Read xamtanga 2ተሰለቅየት እቂዝ 1 Bible Online

2ተሰለቅየት እቂዝ 1 - xamtanga bible

2ተሰለቅየት እቂዝ 1

¹ባውሎስቲስ፣ ስልዋኑስቲስ፣[1] ጢመቲወስቲስም፦ ይናኣይር እደረስመ ኣደረ እየሱስ ክርስቶስትው ኣረይ ተሰለቅየ ፅብረይ ምከንሸንስ እፃሽተው እፃ።

²እደረ ኣይርቲስመ፣ ኣደረ እየሱስ ክርስቶስቲስ ፃገዝመ ዲግተዝ ክታጭስ ኣነ።

³ዚንወ! ክታእምንትድ ግሪ ጨቨቅ ኽያ ፊራንስቅ፣ ክታስክታስቱ ፍቅርድም ቈሺታ ፊራንስቅ፣ ክታቍዝ እደረት ዊትርቅ ሚዝየንዝነኵን፤ ሚዝየንዝነም ጥውሸኵ።

⁴እንዝ ማጥን ክትን ችጝርነው ሚከረይዝመ ስድቲዝቅ ፀናቕርናንስቅ፣ ይን ይናቕምም፣ ክታኣቕሊዝመ እምንቲዝቍዝ ኻግር ጨቨቅ ፅበቍ እደረት ምከንጣኒዝ ማኽሊል ማክኽሽነኵን።

⁵እንም እደረት ፍርድድ ጭቅ የው ኣቐጘ ቓሊሰኵ፤ ኣቓንስቅም እደረት ምጝግስቲል ጥወነውዝ በቃቕርነቅ ኣትርንቅ፤ ሚከረ ለምትርነውድም እኒን እደረት ምጝግስቲዝ ማጥን የጝ።

⁶እደረ ፃድቅ ኣቓንስቅ ክታግል ሚከረ ነሰቊዝ፣ ሚከረ ኪፍልጡ።

⁷ሚከረ ለምትርነቅ ክታጭስም ኣነ ይናጭስ ቈሽ ፈውጘ ነይጡ። እንም ኣቐውድ ኣደረ እየሱስ ጀግጀግ የው ልየዝ ጝኻይልቍ መላካኒጅቅ ኣቕ ሲመይስ ጊማንት ኰር የጝ።

⁸ኣይንድ እደረት ኣርቓቍ ይናኣደረ እየሱስት ወንጌሊዝም ኣዚታቍድዛት፣ ቢቅልድጡ።

⁹ጛይም ኣደረት በዊስ፣ ጝኻይሉ ክቭሪስም እክልድጝ፣ ዘላልምቱ ድዘርዝ ቐፃሽጥቍ።

¹⁰ቐፃሽጘው ግርየድም ጝቅዱሳኒዝ ኪብርሽጠ፣ ጝት ኣምነቊዝመ ይናሚዝርነይድ ለምትርን ኣምንድርነቅ ክታጭስም ጊርምስጠ ተራንድ የጝ።

¹¹እኒንት ኻስቭና፣ ይናኣምላክ ክታት ጝጭጝቲል በቃቕርነቅ ፃቭ እግዛንስ ማጥን፣ ቀሰው ሰቭ ፃቭትርነ በንርነው ክታበኒዝመ እምንቲዝ ኣቐው ክታኻሰቪዝ፣ እጝቅትቅ ጝኻይሊዝ ፋፅማንስ፣ ክታማጥን ቀቪጝቀ ዊትርቅ ፃልይነኵን።

¹²እነይን ፃልይነውድም፦ ይናኣምላክስመ ኣደረ እየሱስ ክርስቶስት ፃገይዝ ሚስርትዝ፣ ይናኣደረ እየሱስት ሽድ ክታቍዝ ኪብርሻንስ ማጥን፣ ክትንም ጝቍዝ ኪብርሽርናንስ ማጥን የጝ።