Read xamtanga ቈላስይስት እቂዝ 2 Bible Online

ቈላስይስት እቂዝ 2 - xamtanga bible

ቈላስይስት እቂዝ 2

¹ክታቍዝመ ለዱቅየ ፅበቊዝ፣ እኒዘጘም ይት ኣካልዝ ቓልጝ ኣርቓቊዝቅ ኣወይ ተጋድልጫ ኣቐጘ ኣርቕትርነ በነኵን።

²ተጋድልጨውድም ጛይ ጝእታዘኒዝ ዲብሽትጛንስ፣ ፍቅርዝም ላው ኣጛንስ ማጥን፣ ፍፅም ኣቐው ተረድሽተንዙ ፃጅትድየንት ችጝጝ፣ እደረት ምስጢር ኣቐው ክርስቶስት ኣርቕጛንስ ማጥን የጝ።

³ሲውርሸው ጥቨቭዝመ ኣርቕትዙ ኻፍትዝድቅ ችጝሸውድ ክርስቶስቲስ የጝ።

⁴ኣውማውቅ ዊገ ኣምርዝን ዊግተነውዝ ኻጝሳየጘ እኒንት ክታጭስ ድቈኵን።

⁵ውርም እኳ ኣካልዝ ክታጊስ እክልጣም፣ መንፈስዝ ግን ክታጅቅ የጝ፤ ስረትዝ ፅብርነጘ፣ ክርስቶስትልም ፃይርነው እምንትድ ፅኑ ኣቐጘ ቓላ ጭቕጘ ዲስ የኵን።

⁶ነስየ ኣደረ ክርስቶስ እየሱስት ለምትርነጘ፣ እኒዝጘም ጝዝ ፅብጥን።

⁷ጝዝ ስር ሲቭርን ኻንፅሽትጥን፤ ክንድርነው ክንድጚዝጘም እምንትዝ ፀናቕርን ጭቕጘ ንቕፀው ሚዝየነ ኣልስርና ፅብጥን።

⁸ክርስቶስትል ኣዪጝቀ እቀ ልምዲዝመ እን ኣልሚዙ ስረቲል ሚስርትሸው ፍልስፍነዝመ ጊነቱ ኻጝሰነውዝ ኣውማውቅ መራቕ ፊሳየጘ ጣጝቅቅጭጥን።

⁹ምላሰንድም መለኰቲዙ ፍፅም እቻቕንድ ኣካልዝ ጋልፅሽት ፅበውድ ክርስቶስትውዝ የጝ።

¹⁰ክትንም ቅምትዝመ ስልጣንዝቅ ንየቱ ኣቐው ክርስቶስት ኣመካይነትዝ ምሉ ኣቕርንኵርኑ።

¹¹ጝዝ ኣቕርንም እቀ ናንዝ ኣየው ግዝርት ጊርዝሽርንኵርኑ፤ እንም ኽጥያትኘ ስየይዙ ባኽርይድየንት እክልሰነው፣ ክርስቶስት ኣመካይነትዝ ኣቐው ግዝርት የጝ።

¹²ጥምቅትዝም ክርስቶስ ጅቅ ዲቭሽትርንኵርኑ፤ ጝት ክርጘይስ ጕሰው እደረት ኻይሊዝ ኣምነነውዝም ጝጅቅ ክርጘይስ ጕርንኵርኑ።

¹³ክትን ክታበደሊዝ ምላሰንዝ፣ ክታኽጥያትኘ ስየዙ ባኽርይድየንትም ጊርዝሽቲርነቅ ኣቕርናንስቅ ክትርነቅ ዊንድርኑ፤ ነን ግን እደረ ክታት ክርስቶስ ጅቅ ርዅየ ነዩ፤ ይናኽጥያትድየንትም ይቅር ዩ።

¹⁴ይናት ኪሳ፣ ተፃርርሻም ዊነው ቢንዙ ፅፈሽድየንትም ጝኽጊጅቅ ዲምስሰነውዝ፣ ሚስቅሊዝ ቻጝክር እለ እክልሱ።

¹⁵ኻልቅጢዝመ ስልጣን ጒጢዙ መርግድየንትም ጊፈነውዝ፣ ጛት ጝሚስቅሊዝ ኻቕ ኣደቫቫይል ጅሉዛ እትልጠጘ ፃቩ።

¹⁶ነስየ ዀነውዝቍዝ፣ ዝየነውዝቍዝ፣ በልዝቍዝ፣ ኣርፈ በተነዝቊዝ፣ ቅዳምሲንቭትዝቍዝ፣ እንዛዝቅ ኣውማውቅ ክታት ፊርዲነ።

¹⁷ምላሰንድም እንዛይ እጝቅ ተርጥቍ ገቪዝ ፃመይዝጘ ጛይ፤ እማንዝ እትለውድ ክርስቶስ የጝ።

¹⁸ኣጕል ትኽትነዝመ መላካንድዛት ኣምልከነውዝ ቀነው ኣውማው እጅርቅ ክታት ወየ እጀው እዳዛየጘ ጣጝቅቅጭጥን፤ እነየው እጅርድየን ቓለው እትለይዝቍዝ ጝቕምት ጭቕጘ ንየስ ንየስ ሻ ስየይዙ ኣርቕትዝ ኲረኵ።

¹⁹ጘጝ ኣውር ኣቐው ክርስቶስ ጅቅ ውረውረ ዲምቀንም እጀው፤ ክርስቶስቲስም ሰውነትድቅ ምሉዝ ጅገዝመ እፅወነውዝ ዅረ ለምራ ጋጥምጥምሻም እደረ ሊጊስጠ በነጘ ሊግዘኵ።

²⁰እን ኣልሚዙ ስረቲስ ቲትርን ክርስቶስ ጅቅ ክትርነቅ ኣቕርነውዝየ፣ እድስለ ወረጘ የነት የጝ እን ኣልሚዝቍ እቂዝጘ፦ «ፃይተ፤ ጣምተ፤ ዳቕተ፤» የቍ ትዛዛንዝ ቅምሽርነውድ?

²²እንዛይ እጝቅ እቅ ሰራሽጘው ትዛዚል፣ ክንድጚልም ሚስርትሸቍ ኣጛንስቅ ስቭል ግሪጘት ግረ ድዝጥጘ ዊስንሸቍ ጛይ።

²³እንዛይ ትዛዛንድ እቅ ጝታፍቃዲዝ ኣቐው ኣምልከዊዝመ ኣጕል ትኽትነዝ ሰውነትድየንት ጕስቝልዘነውዝም ቲኵረቍ ኣጛንስቅ ጥቨቭ ፃየቍ ተክጘኵ ኣጠት፤ ዊገድ ግን ስየዙ ስምየትድየንት ተቈጣጥርሸነው ረገዲዝ ወየ እጀቊ ጛይ።