Read xamtanga 1ተሰለቅየት እቂዝ 2 Bible Online

1ተሰለቅየት እቂዝ 2 - xamtanga bible

1ተሰለቅየት እቂዝ 2

¹ይናፅን ክታችወ! ክታጐ ተርነውድ ጊነዝ ይን ኣየው ኣቐጘ ክታቕም ኣርቕርነኵ።

²ዊገድ ግን ክትን ኣርቕርናንትጘ እንዝ ሚቅ ፍልብስዩስ ፅብና ሚከረ ለምርን፣ ዛሽሽን፣ ጭቕጘ ታግልሽን፣ እደረት ወንጌልድየንት ክታጭስ ኣቭዝርስናንስ፣ ይናኣምላክቲስ ድፍርት ችጝኑን።

³ምላሰንድም ክታጭስ ኣልስነው ጨውንድ፣ ቀተዝ፣ ዊንም ጭቓ ኣለመዝ፣ ዊንም ክታት ኻጝስነ በነነውዝ ኣየውም።

⁴ዊገድ ግን እደረ ይናት ወንጌልድየንት ኽድርዝ ለምርናንስ በቃቐቍ እቅ ፃቭ እጝዘጘ ኣቕን ዊግትነኵን፤ እኒንት ፃቭነውድም ይናእዘንድየንት ሚርምረው እደረት ዲስ ሽነ የጝጚ እጅር ዲስ ሽነም ኣየው።

⁵ክታቕም ኣርቕርናንትጘ ኣቭልቭልናⶖ፣ ዊንም ጊንዝቭ ማርቕፅን ሺፍንፍና ዊግቲነቅም፤ እንዝም እደረ ይናሚዝር የጝ።

⁶ክታጊስም ኣነ ላየ ኣውማው እጅሪስቅ ችጝሸው ክቭር በኒነቅም፤ ክርስቶስት ኻወርየታን ኣናንስቅ ክታመውር ኣነ ቸልነ ዊኑን።

⁷ዊገድ ግን ኵየን ጝርቝርት ቐናዝር ኣጝክቭክቭራንትጘ ይንም ክታማኽሊል ገርኽትዝ ዋጥርጥርኑን።

⁸እኒዝጘም ይን ክታት ጭቕጘ ቀናንስቅ፣ እደረት ወንጌልድ ድቈነው ጭቝ ኣዪጝቀ፣ ይናርዅየሸንት እኳ ክታጭስ ዲቍስን ነይነ ይናፍቃድ ዊኑ፤ ምላሰንድም ክትን ይናጭስ ጭቕጘ ቀንሽርነቅ ዊንድርኑ።

⁹ይናፅንወ! ይናዝላይዝመ ይናልቕረይዝ ኣርቕርነኵ፤ ኣውማውስቅ መውር ኣቓይነጘ ይን ኻር ጊርቅ ሰራሽና እደረት ወንጌልድ ክታጭስ ሲቭክኑን።

¹⁰ክትን ኣምንድርነቂዝ ማኽሊል ፅብናንድ ኣወይን ቅድስነዝ፣ ፅድቅዝ፣ እኒዝጘም ነቐፈ እጀው ፅብጘዝ ፅብነጘ፣ ክትንም እደረም ይናሚዝረጫን የጝ።

¹¹ኣይር ጝቝርስ ኣቓንትጘ፣ ይንም ክታእጝቅዝቅ ኣወይነቅ ዊነጘ ኣርቕርነኵ።

¹²ዊትርቅ ማኽርና በርታዝናም፣ ክታት ጝምጝግስቲል ጝክቭሪልም ጭጘው እደረስ ጥውሸው ፅብጘ ፅብርናስ፣ ኪው ሽን ጨውና ዊኑን።

¹³ቈሽም ይናጊስ ወሽርነው እደረት ቃልድየንት ለምትርናንድ፣ ክትን ኣምንድርነቂዝ ማኽሊል ሰራሸው እደረት ቃሊዝጘ ፃቭርን ለምትርኑጚ፣ እጅርዙ ቃሊዝጘ ፃቭርን ለምሪርነቅ ኣቕርናንስቅ፣ ቀቪጝቀ እደረት ሚዝየንዝነኵን፤ እርግጥም ዊግትነውድ እደረት ቃል የጝ።

¹⁴ይናፅንወ! ክርስቶስ እየሱስት ኣምነቍ ይዅዳ ፅበቍ እደረት ምከንጣንድዛት ተክርነቅ ኣቕርንኵርኑ፤ ጛይ ኣይዅዳኒስ ሚከረ ለምርጘጘ፣ ክትንም በገዘ ክታዊግኒስ ሚከረ ለምትርንኵርኑ።

¹⁵እዛይ ኣደረ እየሱስትም ነቭያታንድዛትም ቍዉ፤ ይናትም ሲድስ፤ ጛይ እደረት ዲስ ሻቍም፤ እቀ ዚረይዝቅም ፃለታን ጛይ።

¹⁶ምላሰንድም ኣኽዛቫን ቓድጥጙ ቃልድየንት ዊግታይነጘ ኪልክልጘኵ፤ እነሽጝም ዊትርቅ ጝታኽጥያቲዝ ዲጊል ኽጥያት ቈሽጛ ፊርጘኵ፤ ኻትሸነይዝም እደረት ቍጠድ ጛግል ተርኩ።

¹⁷ዊገድ ግን ይናፅንወ! ይናእዘኒዝ ኣቒጝቀ ኣካልዝ ዊቱ ግርየ ክታጊስ ቲትነት ግረ፣ ክታት እቀጘ በናንስቅ ክታጋፅድየንት ቓልነ ማጥን ልቕርድኑን።

¹⁸ኣቓንስቅም ክታጐ ተርነ በንን ዊኑን፤ ኽሽም ያን ይቕም ባውሎስ ደግምግም ሚኵር ዊኑን፤ ዊገድ ግን ሲጣን ደይሱ።

¹⁹ይናኣደረ እየሱስ ተራንድ ጝበዊል ይናቲስፈድ ዊንም ይናዲስተድ ዊንም ኲርነው ይናድሊዙ ኣክሊልድ ኣው የጝ? ክትን ኣይርነቅመ?

²⁰የይ! የናክቭሪዝመ ይናዲስተይዝ ክትን የጝ።