Read xamtanga 1ተሰለቅየት እቂዝ 3 Bible Online

1ተሰለቅየት እቂዝ 3 - xamtanga bible

1ተሰለቅየት እቂዝ 3

¹እንዝ ማጥን፣ እንዝ ንየ ክታት ቓሊጝቀ ፅበነው ቸለነ ብናንስቅ፣ ኣቲነ ይናይለ እዳቐነውድ ይናጭስ ቀሰው ተክ እትሉ።

²ኣይንድም ክታት እምንቲዝ ፀናዛንስመ በርታዛንስ ማጥን፣ ክርስቶስት ወንጌልድየንት ክንሰነውዝ ይናጅቅ ሰራሸው እደረት ኣገልጋይ ይናዝን ጢመቲወስት ክታጐ እፃኑን።

³እንም እኒን ሚከረይዝቍዝ ኣውም ተናውጥሻየጘ የጝ፤ እኒን ሚከረድ ይናግስ ሚድብሸው ኣቐጘ ክታቕም ኣርቕርነኵ።

⁴ክታጅቅ ዊናንድ ሚከረ ለምርነጘ በውርስን ክታጭስ ድቍና ዊኑን፤ ክትን ኣርቕርናንትጘም ጘጝት ኣቑ።

⁵እንዝ ማጥን ውርቅ ታግሽተነው ቸለነ ባንድ፦ «ምናልቫች ፊትነተድ ፊትኑ ኣጠት፣ ይናልቕረድም ጊነ ኣቕ እዳቑ ኣጠት» የር ጐውጣንስቅ፣ ክታእምንትድየን ኣወየጘ ኣርቕጨ በን፣ ጢመቲወስት እፃቑን።

⁶ነን ግን ጢመቲወስ ክታጊስ ይናጐ ተር ክታእምንቲዝመ ክታፍቅሪዝቍዝ ቀሰው ጂጘ ነሱ፤ ቈሽም ይናት ዊትርቅ ቀሰውዝ ኻስብርነኵ ኣቕርነጘ፣ ይንም ክታት ቓልነ በናንትጘ ክትንም ይናት ቓልትርነ በንርነኵ ኣቕርነጘ ይናጭስ ድቁ።

⁷እንዝ ማጥን ይናፅን ክታችወ! ይናጭጝቅቲዝመ ሚከረይዝቅ፣ ክታእምንቲዝቍዝመ ክታቍዝ ዲብሽትኑን።

⁸ክትን ኣደረ እየሱስስ ፀናቕርነውዝየ፣ እማንም ይን ርዅየዝ ፅብንቅ።

⁹ክታቍዝ ይናኣምላክት በዊል ችጝነው ዲስተይዝቅ፣ እደረስ ኣወየው ሚዝየነ ኣልስንቅ ኣጢ?

¹⁰እንደ ገነ ክታት ቓልናንስ ማጥን፣ ክታእምንቲዝ ጒድለውድየንትም እቻዘነው ቸልናንስ ማጥን፣ ኻር ጊርቅ ቲግየዝ ፃልይነኵን።

¹¹ነንም ጝቕም ይናኣይር ኣቐው ይናኣምላክስመ ይናኣደረ እየሱስ ክርስቶስትውዝ፣ ክታጐ ተርናንስ ማጥን ይናጒደነድየንት ጭቅ ሽነ።

¹²ይን ክታት ቀናንትጘ ክታስ ክታይ ቀንሽርነው ፍቅሪዝመ ላጥድዛት ቀንድርነው ፍቅሪዝ ኣደረ ክታጭስ ኒቒስነ፤ ቲርፍርፍዝነም።

¹³ይናኣደረ እየሱስ ክርስቶስ እጝቅ ጝቅዱሳኒጅቅ ተራንድ፣ ይናኣይር ይናኣምላክት በዊል ነቐፈ እጅርነቅ፣ ቅዱሳንም ኣቕርን ችጝሽርናንስ ማጥን ክታእዘንድየንት ፀናዝነ።