Read xamtanga 2ተሰለቅየት እቂዝ 3 Bible Online

2ተሰለቅየት እቂዝ 3 - xamtanga bible

2ተሰለቅየት እቂዝ 3

¹ኻትሸነይዝም ይናፅንወ! ኣደረት ቃልድ ክታግል ኣቐጘ፣ ላጥ ስፍሊልቅ ቃዝየዝ ችጛንስመ ኪብርሻንስ ማጥን ይናጭስ ፃልይጥን።

²ቈሽም ቃልድ ወሸቍድቅ ኣምነቍ ኣየቍ ኣጛንስቅ፣ ኣመፅኝጢስ፣ ጭቕ እቂስም ቓድናንስ ማጥን ፃልይጥን።

³ኣደረ ግን ኣምንሽተው የጝ፤ ጘጝም ክታት በርታዝጡ፤ ጭቓይስቅም ሊሚድጡ።

⁴ይን ኣዝነውድየንት ፃቭርናንትጘ ነስየስቅም ፃቭትርነጘ ክታማጥን ኣደረት ተማምንሽነኵን።

⁵ኣደረም ክታእዘንድየንት እደረት ፍቅሪዝመ ክርስቶስት ቸልጘይዝጐ ቃውነ።

⁶ይናፅንወ! «ሰቭ ቀናው፣ ይን ክንስነው ስረቲዝጘም ፅባው ክርስቲያኒስቅ ቲትጥን» ይን ኣደረ እየሱስ ክርስቶስት ሽዝ ክታት ኣዝነኵን።

⁷ይናተከድ ኣወይርን ቲክንትርነጘ ክታቕም ኣርቕርነኵ፤ ምላሰንድም ይን ክታጅቅ ዊናንድ ሰቭ ቀርን ጐዪነቅም።

⁸እንዲያውም ክታጊስ ላው እጅርዝቅ መውር ኣቓይነጘ ይን፣ ኻር ጊርቅ ልቕርደነውዝ ዝላና ሰራሽና ዊኑንጚ፣ ኣውቲስቅ ዝም ይን ሚ ዂነቅም።

⁹እንት ሽነውድም ክትን ይናተከድ ቲክንድርናንስ ይንጚ፣ ይናጭስ በንዘውድየንት ክታጊስ ለምረነው ስልጣን እጅነቅ ኣቕንም ኣየው።

¹⁰እንዲያውም ክታጅቅ ዊናንድ፦ «ሰራሸነው ቀናው እጅር ዂነ» ይን ኣዝን ዊኑን።

¹¹ክታማኽሊስ ሰቭ ቀናቍ ላው ላው እቅ ፅብጘጘ ወሽንኵኑን፤ እንዛይ እቅድ ሰቭ እጀው ጅልውጛ፣ እቀ ገቭል ጥውጛⶖ ኻውከቍ ጛይ።

¹²እነየቍ እቅድዛትም ተረጋግሽጝ ሰራሽጛ ጝታቕምቱ ሚ ዅጛንስ፣ ይናኣደረ እየሱስ ክርስቶስት ሽዝ ኣዝነኵን፤ ማኽርነኵንም።

¹³ይናፅንወ! ክትን ግን፣ ዝላኑን ይርን ቀሰው ሰቭ ሰራሸነውድ ስሪስቅ ሲዝውርትርነ።

¹⁴እኒን ፃፍነው እፃይዝ ዲቍስነው ይናምኽርድየንት ለምራው እጅር ፅብሽ፣ እነየው እጅርድየንት ኣስክስርን ቓልጥን፤ ጝሰራሸው ሰቪዝ ኣይቭታንስ ማጥንም፣ ጝጅቅ ተቫቭርሽትርነ።

¹⁵ኣቕሽም ዚነይዝጘ ፃቭርን ማኽርጥንጚ፣ ፃለት ፃቭርን ቓልትርነ።

¹⁶ዲግተዝ ጕርየ ጝቕም፣ ክታውላይዝቅ ዊትርቅ ዲግተድ ነይነ፤ ኣደረ ክታእጝቅጅቅ ኣነ።

¹⁷እኒን ዲግተድየንት ይናኒዝ ፃፈርድ ያን ባውሎስ የጝ፤ ይደብዳቢያኒዝቅ ቲተነ ምልክትድ እኒን የጝ፤ ፃፈውድም እነሽ የጝ።

¹⁸ይናኣደረ እየሱስ ክርስቶስት ፃገድ ክታእጝቅጅቅ ኣነ።