Read xamtanga 1ተሰለቅየት እቂዝ 4 Bible Online

1ተሰለቅየት እቂዝ 4 - xamtanga bible

1ተሰለቅየት እቂዝ 4

¹ነስየ ይፅን ክታችወ! ኻትሸነይዝ ዊግትነ በንነውድ እደረት ዲስ ሸናንስ ኣወይን ፅበነው ጥውሽጠጘድ ይን ክንስንኵኑን፤ እርግጥም ጘጝት የጝ ፅብርነውድ፤ ኣቕሽም ይናኣደረ እየሱስት ሽዝ ክታት ጨውነውድ፣ ማኽርነውድም፣ እኒስ ዲቍስርን ፃቭርናንስ የጝ።

²ኣደረ እየሱስት ስልጣንዝ ኣወየው ትዛዝ ነይነጘ ኣርቕርነኵ።

³እደረት ፍቃድድ ክትን ሽርሙጥነይስ እክልድርን ቀድሽትርናንስ የጝ።

⁴ቈሽም እደረት ኣርቓቍ ኣኽዛቫኒዝጘ ሽርሙጥነ በነነውዝ ኣቒጝቀ፣ ክታእጝቅቅ በገዘ ክታሰውነትድየንት ቅድስነዝመ ክቭርዝ ፃየነው ጥውሽጠጘድ ኣርቕርናንስ የጝ።

⁶እን ዊገይዝ ኣውማውቅ ጝዝንት ቢድሊነ፤ ዊንም ጝዝንድየንት ኻጝሲነ፤ ምላሰንድም እንዝ ሚቅ ድቍነጘ፣ ጣጝቅቅስነጘም፣ ኣደረ እነየው ኽጥያት ፋፅመቍ እቅድዛት ቢቅልደው የጝ።

⁷እደረ ይናት ቅድስነዝ ፅብናንስ ጭጙጚ፣ ርኵስነዝ ፅብናንስም ኣየው።

⁸ነስየ እኒን ምኽርድየንት ነቀነውዝ ለምራው እጅርድቅ፣ እጅርድ ኣቒጝቀ፣ ቅዱስ መንፈስድየንት ክታጭስ ነየው እደረት የጝ ነቀውድ።

⁹ዚንዝ ዚን ቀንሽተነውዝቍዝ ኣውማውቅ ክታጭስ ፃፍጠ በንዛውም፤ ምላሰንድም ክታስ ክታይ ቀነቀንሽርናንስ ክታቕም እደረቲስ ክንድርንኵርኑ።

¹⁰እኒዝጘም መቀደውንየ ፅበቍ ክርስቲያናንድዛትቅ ቀንድርነኵ፤ ኣቕሽም ይናፅንወ! እኒስ ዲቈው ቀንድርናንስ፣

¹¹ፀፅተዝ ፅበነውዝ ልቕርድርናንስ፣ ክታቕምት ኻለይል ጭቝ ቲኵርድርናንስ፣ እንዝ በውገ ኣዝነጘ ክታቕም ክታናንዝ ሰራሽርና ችጝርናንስ ማኽርነኵን።

¹²እንዝም፣ ኣምናቍ እቂዝ በዊል ኪብርድርነቅ ኣትርንቅ፤ ኣውማውስቅ መውር ኣቓይርነቅም።

¹³ይፅን ክታችወ! ቲስፈ እጀቍ ላጥ እቂዝጘ ኻዝናይርነጘ፣ ክረቍ እቂዙ ኣቕንድየንት ኣርቕትርነ በነኵን።

¹⁴እየሱስ ክረጘ፣ ክርጘይስም ጐጘ ኣምነውዝየ፣ እየሱስት ኣምንጝ ክረቍድዛትም እየሱስ ጅቅ እደረ ጕስ ነስጠጘድ ኣምነኵን።

¹⁵ኣደረቲስ ለምርነው ቃሊዝ ሚስርቲዝ ክታጭስ ድቍነ በንነውድ እኒንት የጝ፦ ኣደረ ተርጢስቅ ርዅየዝ ዊነቅድ ክረቍድዛት ቃውሳይነቅም።

¹⁶ኣደረ ጝቕም ኽየው ትዛዝዝ፣ መላካነ ኻልቀዙ ድመዝ፣ እደረት መለከትዝ[3] ድመዝ ኣጅብሽ፣ ሲመይስ ጊምጡ፤ ክርስቶስት ኣምንጝ ክረቍድም፣ በዊል ጕጥቍ።

¹⁷እንዝ ግረ ቈሽ ይን ርዅየዝ ችጝሽነቅድ ኣደረት ኣየሪስ ለምርነ ጛጅቅ ድምነዝ ንየ ናጥቅሽንቅ፤ ዘላልምም ኣደረ ጅቅ ፅብንቅ።

¹⁸እንዝ ማጥን ክታስ ክታይ እኒን ቃሊዝ ዲብሽትጥን።