Read xamtanga 1ተሰለቅየት እቂዝ 5 Bible Online

1ተሰለቅየት እቂዝ 5 - xamtanga bible

1ተሰለቅየት እቂዝ 5

¹ይናፅንወ! እን ዊገድየን ኣቐው ዚምኒዝመ ግርየይዝ፣ ኣውማውቅ ክታጭስ ፃፍጠ በንዛውም።

²ምላሰንድም ኣደረት ግርየይዙ ተረነድ፣ ቓፅጘ ኻርዝ ተራንትጘ ኣቐነውድ፣ ክታቕም ቐናዝርን ኣርቕርነኵ።

³እቅ፦ «እጝቅ ዊገድቅ ዲግተ የጝ፤ ዳኽነ የጝ» ይጝ ፅብጛ፣ ቅምት እውነት ፃያንትጘ፣ ጛግል ድጝግት ድዘር ተርጡ፤ ውረውረዝቅ ኣምልጣቍም።

⁴ይናፅንወ! ክትን ግን ጥመይልም ኣይርነቅ፤ ኣቓንስቅም እድየን ግርየድ ክታት ቓፅጘይዝጘ ዳጝጊፅሳውም።

⁵ክትን እጝቅቅ ብርኻንዝ ቍር የጝ፤ ጊርቀዝ ቝርም የጝ፤ ይን ኻርዝ ዊንም ጥመዝ ዊግንም ኣይነቅ።

⁶ነስየ ነቃነ! ይናቕምትም ቅምነ፤ ዝምወረቍ ላጥ እቂዝጘ ዝምወርነ ጥውሻውም።

⁷ምላሰንድም ዝምወረቍ እቅ፣ ኻርዝ ዝምውርጘኵ፤ ራቐቍም ኻርዝ ራጘኵ።

⁸ይን ግን ጊርቀዝ ዊግን ኣናንስቅ ጥርቩሽ[4] ሲረናንትጘ እምንትዝመ ፍቅርዝ ሲርን፣ ኣውር ቍር[5] ደፋቐናንትጘ ቓደነይዙ ቲስፈድየንት ደፋቕን፣ ይናቕምት ቅምናⶖ ፅብነ።

⁹እደረ ይናት ጭጘውድ ቍጠል ኣዪጝቀ፣ ይናኣደረ እየሱስ ክርስቶስትቍዝ ቓድነ ማጥን የጝ።

¹⁰ችብርጝዝ ፅብናም ኣነ፣ ክርናንድ፣ ጝጅቅ ላብጠ ርዅየዝ ፅብናንስ ማጥን ክርስቶስ ይናቺ ክሩ።

¹¹እንዝ ማጥን ነን ፃቭርናንትጘ ክታስ ክታይ ዲብሽትጥን፤ ላውድ ላየድየንት ኻንፅነ።

¹²ነስየ ይናፅንወ! ክታማኽሊል ቲግየዝ ሰራሸቍ፣ ክታትም ማኽረቍ፣ ኣደረትቍዝ ክታኒየትቍድዛት፣ ኪብርዝርትርነ ማጥን ጨውነኵን።

¹³ጛት ጝታሰቪዝቍዝ ቀንድርና፣ ቐናዝርን ኪብርዝጥን፤ ክታስ ክታይም፣ ዲግተዝ ፅብጥን።

¹⁴ይናፅንወ! ሰቭ ሰራሻቍ ሲዝወጥድዛት ጋስፅጥን፤ ጐውተቍድዛት ዲፍርዝጥን፤ ኻይል እጀቍድዛት ከቭጥን፤ እጝቅ እጅርድየንትቅ ታግሽትጥን ይን ማኽርነኵን።

¹⁵ኣውማው እጅርቅ ጭቓ ዊገይዝ ፊንተ፣ ጭቓ ዊሳየጘ ጣጝቅቅጭጥን፤ ኽሽስ ክታስ ክታይም ኣነ ላጥ እቅዝቅ ዊትርቅ ቀሰው ፃቨነውዝ ቲጊጥን።

¹⁶ዊትርቅ ዲስ ይጥን።

¹⁷ቀቪጝቀ ፃልይጥን።

¹⁸ኣቐው ገቨይዝቅ እደረት ሚዝየንዝጥን፤ እየሱስ ክርስቶስትቍ ኣቕርናንስቅ እደረ ክታጊስ በነውድ እኒንት የጝ።

¹⁹መንፈስ ቅዱስት ልየድየንት ዲፍንዝትርነ።

²⁰ትንቪትድ ነቅትርነ።

²¹እጝቅትቅ ፊትንጥን፤ ቀሰው ኣቕ ችጝሸውድየንት ፃይጥን።

²²ኣውማው ጭቓ ዊገይስቅ እክልትጥን።

²³ዲግተዝ ኣምላክ ጝቕም ክታኹለመነድቅ ቀድስነ፤ ክታመንፈስድ፣ ክታኒፍስድ፣ ክታሰውነትድ፣ እጝቅቅ ይናኣደረ እየሱስ ክርስቶስ ተራንድ ነቐፈ እጀው ሊሚድሽጝ ዊንጝነ።

²⁴ክታት ጭጘውድየን ኣምንሽተው የጝ፤ እኒንትም ጝቕም ፃቭጡ።

²⁵ይናፅንወ! ይናጭስ ፃልይጥን።

²⁶እጝቅ ይናፅንድዛትቅ ቀድስሸተው እምቘእምቝሽተነውዝ ዲምቅጭጥን።

²⁷እኒን እፃድ ቅዱሳን ይናፅኒዝቅ ኣንቭቭሻንስ ኣደረት ማጥን ክታኻደረ የኵን።

²⁸ይናኣደረ እየሱስ ክርስቶስት ፃገድ ክታጅቅ ኣነ፤ ኣሚን።