገድ ክታጅቅ ኣነ።