Read xamtanga 2ተሰለቅየት እቂዝ 2 Bible Online

2ተሰለቅየት እቂዝ 2 - xamtanga bible

2ተሰለቅየት እቂዝ 2

¹ይናፅንወ! ይናኣደረ እየሱስ ክርስቶስት ተረነይዝቍዝመ ይንም ጝጐ ጥቅልሸነዊዝቍዝ፦

²ትንቪትዝ፣ ዊንም ቃልዝ ድቍሽተጘ ፃቭርን፣ ዊንም ይናጊስ እፃ ፃፍሽ ተረጘ ፃቭርን፦ «ኣደረት ተረነ ግርየድ ተርኩ» ይርን በውዝ ክታኣይምረውዊዝ ተናውጥሽትትርነ፤ ዳጝግፅትርነም።

³ኣውማው እጅርም ውረውረዝቅ ክታት ኻጝሲነ፤ ምላሰንድም ኻትሸነይዙ ኻድይትድ ተሪጝቀ፣ ድዘርል ሚድቭሸው ኣመፅኘ እጅርድም ጒጝቀ፣ እድየን ግርየድ ችጛውም።

⁴ጘጝ እጅርድም ኣምላክ ይሽተዊስመ ኣምልክሸው እጝቅ ዊገይስቅ ንየ፣ ጝቕምት ንየስ ንየስ ሸው ተቀዋሚ የጝ፤ ጘጝም እደረት መቅደስ ጝኒል ጐይ፦ «ያን ኣምላክ የጝ» ያ ኣዋጅ ድቍስጡ።

⁵ያን ክታጅቅ ዊናንድ እኒን ዊገድየንት ድቋ ዊነጘ ኣጃይርነቅመ?

⁶ጝጭስ ዊስንሸው ግርየይዝ እትልጢስቅ፣ ነን እትላየጘ ኪልክለው ዊገድ ወረጘ ኣቐጘ ኣርቕርነኵ።

⁷ኣመፂዙ ምስጢርድ ነንም እኳ ስውርዝ ሰራሻ የጝ፤ እንም ኣቐውድ ጝት ኪልክለው ዊገድ ጕደነይስ እክልድጢስቅ የጝ።

⁸ጝዝ ግረ እድየን ኣመፅኘ እጅርድየን እትልጡ፤ ጘጝም ኣደረ እየሱስ ጝምቸይዝቍ ፈውጢዝ እፍ የው ድሰውድ፣ ጊርምሰው ጝተረነይዝም ዲምስሰውድ የጝ።

⁹ጘጝ ኣምፅኘ እጅሪዙ ጝተረነድም፣ ሲጣንዙ ኣሰራርዝ ኣቕ እቅድ ቀሰቍ ቲተቲተቍ ታምራን፣ ምልክታን፣ ዲንቅሰቍ ዊቅም ፃቨነውዝ የጝ።

¹⁰እኒዝጘም ቓድጥጘ ማጥን እማንድየንት ዊድጝ ለምጠቅ ይጛንስቅ ድዘቍ እቅድዛት ኻጝሰው ቲተቲተው ጭቓ ሰቭ ሰራሻ ተርጡ።

¹¹እንዝ ምላሰንዝ ኻሽትዝ ኣምንጛንስ ማጥን እደረ ጝታግል ቀሰው ኻይል በርስጡ።

¹²እንም ኣቐውድ እማንድየንት ኣምነቅ ይጝ፣ ጭቕት ሰራሸነውዝ ዲስ ይጛ ዊነቍድቅ ፊርድሽጛንስ ማጥን የጝ።

¹³ኣደረስ ቀንሽርነቅ ይናፅን ክታችወ! ክታማጥን እደረት ዊትርቅ ሚዝየንዝነ ጥውሸኵ፤ ምላሰንድም እደረ ክታት መንፈስ ቅዱስዝ ቀድስሽትርን፣ እማንዝም ኣምንድርን ቓድርናንስ ማጥን ጝባራን ፃቭ ማርፅኩ።

¹⁴ይናኣደረ እየሱስ ክርስቶስት ክቭርድየንት ኣድልሽርናንስም፣ ይን ክንስነው ወንጌሊዝ ኣመካይነትዝ ጭጝኩ።

¹⁵ነስየ ይናፅንወ! ፀናቕርን ችብትጥን፤ ይናምቸይዝ ዊግትነውድም ኣነ፣ ፃፍነው እፃይዝ ዲቍስነው ክንድጝድየንት፣ ኪው ሽርን ፃይጥን።

¹⁶ጝቕም ይናኣደረ እየሱስ ክርስቶስስመ ይናት ቀነው፣ ጝፃገይዝም ዘላልምቱ ዲብሽተነዝመ ቀሰው ቲስፈዝ ነየው ይናኣይር እደረስ፣

¹⁷ክታእዘንድየንት ዲብስጝነ፤ ቀሰው ኣቐው ዊገድየንትቅ ሰራሽርናንስመ ዊግትርናንስ ማጥን በርታዝጝነ።