Read xamtanga ቈላስይስት እቂዝ 3 Bible Online

ቈላስይስት እቂዝ 3 - xamtanga bible

ቈላስይስት እቂዝ 3

¹ነስየ ክርስቶስ ጅቅ ክርጘይስ ጕርነውዝየ፣ ክርስቶስ እደረት ለወይል ጐየዊል ፅበው ንየቱ ዊገድየንት በንጥን።

²ክታኻሰቭድም ንየ ሲመይ ፅበዊል ኣነጚ ዝቨይዝዊል ኣቒነ።

³ምላሰንድም ክትርንኵርኑ፤ ክታርዅየድም ክርስቶስ ጅቅ እደረትል ሲውርሽኩ።

⁴ክታርዅየ ኣቐው ክርስቶስ ጋልፅሽታንድ፣ ክትንም ጝጅቅ ክቭርዝ ጋልፅሽትትርንቅ።

⁵እንዝ ማጥን ዝቨይዙ ክታሰውንቲል ፅበቍ ክታምርቕፅድዛት ቍውጥን፤ ጛይም ሽርሙጥነ፣ ርኵስነ፣ ሽርሙጥነዙ በን፣ ጭቓ ምርቕፀ፣ ጣወት ኣምልከነው ኣቐው ቓቂትን፣ ጛይ።

⁶እንዛዝ ምላሰንዝም እደረት ቍጠድ ኣዚታቊ እቂል ተረኵ።

⁷ክትንም እንዝ ሚቅቱ ክታፅብጘይዝ እንዛት ፃቨነውዝ ፅብርነቅ ዊንድንሩ።

⁸ነን ግን ቍጠድየንት፣ ንድየትድየንት፣ ዛንድየንት፣ ርየድየንት፣ ኣይቭሰው ዊገድየንት፣ እንዛት ተከቍዛትቅ እለ እክልስጥን።

⁹ኣርጐው እጅርነይድየንት ጝሰቪጅቅ ጭውዝርን ማልድርናንስቅ ክታስ ክታይ ኻሽት ዊግትርነ።

¹⁰ጝፍጥርቲዙ ሚልክድየንት ተካንስ ማጥን እደረት ኣርቐነውዝ ታድሽተው ኣይር እጅርነይድየንት ሲትርንኵርኑ።

¹¹እን ገቨድየንትም ግሪካነው፣ ዊንም ኣይዂዳነው፣ ጊርዝሽተው፣ ዊንም ጊርዝሽቲየው፣ ኣረመኒ፣ ዊንም ዘላን፣ በረ፣ ዊንም ኣደረ፣ የው ቲዘቲዘው ዊገ እጀውም፤ ዊገድ ግን ክርስቶስ እጝቅቅ የጝ፤ እጝቅዝቅም የጝ።

¹²ነስየ ቀድስሽትርነቅ፣ ቀንሽርነቅም እደረት ምርፃን ኣቕርናንስቅ፣ ርኽርኸነድ፣ ቸርነትድ፣ ትኽትነድ፣ ገርኽትድ፣ ኣቕልድ እንዛትቅ ሲትጥን።

¹³ክታስ ክታይ ቸለቸልሽትጥን፤ ክታጊስ ላውድ ላየይል ቅር የው ዊገ ፃየው ፅብሽ ይቅር ይሽትጥን። ኣደረ ክታት ይቅር የጘ ክትንም ላጥድዛት ይቅር ይጥን።

¹⁴እንዛዝቅ ኒየ፣ እጝቅትቅ ፍፅም ላው ፃቭ እፅወው ፍቅርድየንት ሲጥን።

¹⁵ላው ሰውነቲዝጘ ኣቕርን ጭጝሽርነውድ ዲግተዝ ፅብርናንስ ኣቓንስቅ ክርስቶስት ዲግተድ ክታዘኒል ኒግስነ፤ ሚዝየንዝርነቅም ኣጥን።

¹⁶ክርስቶስት ቃልድ እቻቕንዝ ክታግል ፅብነ፤ ክታስ ክታይ እጝቅ ጥቨቭዝቅ ክንደክንድሽትጥን፤ ማኽረማኽርሽትጥን፤ መዝሙርዝመ ማኽልየትዝ፣ መንፈሳዊ ቅንየዝም እደረት ክታዘኒዝ ሚዝየንዝርና ዚምርጥን።

¹⁷ጝዝ ኣመካይነትዝ እደረ ኣይርስ ሚዝየነ ኣልስርና ቃልዝም ኣነ ሰቭዝ ፃቭርነው ዊገድየንትቅ ኣደረ እየሱስት ሽⶔዝ ፃቭጥን።

¹⁸እቍን ክታትርነ! ኣደረስ ጥውሸው ኣቓንስቅ ክታግልቊዝ ቅምጭጥን።

¹⁹ግልቍ ክታትርነ! ክታእቍንድዛት ቀንጥን፤ ጛጭስም ጨካኛን ኣትርነ።

²⁰እፈር ክታትርነ! ኣቅልዝ ኣዚተነው እደረት ዲስ ሽው ኣቓንስቅ ክታኣቅሊዝ እጝቅ ዊገይዝቅ ኣዚትጥን።

²¹ኣቅል ክታትርነ! ቲስፈ ቀቫይጘጘ ክታቝርት ቍጠዝ ሲለስትርነ።

²²በር ክታትርነ! እጅር ዲስ ሸናንስመ ታይተዝ ኣይዪቀ ጭቅየው እዘንዝ ኣደረት ጐውተነውዝ ዝቨይዝቍ ክታኣደርጢዝ እጝቅ ዊገይዝቅ ኣዚትጥን።

²³ፃቭርነው ዊገድቅ እጅርዝ ኣይዪቀ ኣደረስ ፃቭርነቅ ኣቕርነጘ እግዝርን ምሉ ክታዘንዝ ፃቭጥን።

²⁴ምላሰንድም ኣደረቲስ ሲመይቱ ርስት ወየ ፃቭርን ለምትርነቅ ኣቕርነጘ ኣርቕርነኵ፤ ኣግልግልድርነውድም ኣደረ ክርስቶስት የጝ።

²⁵በደለኘም ጝናነቍድ ችጝጡ፤ ኣድልወነው እጀውም።