Read xamtanga ቈላስይስት እቂዝ 4 Bible Online

ቈላስይስት እቂዝ 4 - xamtanga bible

ቈላስይስት እቂዝ 4

¹ኣደርጥ ክታትርነ! ክትንም ሲመይል ኣደረ ፃይርነቅ ኣቕርነጘ ኣርቕርነቅ ኣቕርናንስቅ፣ ክታበርድዛት ቅንነተዝመ ጭቅየው ፍርድዝ ጭሰጭስጥን።

²እደረት ሚዝየንዘነው ጅቅ ነቃቕርን ቲግየዝ ፃልይጥን።

³ያን ጝጭስ እፁጨር ኣቐር ክርስቶስት ምስጢርድየንት ኣውጀነው ቸልናንስ እደረ ጝቃሊዙ ሚረድየንት ብዛንስ ማጥን ይናጭስ ፃልይጥን።

⁴ያንም ዊግጨ ጥውሻንትጘ ቃልድየንት ግልፅዝ ዊግጣንስ ማጥን ይጭስም ፃልይጥን።

⁵ኣምናቍ እቂዝ በዊል ጥቨቭዝ ዋጥርጥርድርና ችጝሸው እድልድየንትቅ ጣቅምጭጥን።

⁶ኣውማው እጅሪዝቅ ኣወየው ዊሰ ይወነው ጥውሸው ኣቐጘ ኣርቕርናንስ ማጥን ክታዊገድ ዊትርቅ ጭወዝ ቂምምሸዊዝጘ ፃገዝ እቻቐው ኣነ።

⁷ትጪቈስ ይፅበጘድየንትቅ ክታጭስ ድቍጡ፤ ጘጝ ቀንሸው ይናዝን፣ ኣምንሽተው ኣገልጋይ፣ ኣደረት ሰቪዝም ይጅቅ ላብጠ ኣግልግለው ይፃምረ የጝ።

⁸ይናፅብጘድየንት ክታጭስ ኣርቕሳንስ ክታእዘንድየንትም ዲብሳንስ ማጥን ጝት ክታጐ በርስጭር።

⁹ጘጝም ክታዊግነ ኣቐው ኣምንሽተው ቀንሸውም ኣቐው ይናዝን ኣነሲመስ ጅቅ ክታጐ ተርጡ፤ ጛይም እን ስፍረይል ፅበው ገቨድየንትቅ ክታጭስ ድቍጥቍ።

¹⁰ይጅቅ ላብጠ እፅቍሸው ኣርስጥረኰስስመ በርናቫስት ዚምድ ማርቈስስ ክታጭስ ዲግተ ኣልስጘኵ፤ ማርቈስት ማጥን ክታጭስ መምርየ ችጝኩ፤ ኣቓንስቅም ጘጝ ክታጐ ተራንድ ለምጥን።

¹¹እየስጠስ ይሽተው እየሱም ዲግተ ኣልሰኵ፤ ጊርዝሽተቊዝ ማኽሊስ እደረት ምጝግስቲዝቍዝ ይጅቅ ላብጠ ሰራሸቍድ እንዛይ ጭቝ ጛይ፤ ይትም ዲብሰጝኵ።

¹²ክታዊግነ ኣቐው ክርስቶስ እየሱስት ኣገልጋይ ይባፍረም ክታጭስ ዲግተ ኣልሰኵ፤ ጘጝም ፍፅም ጣንክርድርናንስመ እደረት ፍቃድዝቅ ምሉ በምሉዝ እርጋቕርን ፅብርናስ ዊትርቅ ክታማጥን ፀለውትዝ ተጋድልሸኵ።

¹³ቈሽም ክታቍዝ እኒዝጘም ለዱቅየስመ እያረስትቍ ኻትምጢል ፅበቍዝቅ ቲጊ ሰራሻ ኣቐጘ ያን ጝማጥን ሚዝርጠኵን።

¹⁴ቀንሸው ኻኪም ሉቃስስመ ዲማስስም ዲግተ ኣልስጘኵ።

¹⁵ለዱቅየ ፅበቍ ይናፅኒዝ፣ ንምፉንስመ ጝርጝኒል ፅብረይ ምከንሸንስ ዲግተ ኣልስጥን።

¹⁶እኒን እፃድየንት ኣንቭቭርነት ግረ ለዱቅየ ፅብረይ ምከንሸንስ ኣንቭቭሽጠ ፃቭጥን፤ ክትንም ቈሽ ለዱቅየስ እፃሽተው እፃድየንት ኣንቭቭጥን።

¹⁷ኣክሪባስም፦ « ‹ኣደረቲስ ለምትረው ኣግልግለውትድየንት ጥጝቅቀዝ ፋፅም› የውኩ» ይጥን።

¹⁸እኒን ዲግተድየንት በገዘ ይናኒዝ ፃፈርድ ያን ይቕም ባውሎስ የጝ፤ ይፁሽንድም ኻስቭጥን፤ ፃገ ክታጅቅ ኣነ።